بلوچی وانگ ءُ نبیسّگ – ابدالستار بگٹی

نبشتانک: بلوچی وانگ ءُ نبیسّگ

نبشتہ کار: ابدلستار بُگٹی

دی بلوچستان پوسٹ

پہ بلوچ ءَ بلوچی زبان ءِ وانگ ھچبر گِران نہ انت چی ءَ کہ بلوچی مئے وتی ماتی زبان اِنت پمیشکا ما ابرمی وتی ماتی زبان بلوچی ءَ ٹَوک کُت کنیں پمیشکا ما توری گوں وتی لوگ ءِ مردماں یا توری گوں سْیاد ءُ وارساں ھمتران ءُ ٹَوک ءَ بِہ بہ ایں ما بلوچی ءِ گپاں زلور پوہ بہ ایں۔ بزاں ما تچک بہ زان ایں کہ ھما بلوچاں کہ چَہ وانگجاھاں پارسی ءُ ھندی وانتگ پہ آیاں بلوچی ءِ وانگ ھچ اڑ ءُ جنجالے نہ بیت۔
البت مارا وتی راجی زبان ماں وانگجاھاں وانینگ نہ بوت پمیشکا ما وتی راجی زبان ءِ وانگ ءُ نبشتہ ءَ ھیل نہ ایں چمیشکا ما چو پارسی، ھندی ءُ انگریزی ءِ وڑ ءَ بلوچی زبان ءِ سْیاھگ ءَ زبر ءُ بَلد ھم نہ ایں گُڑا ایشی ءِ بزانت اے وَ نہ انت کہ ما وتی راجی زبان ءَ مہ وان ایں یا وانگ ءَ یلہ بہ کنیں۔ راستی وَ ایش انت دنیا ءِ دگریں راجی زبانانی ڈول ءَ مئے راجی زبان بلوچی ھم یک شاھگانیں زبانے، آئی ءِ وتی نویکلائیں زگریں گال ءُ گُپتار اَنت، آئی ءِ وتی یک نویکلائیں نبشتہ ءِ سْیاھگے ھست پمیشکا مئے راجی زبان ھم یک زیبائیں لبزانکے دار ایت بلے ما بلوچ راج وتی اے ھُدائی داد ءِ بابت ءَ ناسرپد ایں۔

بلے بژن انت کہ بلوچ یک زیردستیں راجے پمیشکا مئے زھگاں بلوچ راجی زبان ماں وانگجاھاں وانینگ نہ بنت چریشی ءَ مئے پدریچ وتی جِند ءِ راجی پجّار، بزاں بلوچی ءُ براھوی ءِ لبزانک ءِ سْیاھگ ءَ ناشناس اَنت، وتی زبان ءِ وانگ ءُ نبیسّگ ءَ ھیل نہ اَنت۔ انچو گْوش ئے کہ بلوچ راج وتی زبان ءِ لزت ءَ زَبھر انت۔
اے ٹَوک ءَ ما گوں ٹھل ءُ ناز ءَ گْوش ایں کہ بلوچی مئے وتی شھدیں زبان اِنت بلے من گوں بژن ءَ گْوش آں کہ اگاں ما بلوچ وتی راجی زبان ءِ گُپتاری ءَ یک کسانیں دیانے بہ دے ایں گُڑا ما زان ایں کہ ما بلوچ وانندگیں مھلوک ءَ پہ راجی زبان ءَ چے کُتگ؟ ما چَہ درآمدیگ ءُ زورانسریں زباناں انچو بے کساس سانمند ایں اگاں تو مرچی بلوچ وانندگیں مردمے ءَ گوں گپ ءَ بَہ ئے گُڑا تو زان ئے کہ ایشی ءِ بلوچی ٹَوک ءُ توار ءِ لاپ ءَ بے کساس پارسی، ھندی، سندھی ءُ سرائیکی ءِ گال ھوار اَنت۔ تو ھمے پھم ئے کہ بلوچی ءِ وتی زگریں گال کم ءُ ھمے پارسی، ھندی، سندھی ءُ سرائیکی ءِ گال گشتر اَنت، ھزار بژن کہ ما وت راج ءِ وانندگیں لشکر وتی بلوچی ءِ کْوھن ءُ زگریں گالاں ڈالچار کنگ ءَ ایں۔ باید انت ما وتی گُپتار ءِ وھد ءَ ھم بلوچی ءَ بے بھائیں گالاں ڈالچار مہ کنیں بلکیں مُدام گپتران ءَ ھم بلوچی ءِ کْوھن زگریں گالاں زندگ بہ دار ایں کہ پارسی، ھندی ءُ سندھی ئیں وانگجاھانی کسانیں نودربر ءُ چُک ھم بلوچی ءِ ھمے زگریں گالاں بہ زان اَنت۔
ما اے ھچبر نہ گْوشگ ءَ ایں کہ وتی زھگاں مہ وانین اِت بلکیں وتی زھگاں وانگجاھاں راہ بہ دے اِت ءُ وتی دزھُورکی ءِ وھد ءَ وت ھم بِہ وانین اِت اش چی ءَ کہ وانگ ءُ زانگ راجانی دیمروی ءِ بُنھِشت انت ءُ بے وانگ ءُ زانگ ءَ راج ءُ آئی ءِ چاگِرد دیمروی نہ کنت بلے چَہ گوانکواں وتی دزھُورکی ءِ وھد ءَ آیاں بلوچی ءِ درونت ءُ بلوچی ءِ کسانیں کسہ ءُ آزمانکاں بہ وانین اِت کہ آیاں بلوچی لبزانک ءِ بابت ءَ آگاھی یے بہ بیت چی ءَ کہ بے زبان ءَ راج گار بنت۔ دومی ھما بلوچ برات ءُ گْوھاراں کہ پیش ءَ بلوچی نہ ونتگ البت پارسی ءُ ھندی ءَ زبر اَنت مئے آیاں گوں دزبندی انت کہ آ ھم مرچی وتی راجی زبان ءِ وانگ ءَ بُنگیج بہ کن اَنت ءُ بلوچی وانگ ءُ زانگ ھیل بہ گِر اَنت۔
من وَ زان آں کہ ھما بلوچ برات ءُ گْوھاراں کہ پیش ءَ بلوچی نہ ونتگ گُڑا اولی روچ ءَ بلوچی ءِ وانگ آیاں کمیں اجکّہ ءُ گِران مان ایت بلے لھم لھم ءَ بلوچی ھیل کُت کن اَنت اگاں ما شش ءُ ھپت سال ماں وانگجاھاں پہ پارسی ءُ ھندی ءِ وانگ ءُ زانگ جن ایں گُڑا باید انت مارا سَے چار روچ پہ وتی راجی زبان ءَ ھم دیگ لوٹ ایت کہ ما بلوچ راج وتی راجی زبان ءِ نبشتہ ءَ ھم بہ زان ایں۔ ما چون ھم نہ گْوش ایں کہ شُما بیا اِت ءُ یکپارگی بلوچی ءَ نبیس اِت بلکیں بُنگیجی ءَ بلوچی درونتاں کم کم ءَ بہ وان اِت، وتی گْوانکوانی تہ ءَ بلوچی بزانت بلد ایرگیج بکن اِت پد ءَ بلوچی ازمانک ءُ نبشتانکانی وانگ ءَ گلائیش بہ بہ اِت۔ اگاں نبشتانک ءُ آزمانکے ءِ وانگ ءِ وھد ءَ گِرانیں گالے ءِ بزانت ءِ سما مہ بیت گُڑا چَہ بزانت بلد ءَ چارگ بہ بیت۔

اگاں ھمے داب ءَ کسے جُنزان بیت ءُ وتی جُھد ءَ یلہ مہ کنت گُڑا یک ھپتگے ءِ توک ءَ ما وتی راجی زبان ءِ شر وانگ ءَ ھیل کت کنیں پد ءَ مارا بلوچی کلیتاک/ کیبورڈ وتی گوانکوانی تہ ءَ ایرگیج کنگی انت کہ ما بلوچی نبیسّگ ءَ ھیل گر ایں۔ چوناھیگا بلوچ راج ابرمی یک جُھدکارے باید انت ما وتی راجی زبان ءِ وت وانگ ءُ نبیسّگ ءِ جُھد ءَ بُنگیج بہ کنیں۔ اگاں ما بِہ گِند ایں مرچی چاگردی رسانکدر ءِ زمانگ ءَ پیسبُک ءُ وٹس ایپی گلاں بلوچ راجی زبان ءِ ھزمتکار راج ءِ نودربراں پہ بلوچی ءِ دربرگ ءَ باز کُمکّ کنگ ءَ اَنت۔ باید انت ما آیانی گل ءُ تاکدیماں باسکی بہ زور این ءُ راجی زبان ءِ نبیسّگ ءَ چیزے چَہ آیاں دربر ایں۔ وھدیکہ ما بلوچی ءِ سرجمیں درونتاں گوں دلگوشی ءَ بہ وان این ءُ چیزے دربر ایں پد ءَ چہ تندجاہ ءُ وانگیاں بلوچی نبشتانک ءُ آزمانکاں ھمے نیت ءَ بہ وان ایں کہ من چَہ آیاں ردی یے بہ کش آں کہ منی جِند ءِ دربُرتگیں چیز تاجگ بہ بنت۔ بزاں تو وانگجاہ ءِ ماشٹرے ئے ءُ نی تو یک نودربرے ءِ نبشتگیں چکاس ءَ کمار کنگ ءَ ئے۔ اگاں ھمے داب ءَ ما یک ماھے ءِ روان ءُ جُنزان بَہ ایں گُڑا من وت دلجمی ءَ گْوش آں کہ بلوچ راجی زیت وتی راجی زبان ءِ وانگ ءُ نبیسّگ دل کنت ءُ مئے چَہ ھندی، پارسی ءُ سندھی ءَ جان چُٹ ایت۔

بلوچ میزران بات اَنت ءُ بلوچی شالا دیمری ءِ راہ ءَ جُنزان بات

دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت