کراچی ءَ بلوچستان ءِ چاگردی کارکنوک بیگواہ

کراچی ءَ بلوچستان ءِ چاگردی کارکنوک بیگواہ

دی بلوچستان پوسٹ

سر بیتگیں ھالانی رد ءَ گوستگیں شپ ءَ سند ءِ بنجاھی شھر کراچی ءِ ھنکین گُلشن مزدور ءَ پاکستانی لشکر ءُ چیریں ادارھانی کارمنداں یک لوگے ءِ سر ءِ بیڑ برتگ ءُ اود ءَ بلوچستان مند ءِ جھمنند ملا لیاکت ولی ءِ جیئند جھمنند مند بلوچ آباد آوار جتگ ءُ برتگ –

ھالانی تہ ءَ گوشگ بیتگ کہ ملا لیاکت ولی ءِ ھمراھی ءَ دگہ یک کَس ئِے ھم آوار جنگ بیتگ بلے تنی وھدی دومی کس ءِ نام پجارگ نہ بیتگ –

دمگی مردمانی رد ءَ ملا لیاکت ولی بلوچستان ءَ نادراھانی واستا پہ کار ءَ بیتگ ءُ آئی ءِبسیادی گوستانک ءَ بلوچستان ءِ نادراھانی چِن ءُ نادراہ جاھاں بروکیں گل اوست ویلفیئر ءَ بیتگ بلے چریشی ءَ چہ پد ملا لیاکت ولی گل ءَ چَہ دزکش بیتگ ءُ آئی ءَ پہ بلوچستان ءِ چاگرد ءَ نیروز ءُ پوریاگریانی واستا جھد کرتگ –

ھمے وڑ ءَ گوستگیں شپ ءَ کراچی ءَ گل بلوچستان ھوٹل لیاری ءَ اوست ویلفیئر آرگنائزیشن ءِ سرکماش مھم جان دشتی ءُ گل ءِ بنجاھی کارگشاد کیوم پنام ءِ وپا بلوچ ءِ برات سئید ء ابراھیم جھمنند آسیاباد تمپ آوار جتگ ءُ برتگ اَنت

ھمے وڑ ءَ بلوچ وانندہ گل بی ایس او ءِ بنجاھی کارگشاد منیر جالب ءَ بی ایس او گوادر ھنکین ءِ کمک سرکماش سلمان دشتی ءِ پِت ءُ چاگردی باسک ءُ اوست ویلفیئر ءِ سرکماش مھم جان دشتی ءِ بیگواھی ترندی ءَ ایر جتگ اَنت-

آئی ءَ گوشت کہ مھم جان دشتی چاگردی باسک ءُ نیزور ءُ نادراھیں مردمانی واستا کار ءَ بیتگ بلے چوشیں مردمانی آوار جنگ ءُ بیگواہ کنگ بژنی گپے –

منیر جالب ءَ سرکار ءُ مزن واکداراں چَہ دزبندی کرت ءُ گوشتگ کہ مھم جان دشتی ءَ زوت یلہ بہ کنت اگاں ناں بی ایس او سرجمیں بلوچستان ءَ زھرشانیانی جار ءَ پرین اِیت –

زانگ بہ بیت دَہ جولائی دوھزار ءُ بیست ءَ کراچی ءِ دمگ ملیر ءَ پیسل کالونی ءَ اوست ویلفیئر ءِ بنجاھی کارگشاد وپا بلوچ آوار جتگ ءُ برتگ اَت –

ھمے درگت ءَ اوسٹ ویلیفئر وتی جارانکی ءِ تہ ءَ چاگردی کارانی مھتل کنگ ءِ جار پِرینتگ ءُ گوشتگ کہ گل ءِ بنجاھی سرکماش ءُ کارگشاد ءِ بیگواھی ءِ سر ءَ سرجمیں بلوچستان ءَ وتی گھبودی کاراں داریت ءُ دانکہ گل ءِ سرکماش ءُ کارگشاد یلہ کنگ بہ بنت –

آئی ءِ جار ءِ پد ءَ کہ اوست ءِ بنجاھی سرکماش ءُ کارگشاد ءِ بیگواھی ءَ اوست ءِ جاور نگیگ اَنت اے وھد ءَ اوست وتی سرجمیں نادراہ ءُ تھتیاں پَھِلی لوٹ ایت –