پادے درون ءَ پادے ماں شاشان – شیر دل بلوچ

نبشتانک: پادے درون ءَ پادے ماں شاشان

نبشتہ کار : شیردل بلوچ

دی بلوچستان پوسٹ

جائو(جھاؤ) ڈسٹرکٹ آواران ءِ تھسیل ءِ نام اِنت کہ یک وھدے جائو ءِ مردم سک تنگ دست بوتگ اَنت ءُ روزگار ءِ ھاتر ءَ دگہ جاھاں شتگ ءُ پوریاگری اِش کرتگ اِش، جائو ءِ تہ ءَ دگہ روزگار نہ بوتگ ءُ اُود ءِ مردماں جُھد ءُ جپا کشی پہ وتی زند ءِ روچ تیلانک داتگ اَنت ۔
جائو ءِ لھتیں چیز چہ دراھیں جاھاں گیش اتگ اَنت زیبائیں کوہ، نال کور ءُ کور ءِ دپ ءِ ڈگارانی کـشت ءُ کشارکاری، درون ءُ رودینی کچے سید ءُ آسکانی ندارگ جائو ءِ بندری دْروشم ءَ پیش دار اَنت، جائو ءِ ڈگارانی کشار مدام ھست ءُ میزران انت ءُ ساربان ، دھکاں ءُ مالدارانی مالدار ھست ءُ برجم اَنت-

وھدیکہ تنگ دستی ءِ دؤر بوتگ مئے پت ءُ پیروک ءُ کماشاں ھمے گوشتگ کہ جائو ءِ ڈگاراں جَوہ ءُ گلہ کِشتگ اِش ءُ پد ءَ وتی پس ءُ گوک زُرتگ اَنت اِش ماں بیلہ ءَ شتگ اَنت ءُ بیلہ کمو آبادیں جاھے بوتگ زرت ءُ پُٹو سک باز بوتگ مھلوک ءَ کار کرتگ ءُ وتی لاپ والیتنتگ ، چہ جائو ءَ اَبید دومی جاھاں چہ مردماں انچو رُمب ءُ ریچ کرتگ ءُ بیلہ ءَ اتکگ اَنت۔
وھدیکہ بھارگاہ بوتگ ھمے زمیندار پد ءَ واتر وتی ھنداں اتکگ اَنت ـ

بَلے!!جائو ءَ ڈُکال سک کم بیت ءُ مدام سبز ءُ میزران اِنت۔
پرچا جائو ءِ نامداریں نال کور سرجمیں اِلاکھے ءِ تہ ءَ کیت سرجائو ءَ بگر تاں جھل جائو سوڑ ءَ ھنگول ءَ دَر کیت جائو ءِ ڈگار پہ کشت ءُ کشاری ءَ تیوگ ءَ چہ نال کور ءَ آپ زور اَنت ـ
نال کور دور سَرّیں کورے انگت ءَ چُشیں تچکیں گپّ دیم ءَ نیتکگ ءُ نال کور ءِ سر چہ کُجا بندات بیت ھرکس انچو گوش ایت سر ئِے دور اِنت، چُش گوش اَنت سوراب ءُ کلات ءِ کور ءَ آپ زورگ ءَ اِنت، من انچو اِشکتگ نال کور ءَ بےگرند ءُ گریوک ءَ ھم آپ آؤرتگ بزان جمبر گندگ نہ بوتگ اَنت، اِد ءَ ھمے گپّ پدر بیت کہ نال کور ءِ بن سک دور اِنت ءُ جمبرانی آیگ پدی بوگ ءِ ھپتمی روچ ءَ آپ آؤرتگ اے ھبر نال کور ءِ دور سری ءِ گواھی ءَ دے اَنت –

بَشی موسم ءَ ھر روچ سیاہ ءُ تھاریں گوات بند اَنت ءُ مدام ھور گوار اَنت، سرشپ ءَ بگرتاں گوربام ءَ ھور بند نہ بنت ءُ کور ھار ملّ انت ءُ
شپ چرگ ءُ روچ دلکشی ءِ ندارگ پیش دار انت ءُ ھر نیمگ ءَ وشھال ءُ شیپانی سر ءَ جوانیں ندارگ پیش دار اَنت۔۔!!

ڈگارانی سر ءَ گردگ، سیل ءُ سواد بھشت ءِ ندارگ ءَ چہ کم نہ بنت،
کدی ھشک کاری ءُ کدی نمب کاری کدی کشت ءُکشارکاری ھست اَنت ـ
ھمے کور دپّ ءِ ڈگارانی کشار: کرپاس، گوار، ماش، پرماش ماک، زُرت پُٹو کُنچِت، لوش گرماگی پَسل اَنت، سردی جَو، گلہ سری ءِ ژانبو، ڈڈی، اَنت، دومی نیمگ ءَ مالداری کوہ ءُ کوچگ ءِ براہ اَنت۔
زمینداراں گوگ کائیگر شوکیں داشتگ ڈگاراں ماں کائیگر ءُ مادگانی سر ءَ لنگار کن اَنت ۔

2000 ءَ پد جائو ءَ گوں تیزی ءَ دیمروی کرتگ جرنیٹر مشین جَتگ ءُ زمینداری کنگ ءَ اَنت نوں جرنیٹرانی جاہ ءَ سولرسسٹم ءِ سر ءَ کشاورزی کنگ ءَ اَنت، سال ءَ دوبر پیماز ءِ پَسل کِشگ بیت ءُ یکے سے ماھی ءُ دومی ششمائی بے نام ءَ زانگ بنت گلھے پَسل سال ءَ کنگ بیت، مرچاں جائو ءَ سک دیمروی کرتگ نوں چہ دگہ جاھاں مردم پیداک اَنت، جائو ءَ روزگار ءِ ھاتر ءَ زمینداری کنگ ءَ اَنت جائو گوں کراچی ءِ منڈی ءَ ھمدپگ اِنت ھرچ پیمیں کشارے ءِ پَسل بہ بیت پہ وھد منڈی ءُ نیادی جاھاں پہ بھا کنگ ءِ واستا دیم دیگ بیت –

گریشگ ءُ نال ءِ سیمسر ھلاسی ءَ پد جائو ءِ سیمسر بندات بیت
َسکّڈ، مچی، راڈ، ترجی ءِ آپ پہ نال کور ءَ کایاں ھمے ھند جائو ءَ ھوار بنت، نال کور ءِ راستیں کشک ءَ جَکی ءُ دُمگ نامداریں کوہ اَنت دُمگ ءِ پُشت لٹ ءَ مشکے ءُ دیمی نیمگ ءَ جائو ءِ کوچگ ءُ میتگ اَنت،
آواران، جائو، مشکے ءُ کولواہ ءِ دلبند اَنت کولواہ آواران ءِ کوھنیں نام اِنت انچو کولواہ ءِ زرباری نیمگ ءَ سیمسرانی کوھانی پُشتی آپ پد ءَ کاینت گوں نال کور ءَ ھور بنت ـ

آواران ءُ کولواہ ءِ لھتیں ٹوھیں کور اَنت کہ آوانی آپ پد ءَ کاینت گوں نال کور ءَ ھور بنت مشکے کور ،دراسکی، مَکی، ھرکشک، کرپاسی ، سولیر، جالیر ءِ آپ گوں نال کور ءَ ھور بنت ءُ پارکنڈ ءِ بسول ءِ آپ پہ پسنی ءِ نیمگ ءَ روانت
اے لھتیں جاہ اَنت گوں جائو ءِ آپ تاچاں سیادی کن اَنت ـ
دومی کُنڈ نال، اورناچ، بیلہ ،لکسر گوگو ٹرانچ ءُ پد ءَ کاینت گوں سوڑ ءُ ھنگول ءَ ھور بنت، ھنگول نیشنل پارکے ءِ نام ءَ زانگ بیت اود ءَ دری مردم پہ سیل ءُ سواد ءَ کاینت ،ھنگول نیشنل پارک ءَ مدام اِستان ءِ داشتگیں میر ءُ سردار ءُ لشکر ءِ آپیسر پہ سیل ءُ سواد ءَ اَتکگ اَنت سید، آسک، سیسو گورداسک نال کور ءَ ماھی ءِ شکار کرتگ اِش بازیں نوکر، ھنگول نیشنل پارک ءِ داشتگین اَنت یک دگرے ھم ھمے نیمگ ءَ ٹھینگ ءُ بوتگ چہ لکسر ءُ گوگو ءَ گِش ایت دیم پہ ھنگول ءَ روت ھمے دگ ءِ میانجی ءَ درون ءُ دوینی کچھے ءِ کوہ اَنت پہ سید ءُ آسک ءَ نامان اَنت ھرکسی دل لوٹ ایت جائو ءِ ھمے نامداریں کوھاں وتی دست ءَ بیار اَنت ـ
رودَراتکی نیمگ ءَ سورگر مزن بندیں کوہ ءِ ڈولداری ءَ وتی بدل وت اِنت بہ گند ئے مدام سرسبز ءُ شادان اِنت گوں تچوکیں چمَگ ” انگور، انار انجیر، لیمبو ءُ مرچ، بٹاگ، سوپ، ھنیّ نامان اَنت ءُ دل پہ چارگ ءَ ئِے سیر نہ کنت، دُمگ ءِ کوہ 1973 ءِ بلوچ کومی جنگ ءِ بنجل بوتگ اَت ، شاشان ءِ کوہ بلوچ ءِ واب ءُ کسھانی تہ ءَ گوں اِنت ـ
یکے ءَ گوشت من یک آھوگے دیستگ پادے ماں درون ءَ دست ماں شاشان ءَ چارگ بوتگ ـ
دومی جاہ ءَ دگہ کسے ءَ واب ءَ دیستگ وتی مکھیں مات ءَ را شتگ ءُ جُست ئِےگپتگ
منی مھکیں مات دوشی من واب ءَ دیستگ واب ءِ مانا بُگش واب ءِ مانا بُگش ـ
مات ءَ جُست کرتگ ابا تئی واب چی اِنت ـ ـ ـ؟ بُگش ئِے ـ
بچ ءَ گوشت!!
اما “
من واب ءَ دیستگ منی پادے درون ءُ پادے ماں شاشان ءَ اِنت ـ
مات ءَ پسھے ءَ گْوشت منی چُک چُشیں واب ءَ مہ گند کہ تئی ھٹ بہ دِر اَنت چہ میان ءَ دو جاہ ءَ بہ بہ اَنت۔

دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت