کراچی اسٹاک ایکسچینج اُرش ءَ کار مرز بیتگیں گاڑی (اولاک) ءِ پَٹ ءُ پول راستیں واھند ءُ گاڑی ءُ نھاد پولکاری اپسرانی دیما اتکگ اَنت۔
اھوالانی ردءَ کراچی اسٹاک ایکسچینج ءِ سرا اُرش ءَ کارمرز بیتگیں گاڑی ءِ سرجمیں اھوال پَٹ ءُ پول کنوکیں واکداراں درگیتکگ اَنت۔
اھوالکار ءَ گوشتگ درستاں پیسر ہل پارک ءِ نزیک ءَ چہ پرائیوٹ کمپنی ءِ سی ای او ءَ بینک ءِ نیمگ ءَ چہ اے گاڑی رستگ کہ پدا اے گاڑی دگہ مردمی ءَ پہ گیپتگ ءُ پدا دگہ یک ماڑی پور ءَ نشتگیں کاروباری مردمے ءِ کرا بھا کنگ بیتگ ءُ کاروباری مردم ءَ لھتیں ماہ ءَ گاڑی کارمرز کُتگ ءُ پدا کھنیں سبزی منڈی ءَ شوروم ءَ بھا کُتگ۔
اھوالانی ردءَ چہ شوروم ءَ گاڑی اسٹاک ایکسچینج ءِ سرا اُرش ءَ ھواریں مردمے ءَ سینزدہ لکھ روپیہ ءَ گپتگ ۔
گاڑی ءِ درگت ءَ معلوم داری دیما آیگ ءَ پد پَٹ ءُ پولی واکداراں بیڑانی تھءَ گیشی آورتگ ءُ داں انگت چہ 10 ءَ گیشتر گمانی مردم پہ پَٹ ءُ پول ءِ ھاترءَ دزگیر کنگ بیتگ اَنت۔
دومی نیمگ سر بیتگیں ھالانی رد ءَ کراچی اسٹاک ایکسچینج ءِ سرا بیتگیں اُرش ءِ پُشدرءَ شھر ءَ ھشت حساسیں جاہاں سندھ پولیس ءِ ھاسیں پھازوکیں یونٹ ءِ کمانڈوز اوشتارینتگ بیتگ اَنت ۔
واکدارانی گوشتگ کہ اے ٹیم ھمک وڑیں جاورانی دیمپانی کنگ ءِ ھاترءَ ھاسیں سلاہاں چہ چکار ءُ زیت شھر ءِ کجام ھم ھند ءَ رسگ ءُ جوانیں اندازی ءَ کاروائی کنگ ءِ پوزیشن ءَ بنت۔
سندھ پولیس ءَ نوکتریں دابانی ھاسیں تربیت ءِ بن اِشت ایرکنوک ءُ اسپیشل سیکورٹی یونٹ ءِ مستر ڈی آئی جی مقصود میمن ءَ گوشتگ کہ گوستانک ءَ ایس ایس یو ءِ ھاسیں توپگ ءُ ٹیکٹیس ٹیم کراچی ءَ ھسن اسکوائر ءِ ایس ایس یو بنجاہ ءَ جاڑیگ بیتگ اَنت۔
ایس ڈبلیو اے ٹی کمانڈوز کجام ھم وڑیں جاورانی دیمپانی کنگ ءِ ھاترءَ مدام ساڑی بنت بلے کراچی ءَ بیتگیں ناشرکاری ءِ بے سوبیں کاروائی ءَ پد شھر ءِ تھءَ پھازگی کاراں دلجم کنگ ءِ ھاترءَ ایڈیشنل آئی جی کراچی غلام نبی میمن ءَ نوکتریں سلاہ جوانیں گامگیج زیروکیں ٹیماں بزاں ایس ڈبلیو اے ٹی کمانڈوزانی جاہاں ودینگے زلورت ءِ سرا زور داتگ۔
یات بہ بیت کہ اے نوکتریں گامگیجاں چہ پیسر 29 جون ءَ کراچی ءَ پاکستانی اسٹاک ایکسچینج ءِ سرا چار سلاہ بندیں مردماں اُرش کُتگ اَت کہ ایشی سوب ءَ یک پولیس کارمند ءُ اسٹاک ایکسچینج ءِ سئے پھازوک کُشگ بیتگ اَنت ءُ اُرش ءِ تھءَ ھواریں چاریں ارشکار ھم جنگ بیتگ اَنت۔
اے اُرش ءِ زمہ واری بلوچ سلاہ بندیں آجوئی دوستیں گل بلوچ لبریشن آرمی ءَ من اِتگ اَت۔ تنظیم ءِ جارکش جئیند بلوچ ءَ گوشتگ اَت کہ بلوچ لبریشن آرمی ءِ مجید برگیڈ ءِ فدائیں سنگتاں ارُش کُتگ۔