جتائیں وھیلاں 9 مردم بیران، 6 زدگ

جتائیں وھیلاں 9 مردم بیران، 6 زدگ

دی بلوچستان پوسٹ

سر بیتگیں ھالانی رد ءَ پنجگور ءِ دمگ کاٹاگری ءَ سی پیک دگ ءِ سر ءَ گاڑی ءِ کلٹی بیگ ءَ چَہ چکے ءَ ھوار دو مردم بیران ءَ پنچ زدگ بیتگ اَنت –

لیویز بنشون ءِ شنگ کرتگیں ھالانی رد ءَ پنجگور ءِ دمگ کاٹاگری ءَ یک پیک اپ گاڑی سی پیک دگ ءِ سر ءَ روگ ءَ بیتگ کہ ناگتی کلٹی بیتگ ءُ چریشی ءَ چَہ یک چُکے ءَ ھوار دو مردم بیران بیتگ ءُ پنچ زدگ بیتگ اَنت –

لیویز بنشون ءَ گْوشت کہ کزا پد لاش ءُ زدگ بیتگیں مردم چِست کنگ بیتگ ءُ سرکاری نادراہ جاہ ءَ سر کنگ بیتگ اَنت –

ھمے وڑ ءَ تربت گوکدان ءَ بجلی ءِ کنکشن کنگ ءِ وھد ءَ یک ورنایے لین ءَ گپتگ ءُ سوتکگ –

دمگی مردمانی رد ءَ سوتکگیں ورنایے پجار واھد بکش واد ءِ نام ءَ زانگ بیتگ –

آیاں گوشت کہ واھد بکش واد بجلی ءَ کنکشن کنگ ءَ بیتگ ءُ اناگت ءَ لین ءَ گپتگ ءُ آئی ءِ جان ءِ گیشتریں بھر سُتکگ ءُ پیلوشتگ اَنت ءُ آ گوں سُتکگیں جاوراں نادراہ جاہ ءَ سر کنگ بیتگ –

ھمے وڑ ءَ بلوچستان ءِ سیمسری دمگ چمن ءَ تالاب ءَ زھری گیس ءِ پُر بوھگ ءَ ھپت مردم بیران بیتگ –

پولیس ءِ رد ءَ وھیل بلوچستان ءِ سیمسری شھر چمن ءَ ٹرنچ دگ ءَ یک ھول سیل دکانے ءَ پیش اتکگ، تالاب ءَ یک چُکے ءِ رکینگ ءَ درستیں مردم بیران بیتگ اَنت –

بیران بیتگیں مردمانی لاش سیول نادراہ جاہ ءَ برگ بیتگ اَنت اود ءَ اژدری چار ءُ ٹپاس ءَ پد لاش کھولانی گور ءَ رسینگ بیتگ اَنت وھیل ءِ بارو ءَ گیشیں پٹ ءُ پول برجاہ اِنت –

ھمے وڑ ءَ بلوچستان ءَ چاگردی باسک نجیب یوسف زھری ءَ شنگ کرتگیں وتی بیان ءِ تہ ءَ گْوشتگ کہ جون ءِ ماہ ءَ بلوچستان ءَ 949 دگی وھیل بیتگ ءُ چریشی ءَ چہ 109 مردم بیران ءُ 1433 زدگ بیتگ اَنت کہ اشانی تہ ءَ ھپت جنین ءُ چار زھگ ھم ھوار اِنت –

چاگردی باسک ءَ گوشت کہ گوستگیں دو ماھانی وھیلاں ھما وھیل ھوار بیتگ اَنت کہ بس مردمانی زندمان شتگ اَنت –