کیمرہ ءِ چماں چہ دور
ٹی بی پی شونگال
بلوچ نودربر گوستگیں دوھپتگاں چہ گیش بلوچستان ءَ آنلائن کلاسانی ھاتر ءَ انٹرنیٹ نہ بیگ ءِ بگیری ءَ زھرشانی کنگ ءَ اَنت۔ اولی زھرشانی بنجل سندھ ءِ مزن شھر کراچی ءَ جنگ بیتگ اَت ءُ پد ءَ کم کم ءَ اے یکشلی ءَ سرجمیں بلوچستان ءَ سربیتگ ءُ نودربراں انٹرنیٹ ءُ دگہ آسراتیانی لوٹ کنگ ءِ جھد گیشتر بیان بیت اَنت ۔
بیست ءُ چار جون ءَ جتائیں نودربرانی گلاں وتی زھرشانی بنجلاں چہ دیم پہ بلوچستان ءِ مزن آمید گِس ءِ نیمگ ءَ روگ ءَ بیتگ اَنت دانکہ اود ءَ یک زھرشانی ءِ کنگ بہ بیت بلے آیانی واھگانی ھلاپ ءَ پولیس ءِ نیمگ ءَ ترندیں رویش ءُ کم شرپی ءِ دیمپانی کنگ اِش کپتگ اَت۔ درزنانی کساس ءَ بچک ءُ جنکیں نودربراں دگانی سر ءَ لٹ دیگ ءُ چِکان پولیس ءِ اولاک ءَ پُر کنگ ءُ زندان ءَ برگ بیتگ اَنت۔ ءُ اے درست کیمرہ ءِ چمانی دیم ءَ بیگ ءَ بیتگ اَنت۔
چاران چاران ءَ پہ ترندیں لٹ شاپیانی تامر انٹرنیٹ ءَ ھمے کچ ءَ شنگ بیتگ اَنت کہ ٹوئٹر ءِ سر ءَ درستاں برُز ٹرینڈ کنان ءَ نودربرانی یل کنگ ءِ لوٹ کنگ بیتگ ءُ اے ٹرینڈ ءَ نہ تھنا دمگی سیاست دانانی دلگوش رس اِتگ بلکیں میان اُستمانی انسانی ھکانی گلاں ھم پولیس ءِ زوراکی ایر جتگ ءُ نودربرانی یل کنگ ءِ لوٹ کُتگ۔
لوٹانی ترندی ودان ھمینچکا کہ سربیتگ کہ مزن وزیر جام کمال ءَ اے گپ ھم من اِتگ کہ دزگیری ءِ پرمان نامگ پرگینگی سرکار ءَ نہ داتگ ( چہ دگہ جاھاں اَتکگ)۔
ھیر، اے سرجمیں جاورھال ءَ بازیں جُست ودی کُتگ اَنت۔ بلوچستان ءِ پولیس ءں واکدار پرگینگی سرکار ءِ دست ءَ اَنت یا آیاں ھم چہ دگہ تاگتانی نیمگ ءَ پرمان نامگ دیگ بنت؟ اگاں پولیس ءِ واکدار، کہ فرنٹئیر کور ءِ وڑ ءَ” بنّام “ نام ءُ دپ ھم نہ اِنت، وتی بے رھمیں لٹ شاپیاں کارمرز کن اَنت، سرزائری ءَ کیمرہ ءِ دیما چُش بے رھمی ءَ گوں نودربرانی سر ءَ تاگت کنگ ءَ ھچ تُشیں ھم چَک ءُ پد نہ بیت گُڑا بلوچستان ءِ ھما ھند ءُ دمگاں چی بیگ ءَ اِنت؟ ، کہ دیر دیر اَنت ءُ اود ءَ کیمرہ ءِ چم ھم کدی رَس اِت نہ کنت؟
بوت کنت اے جُستانی پسہ دو ھزار ءُ دہ ءَ پاکستان ءِ نامی ئیں روتاک ڈان نیوز ءِ یک ندارگ کشوکیں لبزے ءِ تھ ءَ چیر اَنت، کہ بلوچستان ءِ شھر ھزدار ءَ ”دھشت“ تُرس پیداک کنوکیں یک وھیلے ءِ اکس کشی کنگ بیتگ اَت۔ سال دو ھزار ءُ دہ ءَ بلوچ نودربراں ڈگری کالج ھزدار چہ ءَ ھمے وڑ یک پُر ایمنیں روانکے ءِ کشگ ءِ جھد کنگ ءَ اِت اَنت کہ فرنٹیر کور (ایف سی) ءِ کارمنداں نودربرانی سر ءَ تیر گواری کنان ءَ، دو ورنا صدام ءُ علی دوست نمیران کُت اَنت ءُ دگہ چار نودربر ٹپی کُت اَنت کہ ایشانی تھ ءَ لیاقت علی نامیں مردے کہ بلوچستان انجینئیرنگ مزن شھدربرجاہ ءِ نودربر ھم ھوار اَت، کہ داں روچ مروچی چہ یک پادی ءَ زبھر اِنت۔
اے بلوچستان ءَ کیمرہ ءِ باپشت ءَ بیتگیں ھزاراں وھیلاں چہ بس یکے کہ ایشی ءَ یک پاکستانی روتاکے ءَ جاہ رس اِتگ، گیشتریں وھیل بے سمائی ءَ زوراکی ءِ نا ھچ نہ کُتگیں کسہ جوڑ بیتگ ءُ گوست ءِ بھر جوڑ بیتگ اَنت۔ اے وھیل نہ تھنا مزن وزیر جام کمال ءِ اجکہ بیگ ءِ پسہ اِنت کہ دزگیری ءِ پرمان اگاں آئی ءِ نیمگ ءَ نیتکگ گُڑا چہ کج ءَ اتکگ؟ ءُ اے وھیل اے گپ ءِ ھم پدراھی ءَ ھم کنت کہ بیست ءُ یکمی کرن ءَ ھم بلوچستان ءَ چہ انٹرنیٹ پرچہ زبھر کنگ بیتگ ؟
بلوچستان ءَ پوجی اسٹبلشمنٹ اے لیکہ ءَ اوشتاتگ کہ بلوچستان ءَ ھرچ کارے کہ بیگ ءَ اِنت اِشی ءِ تِرْک ءُ تواراں ڈن ءَ کس سرپد مہ بیت ۔