آواران ءُ تمپ ءَ پوجی آپریشن

آواران ءُ تمپ ءَ پوجی آپریشن

دی بلوچستان پوسٹ

گوستگیں ھپتگے ءَ چَہ تمپ ءِ جتائیں جاھاں پوجی آپریشن یکشل ءَ برجاہ اَنت-

سر بیتگیں ھالانی رد ءَ آواران ےِ دمگ پیراندر، منگولی، مولاء، پسیل کندھار ءِ کوھی دمگاں پاکستانی پوج ءِ بمبگواریں بالگردانی تیرگواری برجاہ اِنت –

ھالانء تہ ءَ گْوشگ بیتگ کہ کوھی دمگاں بازیں کچے ءَ مھلوک ھم جھمنندی اَنت –

ھمے وڑ ءَ تمپ ءِ دمگ پُل آباد ءُ کوھاڈ ءَ ھم پاکستانی پوج ءَ بیڑ برتگ ءُ آپریشن بندات کرتگ –

دمگی مردمانی رد ءَ پوج میتگانی تہ ءَ مانریتکگ ءُ لوگ لوگ ءَ پَٹ ءُ ھنڈ کنان بیتگ –

زانگ بہ بیت گوستگیں روچ ءَ ھم پاکستانی پوج ءَ تمپ کُنشکلات ءَ آپریشن کرتگ ءُ بازیں مھلوکے گپتگ ءُ برتگ، آوار جنگ بیتگیں مردمانی تہ ءَ گیشتریں مردم یلہ کنگ بیتگ ءُ چار مردم انگت ءَ بندیگ اِنت –

دمگی مردمانی رد ءَ گوستگیں چار روچ ءَ پیسر پوج ءِ دست ءَ آوار جنگ ءَ پد یلہ بیتگیں ستار الاھی بکش ءِ مازگی جاور نگیگ بیتگ ءُ کھول ءِ مردماں پہ دراھی ءَ کراچی ءَ برتگ –

زانگ بہ بیت ھمے زوتاں مند ءَ پوج ءِ دست ءَ آوار جنگ بیتگیں جاود ء گوھرام پوج ءِ بازیں لَٹ ءُ کُٹاں بیران بیتگ اَت –

بلوچستان ءِ جتائیں جاھاں پوجی آپریشن برجاہ اَنت ءُ دومی نیمگ ءَ شال ءَ بیگواھیں بلوچانی واستا توار چِست کنوکیں گل وائس فار بلوچ مسنگ پرسنز ءِ رد ءَ بلوچستان ءَ پنجاہ ءُ چار ھزار ءَ گیش مردم پوج ءُ چیریں ادارھاں گپتگ ءُ گار کرتگ اَنت –