آزمانک:سیاھیں پوشاک
نِبشتہ کار: سِراج ساگر
دی بلوچستان پوسٹ
آئی ءَ را سَیاھیں پوشاک سک دوست بیت، همے کہ سک گَل بیت سیاھیں پوشاک گور ءَ کنت بازیں مردم ءَآئی ءَرا همے گوشتگ کِہ سیاھِیں پوشاک مونجائی ءُ جنوزامی ءِ نشان انِت. بَلے آئی ءَ کسی گپ گْوش نہ داشتگ تهنا ٹهک داتگ ءُ کندگ ِاتگ ئِے چندے وھد اِنت آ نوں سَیاھیں پوشاک گْور ءَ کنگ ءَ نہ اِنت. هر روچ سهب ءِ سر ءَ لوگ ءِ دپ ءَ نند اِیت زهیروک جنت ءُ پد ءَ همے دمان ءَ گُشان ءَ وتی چماں بَند اِیت وتی مات ءَ را گُوش اِیت،اما.. اما من آدینکے بوَگ لوٹاں تو من ءَ روچے مهمد پیر ءِ سر ءَ بِہ بر من هیرات کناں ءُ پہ وت ءَ دوا لوٹاں بلُک نوری گوشیت هر کس اُود ءَ چونیں دوا بِہ لوٹ ایت، کبول بنت. آئی ءِ مات ءَ هچ نہ گُشت ، بس جیڑ اِت جنک نوں پهک گنوک انِت.
میتگ ءَ هر کس ھیران اَت کہ آر ءَ چے بوتگ کہ چو شیپتال اِنت بے سریں گپ جنت مرچی هپتگے ءَ چَہ گیش اِنت آ ئی ءَ را سُهریں پوشاک گور ءَ انِت، وت ءَ را سک شوک کُرتگ ئِے ھنی ئِیں دست سک جلواہ دیگ ءَ اِنت ءُ لنکُک چہ مُندریک ءَ پُر اِنت لُنٹانی تازگی اوں گیش انِت کہ پیسر ءَ سک ھُشک بوتگ اَنت. ھر کس ءَ را کہ گند ایت بس همے گُوشیت من آدینکے بوگ لوٹ آں.
زی بیگاه ءَ گوں دزگْوهارے ءَ نِشتگ اَت چلیم کَشگ ءَ اَت . من ءَ دیست ئِے توار ئِے کُرت من آدینکے بوگ لوٹاں هردیں آدینکے بوتاں گُڑا من ءَ وتی لوگ ءِ هما جاہ ءَ بِٹنگ اودءَ دگہ کس مہ روت همے آدینک ءَ وت ءَ مہ چار ایت تو ھردیں وت ءَ همے آدینک ءَ چار ئے من ترا سک جلواہ پیش داراں.
من ھاموش اَتاں بس کمو کند اِت ، اے کندگ آئی ءَ را وَش نہ بوت، وتی دیم آ نیمگ ءَ کُرت ءُ گشت ئِے اِد ءَ شما درست یک وڑ ءَ ات وتی چم جهل کرت اَنت کہ من آئی چمانی تہ ءَ بے کساسیں رنگے دیست گُش ئے زاناں جنگلے آئی چمانی تہ ءَ رُدان اِنت من ءَ تُرسے دل ءَ کپت من جُست کُرت گند ئے مرچاں تو سک گمیگ ئے؟
گُشت ئِے سک دیر اِنت من وت ءَ را نہ دیستگ، پہ وت ءَ سک زھیر کرتگ همے گپ ءَ گوں پاد اتک کاگدے من ءَ دات ئِے. وھدے لوگ ءَ رو ئے گُڑا بوان ئِے. من اشتاپ اشتاپ لوگ ءَ شُتاں کاگد پچ کرت کہ سرجم ءَ ھالیگ اَت بس گُڈ سر ءَ همے نبشتہ اَت من آدینکے بوگ لوٹ آں.
اے چار لبزاں گش ئے جادوے مان اَت.
منی دل ءَ بے تاھیری یے نِنداں بوت من لوگ ءَ چہ در کپتاں کوهانی نیمگ ءَ سر گپتان ءُ دل ءَ وت نزاناں پرچا زاہ دیگ بنا کرت. بازیں ساهتے ءَ پد واتر لوگ ءَ کہ اتکاں گنداں لوگ ءِ دپ ءَ مزنیں مچی یے ءُ مات کُنجے ءَ نِشتگ گریوگ ءَ اِنت، هما بینگ من وتی گُشان ءِ پلو ءَ کہ داشتگ اَت همائی ءِ تیوگیں مگسک شھر ءَ شتگ اَنت انگت واتر نتاتکگ اَنت.
مات ءَ من ءَ دیست امباز ئِے کُرت زار جَت
من مات ءَ را دست ءَ گپت آئی ءِ لوگ ءِ نیمگ ءَ رواں بوتاں تاں گنداں تیوگیں مگسک راہ ءِ سر ءَ کپتگ اَنت آهانی کر ءَ هما کاگد ایر انت کہ نبشتہ اَت من آدینکے بوگ لوٹ آں.
من تَنیگہ مگسکانی چارگ ءَ اَتاں گِنداں منی لوگ ءِ آدینک مُرگے ءِ دپ ءَ اِنت، ءُ مُرگ دیم پہ کَبرستان ءَ راہ کپتگ ءُ مات مَگسکاں چِنگ ءُ وتی گُشان ءَ بَندان اِنت.
دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت