ھزدار ءُ کیچ ءَ سَے مردم بیگواہ

بلوچستان ءِ جتائیں جاھاں ریاستی ڈیتھ اسکواڈاں ھزاراں بلوچ آوار جتگ ءُ بیگواہ کرتگ –

سر بیتگیں ھالانی رد ءَ ھزدار ءِ دمگ گریشہ ءِ ھند کوچو ءَ گوستگیں روچ ءَ پاکستانی لشکر ءَ یک لوگے ءَ بیڑ برتگ ءُ دو برات آوار جتگ ءُ بیگواہ کرتگ اَنت –

آوار جنگ بیتگیں براتانی پجار دارو ء شیر مھمد ءُ گورھان ء شیر مھمد ءِ ناماں زانگ بیتگ اَنت –

آوار جنگ بیتگیں مردم لشکری بنجل ءَ برگ بیتگ اَنت اود ءَ گورھان یلہ کنگ بیتگ ءُ دومی برات انگت ءَ بیگواہ اِنت –

ھمے وڑ ءَ سَے روچ ءَ پیسر تربت ءِ دمگ پیدارک ءَ ناشناسیں سلاہ بندیں مردماں وکار ء ھاشم دکان ءَ چَہ آوار جتگ ءُ برتگ –

دومی نیمگ ءَ دشت ءَ رؤکیں ابدلکدوس نامیں ورنایے ناشناسیں سلاہ بندیں مردمانی دست ءَ آوار جنگ بیتگ –

بیگواھیں مردم ءِ کھول ءِ گوشگ اِنت کہ ابدلکدوس یک ھپتگے ءَ پیسر تربت ءَ چَہ دشت ءَ روگ ءَ بیتگ کہ سلاہ بندیں مردماں آوار جتگ ءُ برتگ –

زانگ بہ بیت بلوچستان ءَ بیگواھیانی وھیل روچ پہ روچ گیش بیان اَنت ءُ کہ اشانی تہ ءَ ریاستی چیریں ادارہ ءُ آیانی جوڑ کرتگیں ڈیتھ اسکواڈ ءِ ناماں گرگ ءَ اَنت –

دومی نیمگ ءَ شال ءَ برجاھیں بیگواھیں بلوچانی واستا توار چِست کنوکیں گل وائس پار بلوچ مسنگ پرسنز ءِ رد ءَ بلوچستان ءَ تنی وھدی پنجاہ ءُ چار ھزار مردم گار ءُ بیگواہ اِنت –