زانت ءِ چمَگ – ماھل برمش بلوچ

نبشتانک: ‏زانت ءِ چمَگ

نبشتہ کار:ماهل برمش بلوچ

دی بلوچستان پوسٹ

هُمک چاگرد ءِ دیمروی ءُ گھبودی ءِ هاتر ءَ وانگ ءُ زانگ اژدری انت. همے وڑ ءَ بلوچ راج ءِ دیمروی ءَ پہ بلوچ چاگرد ءِ تہ ءَ زانت ءُ زانشت ءِ چراگ بالینگ اژدری انت،وانگ ءُ زانگ ءِ واستا یک جوانیں رهشون ءُ رهبرے ءِ کرد چاگرد ءِ تہ ءَ سک باز ارزشت دار ایت.
مروچی من یک انچیں ھستی یے ءِ بابت ءَ گپ جَنَگ لوٹاں کہ اے ھستی ءَ بلوچ چاگرد ءِ گھبودی ءُ دیمروی ءِ هاتر ءَ وتی روچ شَپ بَبا داتگ اَنت ، وتی ساه ءُ سر اوں ندر کت انت. بلے بلوچ ءِ زندمان ءِ تھاریں روچانی تہ ءَ زانت ءِ چراگ بالینتگ ءُ زانشت ءُ زانت ءِ نہ اوشتوکیں چَمگ ءِ پشت گیتکگ کہ داں ابَد انچو یکشل ءَ اے چمگ روان کنت.
من ءَ اے گپ هجبر باور نہ بیت کہ بلوچی زبان زانت کوّاس ءَ شہ زانتیں شهید واجہ زاهد آسکانی ءَ اے کازماس یلہ کتگ ءُ اچ ما جسمانی دروشُم ءَ گِستا بیتگ.
واجہ مئے رهشون ءُ وانگجاه ءِ بُن هشت ایر کنوک بوتگ. واجہ ءَ مئے چاگرد ءِ چُکانی وانگ ءُ زانگ ءِ واستا روچ شَپ جھد کتگ،دائم وتی راج ءِ بزگی ءُ تکانسُری ءِ وهد ءَ چو کوه ءَ مِک بوتگ.
واجہ چو کندیلے ءَ مئے چاگرد ءَ روک بوتگ ءُ وتی زانت ءِ رُژن تالان کُتگ.
من ءَ انگت یات انت کہ واجہ ءَ مارا دائم همیں سُوج داتگ کہ بوان اِت چی ءَ کہ شُما مئے راج ءِ رُژنائیں باندات اِت.
مروچی واجہ ءِ جُھد ءِ برورد انت کہ مئے چاگرد ءِ باز نودربر ڈن ءُ درملکاں پہ گیشیں وانگ ءِ هاتر ءَ شُتگ انت.

اے پہ بلوچ راج ءِ آیوکیں باندات ءَ جوانیں مِستاگے. واجہ شهید زاھد آسکانی ءِ زند ءِ یکیں مول ءُ واهگ بوتگ کہ بلوچ راج دائم گوں زانت ءُ زانشت ءِ رُژن ءَ گوں همگرنچ بہ بیت ءُ وتی چاگرد ءِ دیمروی ءُ گھبودی ءَ جوانیں کردے پیلو بکن انت. واجہ ءَ پہ بلوچ راج ءُ مئے چاگرد ءِ دیمروی ءَ پہ جیڑ اِتگ. ما واجہ ءِ کتگیں جُھداں هجبر پراموش کُت نکن ایں ءُ مئے زمہ واری انت کہ ما واجہ ءِ گیچین کُتگیں کِشک ءَ بہ جُنزیں ءُ آئی ءِ دیستگیں واب ءَ سرجم بکنیں.
من پهر بنداں وتی سر ءَ کہ من واجہ شهید زاهد آسکانی ءِ نودربر بوتگ آں، من شهید ءَ سُهریں دروت ندر کناں کہ واجہ ءَ منی وڑیں نابودے ءَ انچو زانت بکشیتگ ءُ یک شریں انسانے جوڑ بوَگ ءِ کِشک پیشداشت.
اے گپ راست انت کہ شهید هجبر نہ مِر اَنت شهید ابدمان بنت شهید نمیران بنت. داں بلوچ ءُ بلوچ ءِ راجدپتر ھست شهید ھست انت ءُ مئے دلانی تہ ءَ زندگ اِنت.

شهید واجہ زاهد آسکانی تو زندگ ئے تو ابدمان ئے.
تئی ارواه آسودگ بات … آمین

دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔