تمپ ءَ زالبول ءِ کوش ءِ ھلاپ ءَ زھرشانی

تمپ ءَ زالبول ءِ کوش ءِ ھلاپ ءَ زھرشانی

دی بلوچستان پوسٹ

سر بیتگیں ھالانی رد ءَ کیچ ءِ ھنکین تمپ ءِ ھند دازن ءَ زالبول ءِ کوش ءِ ھلاپ ءَ روانک ءِ دراتکگ دیم پہ تمپ ءَ جنزان بیتگ –

دی بلوچستان پوست ءَ سر بیتگیں ھالانی رد ءَ روانک دازن ءَ دراتکگ ءُ تمپ ءِ ھنکین ءَ بازیں مُچے ءِ ھواری ءَ سر بیتگ –

زھرشانی ءَ ھواریں مردمانی لوٹ اِیت کہ گوستگیں روچ ءَ تمپ ءِ دمگ دازن ءَ کُشتگیں زالبول ءِ کُشندہ گرگ بہ بنت –

زھرشانی کنوکانی گوشگ اِنت کہ اگاں کُشندہ گرگ نہ بیت اَنت گڑا ما وتی روانکی زھرشانی ءَ گیشتر کن ایں ءُ کیچ ءِ بنجاھی شھر تربت ءَ داں روانکے کَش ایں –

ھمے وڑ ءَ گوستگیں روچ ءَ چاگردی رسانکجاھاں شنگ بیتگیں تامراں کُشتگیں زالبول ءِ کُشندھانی لوٹ کنگ بیتگ ءُ دمگی مردماں اے گپ پدر کرتگ کہ اگاں پولیس ءُ دگہ پھزداراں مئے زالبول ءِ کُشندہ دزگیر نہ کت اَنت گڑا آ وتی کارگساں چِست بہ کنت مئے ھند ءُ دمگاں –

زانگ بہ بیت پروندوشگیں شپ ءَ تمپ ءِ دمگ دازن ءَ نبی بکش ءِ لوگ ءَ دُزاں دور کرتگ ءُ آئی ءِ لوگبانک گلسوم ءِ گُٹ کارچ ءِ سر ءَ آئی ءِ چُکانی دیم ءَ بُریتگ ءُ آئی ءِ گوشانی بِیست سھر ءُ دگہ گرانھادیں مڈی دزیتگ ءُ برتگ اَنت –

دمگی مردم ءُ چاگردی رسانکجاھاں دُزانی سیادی سرکاری چیریں ادارھانی جوڑ کرتگیں کشندہ ٹولی ڈیتھ اسکواڈ ءَ کنگ ءَ اَنت –

زانگ بہ بیت چِد ءُ پیسر تربت ڈنک ءَ ھم یک زالبولے کُشگ ءُ آئی ءِ کسان سالیں چُک برمش زدگ کنگ بیتگ اَت –

چریشانی بگیری ءَ بلوچستان ءَ ھوار درملکاں نندوکیں بلوچانی نیمگ ءَ ویلانی ھلاپ ءَ زھرشانی ءُ چاگردی رسانکجاھاں جِسٹس پور برمش ءِ نام ءَ ھیش ٹیگ کامرد بیگ ءَ اِنت –