تمپ ءَ دُزی ءِ وھد ءَ بلوچ زالبولے کُشگ بیتگ
دی بلوچستان پوسٹ
بلوچستان ءِ دمگ کیچ ءِ ھند تمپ ءَ لوگے ءَ دُزاں دُزی ءِ وھد ءَ زالبولے کُشتگ –
دمگی مردمانی رد ءَ ناشناسیں دُزاں گوستگیں شپ ءَ یک لوگے ءَ دور کرتگ ءُ اود ءَ گرانھادیں سامان برتگ اَنت ءُ گلسوم نامے زالبولے دُزی ءِ وھد ءَ آئی ءِ گُٹ کارچ ءِ سر ءَ بُریتگ ءُ کُشتگ –
زانگ بہ بیت گوستگیں روچاں ھمے وڑیں یک ویلے تربت ڈنک ءَ پیش اتکگ اَت کہ اود ءَ ملکناز نامے زالبولے جنگ بیتگ اَت ءُ آئی ءِ زھگ برمش زدگ بیتگ اَت –
ڈنک ویل ءِ ھلاپ ءَ بلوچستان ءَ ھوار دراں ڈیھاں زھرشانیانی درچ برجاہ اِنت –
بلوچ سیاسی ءُ چاگردی تکانی رد ءَ دُزی، منشیات ءِ بھا کنگ ءُ دگہ چاگردی سلکاریاں ھواریں مردمانی سیادی ریاستی پُشت ءُ پناھی ءَ جوڑ بیتگیں ڈیتھ اسکواڈ ءَ اِنت –
مروچی تمپ ءَ پیش اتکگیں ویل ءِ گڈی ھالانی تہ ءَ ھچ وڑیں دزگیری نہ بیتگ – ھمے وڑ ءَ تمپ ءَ بیتگیں ویل ءِ ھلاپ ءَ سیول سوسائٹی ءُ تاجراں ھرتال ءِ جار پرینتگ –