نبشتانک: پیرو اے رندی مات ءَ تئی جُست نکُت
نبشتہ کار:کوہ سر پرومی
دی بلوچستان پوسٹ
بیگاہ ءِ وھد اَت کہ من وتی لوگانی دیمی نیمگ ءَ مچکدگ ءَ نشتگ اِتاں جمبر سیاہ ءُ تھار اَت دور گرند ءُ گروک ءَ اَت بلے ترمپاں انگت زمین ءِ دلبند ءَ ایر نداتگ ات۔۔۔۔۔۔۔۔۔۔
من ءَ کتابے دیم ءَ اَت ءُ پسٹل ئے گاب زُرتگ اَت ءُ زانوبندے بستگ اَت چہ دور سیاہ ءُ تھاریں گواتے چِست اَت اے گوات سیاہ ءُ تھار اَت بلے سرے آزمان ءَ ءُ سرے زمین ءَ۔۔۔۔۔۔۔۔۔۔۔
من گوں کتاب ءَ دلگوش اِتاں کہ منی پُشتی نیمگ ءَ پاد برمشے ءِ توار منی گوشاں کپگ اِتاں من وتی چَک ترینت ءُ چار اِت وش رنگے ءُ کد ءُ بالاد ءَ بُرزیں مردمے چہ دور منی نیمگ ءَ ملان ءَ پیداک اِنت مرد کہ وھدے نزیک بوان بوت گُڑا من ءَ گُمان بوت کہ اے مرد من جاگھے ءَ دیستگ ھمے سما بوگ ءَ اِنت کہ اے مرد ءِ ملگّاں من پجا کاراں وھدے کہ مرد نزیک ءَ سر بوت من وانگ بوتاں من پادتک ءُ اوشتاتاں وتی دست ءِ کتاب چگل دات ءُ آؤوکیں مرد ءِ نیمگ ءَ تچان بوت آں وھدے نزیک ءَ سر بوتاں امباز کُرت ءُ من گُشت پیرو تو چہ کجا۔۔۔۔۔۔۔۔۔۔۔۔۔؟
پیرک ءَ بلاھیں گینسارتے کش اِت ءُ گُشت ئِے ھو من چہ آزمان ءَ۔۔۔۔۔۔۔۔۔۔۔۔
چوناھا من ءَ دیر اِنت ارادہ کرتگ شُمے سنگتانی چارگ ءَ بیاھاں بلے بازیں دستگٹی بیتگ کہ من ءَ موہ نہ رس اِتگ کہ شُمے گندوک ءَ بیاھاں سنگتانی روگ ءُ آھگ بیتگ من گڑا سنگتاں گُشت من ءَ زھیر کنت پہ لھتیں سنگتاں من شمار ءَ چے کمو رزا لوٹاں کہ رواں یک ءُ دو سنگت ءَ گنداں۔۔۔۔۔۔۔۔۔۔۔۔
پیرو آ ھبراں یلہ کن تو ھر وھد ءَ گلگ ءُ گواھی کن ئے سنگتانی ھالاں بدے چون اِت اَنت۔۔۔۔۔۔۔۔۔۔؟
وشاں من گوں دراھیں سنگتاں ھوار بیتگاں ءُ من چیسو ءَ گشت بیا رویں بلے نیتک گوں گُشت ئِے اگاں من بیاھاں منی چُک شاھسوار سرپد بیت کہ منی پت چیسل اتکگ پدا مُدام کیت ءُ ھما جاہ ءَ نندیت پہ من ودار کنت۔۔۔۔۔۔۔۔۔۔۔۔۔سگریٹ گون ٹالے کشارین
من چہ جیب ءَ ٹریڈیشن ءِ پاکٹ در کُت ءُ دات گوں باکس ءَ ھور
گوات سک کشگ اَت پیرک ءَ دو ٹال جت ءُ بلےدوئیں ٹال گوات ءَ کُشت اَنت سگریٹ روک نبوت من ءَ روک روک ءَ چارگ ءَ لگ اِت گُشت ئِے گریب ءِ چُک لیٹرے بزیر
من گُشت باکس ءِ آس وشتر اِنت پہ سگریٹ ءَ، سیمی ٹال ئِے زرت ءُ سگریٹ ئِے روک کُت ءُ ھچ ئِے نہ گُشت بس سگریٹ ءِ دوتاں چارگ ءَ اَت نزاناں چے جیڑگ ءَ اَت پہ سمل زھیر ءِ کنگ اَت یا کہ مکھیں مات مھناز ءِ اوماناں زرتگ اَت من گُشت پیرو تو وانگ ئِے ھِچ نہ گُش ئے چے بوتگ ترا پُلو۔۔۔۔۔۔۔۔؟
سگریٹ ئِے دپ ءَ کُت ءُ بلاھیں سوٹے دات ئِے دیتانی دراھگ ءَ پیسر گُشت ئِے تو سمُّل دیستگ چون انت منی روگ ءَ پد نہ وشیّ کنت ءُ شپانی پاساں پاد کیت ءُ گریت ابا ابا کنت۔۔۔۔۔۔۔۔۔۔؟
من گُشت پیرک جان سمُّل ٹیٹ اِنت تئی روگ ءَ پد من شُتاں دیست من ءَ جُست ئِے کت منی ابا ءَ پون نہ کرتگ تو ندیستگ؟
من گُشت سمُّل جان من ءُ تئی ابا یکجاہ بوتگ ایں گُڑا اتک ءُ منی کُٹّ ءَ نِشت گُشت ئِے منی ابا کدین کیت پمن چے کاریت گوں؟
من گُشت سمُّل جان تئی ابا دو رندا اھتگ تو واب بوتگ ئے پد ءَ شُتگ۔۔۔۔۔۔۔۔۔
سمُّل جان گُشت ابا منی چیزُک نیاؤرتگ اَنت گوں گڑا منی مات ءَ من ءَ ھال نداتگ اکس ءِ پیش بدار منی ابا ءِ۔۔۔۔۔۔۔۔۔
پیرو ترا یاد اِنت ھما رند ءَ کہ ما سپرے ءَ روگا اِتیں تو ءُ چیسو،سمیر،جلال،مراد گوں من دُچار کپت ات من ءُ تو اکسے کش اِت بلے تئی مود ءُ ریش مزن اِت اَنت تو دنز ءَ بیکار ات ئے من ھمے اکس سمُّل ءَ پیش داشت
سمل گُشت منی ابا کمانڈرے۔۔۔۔۔۔۔۔۔۔
پیرو من ءَ ارساں بے وار کُرتگ اَت بلے من زور وت ءَ را کندینت ءُ گُشت ھو تئی پت پہ جوریں دُژمناں یک مُھکمیں کوھے ءُ گُلزمین ءِ نہ تُرسیں میجرے۔۔۔۔۔
منی گپ سرجم نہ اَت پیرو ءَ گُشت مھناز چونیں دیستگ تو؟
من گُشت مھناز پیسری مھناز نہ اِنت تئی روگ ءَ پد گیشتر مُھکم اِنت مُدام کہ تو کوہ ءَ بوتگ ئے وھدے نیٹورک ءَ نیاتکگ ئے دیر ءَ گُڑا مات مھناز مدام اتکگ ءُ منی کر ءَ جُست کُتگ کہ بے ماتیں پیر جان ءِ ھالاں دے اے رندی دیر ئِے کرتگ نیٹورک ءَ ھم نہ انت تئی گوما ھال ئِے نہ کتگ پیرو تئی ھما راہ داتگیں وائس من گوشدارینتگ اَنت تئی مات ءَ.
یک شپے تو نیٹورک ءَ اتکگ اِت ئے گُڑا تو منی سر ءَ وائسے راہ داتگ ات تو گُشت مات ءَ واٹسپے نیست مُدام کہ مات تئی کر ءَ کیت منی جُست ءَ گُڑا ھمے وائس ءَ گوشدارین بلّے مات ءِ دل وش بیت پیرو زندگ اِنت.
لھتیں روچ ءَ پیسر من چہ وتی لوگ ءَ درتک آں ءُ سنگتے ءِ کر ءَ روگ ءَ اِتاں من چہ شُمے لوگانی کش ءَ گوازگ ءَ اِتاں منی چم تئی مات ءَ کپت اَنت من دیست کہ تئی مات لوگ ءِ دیمی نیمگ ءَ نشتگ ءُ پساں کدیم دیگ ءَ اِنت من ءَ اُوپار نہ شُت من گشت رواں چاران ئِے مات ءَ دیر اِنت ندستگ بلے پد ءَ منی دل ءَ ھمے ھیال پیداک اَت اگاں من ءَ جُست بکنت تئی گڑا من چے بُگشاں۔۔۔۔۔۔۔۔پیرو تئی روگ ءَ چہ پد منی دل نہ گُشیت کہ شُمے لوگانی نیمگ ءَ بچار وھدے کہ منی چم شُمے لوگاں کپ اَنت گڑا من ءَ ارس بے وار کن اَ ت، منی دل نہ وشیّ کنت من شُتاں لوگ ءِ کش ءَ سیکل جیک کُت ءُ سمُّل ءِ توار منی گوشاں کپت گُشت ئِے امی ابا ءِ سیکل ءِ توار اِنت۔ وھدے کہ من لوگ ءِ دیم ءَ سر بوتاں سمل تچان بوت ءُ اتک ءُ گُشت ئِے منی ابا کُج اِنت تو نیارتگ گوں من گُشت سمُّل تئی ابا رند ءَ کیت گوں سنگتاں ،منی ابّا ءِ اکس ءَ من ءَ پیش دار۔۔۔۔
من ھچ نہ گُشت مات مھناز اتک ءُ من ءَ گُشت ئِے کجا بوتگ ئے تو دیر اِنت منی لوگ ءِ دپ ءَ نیاتکگ ئے۔۔۔۔۔۔۔۔۔۔۔۔۔من گُشت ماتی من کمو دست گٹ بوتگاں ءُ سپرے ءَ بوتگاں دوشی اتکگاں۔۔۔۔۔۔۔۔۔۔۔
پیرو من دل ءَ جیڑ اِت کہ بلکیں تئی جُست ءَ بکنت بُگشیت پیرک جان ءَ ندیستگ دیر اِنت ھال ئِے نہ کُتگ نیٹورک ءَ ھم نہ اِنت اے رندی آیگ ءَ دیر ئِے کُتگ من پیشی وڑ ءَ ھما وائس ءَ گوشدارینان ءُ گُشان ئِے پیرک جان ءَ اے وائس تئی واستا راہ داتگ۔۔۔۔۔۔۔۔۔۔۔بلے پیرو گپےزان ئے مکھیں مات مھناز ءَ اے رندی تئی جُست نہ کُت اے ھم نہ گُشت ئِے کہ پیرک جان تئی گوما ھال نہ کتگ توارے راہ نداتگ؟
بلے پیرو گپے زان ئے نزاناں مات مھناز ءَ چی ءَ اے رندی تئی جُست نہ کُت۔۔۔۔۔۔۔۔۔۔۔۔۔۔۔۔ من وتی سر چست کُت چاراں منی کش ءَ کس نیست ءُ من ایوک ءَ نشتگاں ھور اِنت ھور ءَ منی گُد میسینتگ اَنت ءُ منی دست ءِ کتاب چپیں نیمگ ءَ کپتگ ءُ ھور ءَ تر کتگ اَت من گوں ارسی ئیں چماں پاد اتک آں.
دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔