شال ءَ بیگواھیں مردمانی درگیجگ ءَ زھرشانی برجاہ

شال ءِ پریس کلب ءِ دیم ءَ وائس فار بلوچ مسنگ پرسنز ھِ زھرشانی بنجل ءَ 3ھزار 9 سد ءُ ھشتاد ءُ پنچ روچ سرجم -نیشنل پاٹی ءِ نامی ئیں رھشون ملک نسیر شاھوانی، سیاسی ءُ چاگردی باسک ھوران بلوچ، ایڈوکیٹ ھالدہ ءَ ھوار دگہ مھلوک ءُ بھر زرتگ ءُ کھولانی گون ءَ پدردی درشان کرتگ –

وی بی ایم پی ءِ رھشون ماما قدیر بلوچ ءَ ھمے وھد ءَ گپ کنان ءَ گْوشت کک پاکستان ءِ زُلم ءُ زوراکیانی سیاہ ءُ تھاریں شپ راجدپتری تاکاں شناس ءُ ناشناس ءُ ھونی یے کِسواں پر اَنت ھر ھما جاہ ءَ ورنایانی ارواھے چیھال برے ریاستی زندانانی مِھ جتگیں دیوالانی بے رھمیانی، برے گلزمین ءِ ھاک ءِ وشبو ءِ کِسواں کار اَنت،اے وڑیں بازیں شپ مئے بھر ءَ کپتگ اَنت اے تھاری مروچی ھم مئے سر ءِ پُشت ءَ تاکانی دروشم ءَ بال اَنت، اے تھاری یک رندے پد ءَ وتی بھر ءَ بلوچ ورنایانی بالاداں تردیتگ –

آئی ءَ گْوشت کہ یک تھاریں شپے ءِ تھاری ءَ چَہ نپ زورگ ءُ دشمن ءُ آئی ءِ بشکردیگین ءُ زرواریں کشندہ بلوچ سرڈگار ءَ پیداگ بیتگیں مات ءِ سوداگری ءَ کن اَنت ءُ ھما سرڈگار ءِ سر ءَ گیرت ماتانی گیرت مندین بچک ءُ جنکانی بندوکیں سانمندی ءِ مھر ءِ سزا ءَ بلوچ ءَ چَہ پُلگ بیتگ اَنت-

ماما قدیر ءَ گْوشت کہ راستی ءَ بلوچستان ءِ آ ھما پُلگدیں پُسگ ءُ زالبول جوڑ بیتگ اَنت کہ ھمایانی دیمھونی ءَ زندگیں مسال اَنت – بلوچ پُسگ ءُ زالبولانی یلہ کنائینگ ءِ واستا جد ءُ جھد ءَ چار ھزار سال سرجم بیگی اِنت – بلوچستان ءَ پاکستان ءِ زُلمانی آماچیں ھزاراں بیگواھیں بلوچانی یلہ کنائینگ ءِ واستا پُرایمنیں جد ءُ جھد ءِ کاروان مشکل ءُ ترندیں جاورانی دیمپانیاں کنان اِنت ءُ وتی کاراں دزبند اِنت –

ھمے وڑ ءَ بنجل ءَ جاڑیگیں زپراللہ بنگلزئی ءِ مات ءَ رسانکدراں گوں گپ کنان ءَ گْوشتگ کہ منی زھگ زپر اللہ بنگلزئی دوھزار ءُ سیزدہ ءَ جیو شال ءَ بیگواہ کنگ بیتگ – منی چُکانی پِت ءَ وتی چُک ءِ دوری اوپار کرت نہ کرتگ ءُ وتی ابدی جاہ ءَ نمیران بیتگ –

آئی ءَ گْوشت کہ منی نماسگ ھون ءِ کمی ءِ نادراھی ءِ آماچ اِنت من سک پریشان اَنت ءُ منی زھگ ءَ اَئید ءَ یلہ بہ کن اِت –