بلوچستان ءِ دمگ پنجگور ءَ چہ پاکستانی پوج ءِ دست ءَ دو مردم دزگیر کنگ ءَ پد بیگواہ کنگ بیتگ اَنت۔
دی بلوچستان پوسٹ
سر بیتگیں ھالانی ردءَ پوج ءَ پنجگور تار کارگِس ءَ چہ ناصر ء رھیم بخش ءُ معراج ء عبدالغفور گوستگیں روچ ءَ دزگیر کنگ ءَ پد ناشناسیں جاھاں برگ بیتگ اَنت کہ چہ ایشی ءَ پد آ بیگواہ اَنت۔
بیگواہ بیتگیں مردم پوریا گر اَنت ءُ دزگیری ءِ وھدءَ آ وتی کار ءَ دلگوش بیتگ اَنت۔
بلوچستان ءِ ایندگہ دمگانی پیم ءَ پنجگور ءَ ھم بازیں مردمانی بیگوائی ءَ ھال دیما اتکگ اَنت۔ جولائی 2018 ءَ پنجگور ءِ ھنکین پروف ءَ چہ یک ھواریں قبر در اتکگ اَنت کہ چہ ایشاں چار مردمانی جون دزکپتگ اَنت۔
چار روچ پیسر بلوچ اسٹوڈنٹس آرگنائزیشن پجار پنجگور ھنکین ءِ پریس سیکریٹری علم بلوچ پوج ءَ دزگیری ءَ پد ناشناسیں جاھاں برتگ اِش کہ چہ آئی ءَ پد آ بیگواہ اِنت۔
گوستگیں یک ھپتگ ءِ تھءَ بلوچستان ءِ جتاھیں دمگاں چہ 11 مردم زوریں بیگوائیانی ویل دیم ءَ اتکگ اَنت ۔
وائس فار بلوچ مسنگ پرسنز ءِ رھشون ماما کدیر بلوچ ءِ رد ءَ بلوچستان ءَ زوریں بیگوائیانی ویلانی تھءَ کمی نہ یتکگ پرچہ کہ اگں یک مردم ءِ آجوہ بیت گڑءَ دگہ دہ مردم بیگواہ کنگ بنت۔
یات بہ بیت وی بی ایم پی ءِ نیمگ ءَ چہ شال پریس کلب ءِ دیما بیگواھیں مردمانی آجوئی ءِ ھاترءَ زھرشانی برجاہ اَنت۔