آزمانک: ھیتل ءِ دزگھار ھکّو اِنت ءُ ھکّو ھم کورے
نبشتہ کار: جھانزیب دشتی
دی بلوچستان پوسٹ
اِکرا وتی مات ءِ سیمی چک ات، اکرا ءَ یک مستریں گھارے ءُ یک مستریں براتے ھست ات اکرا کہ دنیا ءَ اتک گڑا درستیں ھمساھگ اتک اَنت ءُ اکرا ءِ توسیپ کت اِش ءُ تُکّ اِش جت ءُ ماشاء اللہ کت گب ءِ سر ءَ سیاھیں ٹیٹک جت مات سک گل ات بلے اے وشی زوت ھتم بوت اَنت چی ءَ کہ مات ءَ مار ات کہ اکرا کورے گڑا مات ءِ دل ءَ کجام درد گوزتگ آ تھنا مات ءَ وت زانت، وھدے کہ اکرا 10 سال ءِ اُمر ءَ بوت گڑا آئی ءَ بس یک دزگھارے ھست ات مردم گوش اَنت کہ اگاں یک مردمے ءِ چم کور بنت بلے دل ءِ چم پچ بنت اے گپ راستے دو رند ءَ اکرا وتی گھار ءِ گوما ھیتل ءِ لوگ ءَ اتکگ گڑا ھمد ءَ اکرا ءُ ھیتل دزگھار بوت اَنت من یک روچے لوگ ءِ پیژگاہ ءَ تھت ءِ سر ءَ نشتگ اتاں گڑا اکرا ءَ گیٹ(gate) پچ کت ءُ پیژگاہ ءُ گدان ءَ کمو کمو دوری ھست ات گڑا من وتی چم اکرا ءَ سک کُت انت کہ باریں اکرا چوں گدان ءَ کیت آئی ءَ ناں لٹ گون ات انچو کہ کوراں گوں بیت بلے ھچ ئِے گوں نیست ات بس ھیتل ھیتل توار پر کنگ ءَ ات۔۔
ھیتل ءَ کہ اکرا ءِ توار اشکت گڑا آئی ءِ دیم ءَ آیان ات بلے من ھیتل ءَ گشت کہ ھچ مگوش باریں اکرا کجا تک اتک کنت اکرا وتی دست ءَ دیم ءَ کناں کت اَنت چی ءَ کہ اکرا ءَ زانگ لوٹ ات دیم ءَ چیز ھست یا ناں آئی ءَ وتی پاداں آستو آستو ایر کنان ات بلکیں پادانی دیم ءَ سنگے یا دگہ چیز بوت کنت اکرا توار پر کنگ ءَ ات کہ من زان آں ھیتل تو اشکنگءَ ئے وتی شیتانی ءَ اے وڑ کنگ ءَ ئے اکرا تالو ءِ نازیک ءَ اتک گٹا اوشتات من ھیران بوتاں کہ یک کورے چوں زانت کہ اد ءَ چے ھست تالو کمو برز ات گڑا اکرا نشت ءُ تالو ئِے وتی دست ءِ گوما کد کت گڑا پد ءَ اکرا تالو ءِ سر ءَ اتک گڑا من ھیتل ءَ گشت کہ برو اکرا ءَ لوگ ءِ توک ءَ بر ھیتل ءَ اکراء ءِ دست گپت گڑا اکرا ھبر دیگ ئِے لگ اِت کہ تو زانتگ کہ من ھمے سھت ءَ کایاں تو انگت ءَ منی دیم ءَ نیائے ۔۔
اکرا ءِ لوگ ءِ ءُ ھیتل ءِ لوگ ءِ میان ءَ کمو دوری ھست ات گڑا منی دل ءَ وس واس بوت کہ یک کورے چوں انچوکہ اتک کنت من شپ ءَ شت ءَ اکرا ءِ لوگ ءَ اکرا ءِ ناکو منی سنگت ات من جست کت کہ اکرا مئے لوگ ءَ چوں تھنا اتک کنت آسپ ءَ مناں گشت کہ یک ءُ دو رند ءَ وتی گھار ءِ گوما اتکگ پد ءَ وت راہ ئِے یات کتگ اَنت آسپ ءَ گشت کہ اول سر ءَ ھمے دیوال ءَ گران بیت وھدے کہ دیوال ھتم بیت پد ءَ شمئے کچائیں بان ءِ پشتہ گران بیت گڑا گڈی ءَ شمئے لوگ ءِ گیٹ ( Gate) کیت پد ءَ وتی دزگھار ءَ توار کنت آسپ ءِ گپ ھلاس بوت اَنت گڑا اکرا ءَ کوکار کت کہ زی تو بوتگ ئے ھیتل منی دیم ءَ آیگ ءَ نئیشتگ من کند اِت ءُ ماشاء اللہ کت ۔۔
ھمک روچ ءِ بیگاہ ءِ سھت ءَ اکرا ھمے وڑ ءَ وتی دزگھار ھیتل ءِ کر ءَ کیت ءُ من ھر روچ چاران ئِے بلے اکرا ءِ مات ءِ بیران بوگ ءَ رند اکرا تربت ءَ شت برے برے کیت ءُ ھیتل ءِ چارگ ءَ ،ھیتل ءِ پت مدام ھیتل ءَ کنّت کنت کہ ھیتل ءِ یکیں دزگھار ھکّو( اکرا ءَ ھیتل ھکّو گش انت) اِنت ءُ ھکّو ھم کورے مدام بیگاہ ءِ سھت ءَ ھیتل ءِ پت ھیتل ءَ کُنّت کنت کہ ھیتل ءِ دزگھار یکیں ھکّو اِنت ءُ ھکّو ھم کورے ۔۔
دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت