نبشتانک: واجہ ھیربکش ءَ چہ پد
نبشتہ کار: سمّو نور
دی بلوچستان پوسٹ
واجہ ھیربکشءَ وتی سرجمیں زند گوں بے تواریءَ اَمل کنگءِ تہءَ گوازینت ،برے برے گوں رسانکدرءِ مھلوکءَ گُلگدار (انٹریو) ھم داتگ ئِے ، بلے وتی زندءِ گیشتری بھر آئیءَ بے تواریءَ گوں اَملءِ پڑ ءَ بلوچ راجی آجوئیءِ جنزءِ سرکماشی گوازینت۔
ھمے سوب اِنت کہ واجہءَ چہ پد واجہءِ کتگیں بازیں گپ ءُ ھبر نہ گیش اِتگیں بازیں راجی آجوئیءِ جنزءِ جیڑہ انگت ھما وڑءَ ایر اَنت کہ واجہءَ آھانی سر ءَ جوانے ءَ ھبر نہ کتگ بلے ھما مردماں کہ واجہ چہ نزیکءَ دیستگ آ اش سرپد اَنت ءُ زان اَنت کہ واجہءَ بلوچ راجی جنز ءِ تھِی جیڑھانی سر ءَ ھچبر رسانکدر ءَ ھبر نہ کتگ۔
جرنلسٹ آمر زیا دی بلوچ لائن میگزینءِ یک گلگدار (انٹریو) یےءِ تہءَ چہ واجہءَ جست کنت کہ بلوچ جد ءُ جھدءِ سر ءَ وت شرگداری( خود تنقیدی) چے بہ بیت ؟ بلوچ راجی جنز ءِ نزوری چے اَنت؟ گڑا واجہ آئیءِ پسہءَ گوش ایت کہ ھو ما انسان ایں مئے راجی جنز ءِ تہءَ ھم نزوری ھست ، بلے من رسانکءِ دیمءَ چیءَ وتی نزوریاں پیش بہ کن آں تا کہ پاکستانءَ موہ بہ رس ایت ءُ
منی نزوریاں چہ پایدگ چست بہ کنت؟
اے پیمیں ھبرانی درور واجہ ءِ گوں رسانکدرءِ گلگدارانی تہءَ باز گندگ بیت ، اگاں کسے اے جُستءَ چست بہ کنت گڑا ما اشی پسہءَ واجہءِ گور ءَ ھمیش گند ایں کہ واجہءَ اے پیمیں ھبرءِ سک ھلاپ بوتگ کہ بلوچ راجی جنزءِ تھِی جیڑہ رسانکدرءِ دیمءَ آرگ بہ بنت۔
کمے وھد پیسرءَ سنگت ھمل ھیدرءَ اے باوست دیمءَ آؤرتگ ات کہ واجہ ھیربکشءِ نیشنل ازم ہٹلرءِ نیشنل ازمءِ چھرگءَ جنت۔ آئیءَ اے درور داتگ اَت کہ سُوّر ءِ گومءَ نشت کن ئے بلے پنجابیءِ گومءَ ناں، اد ءَ ما سنگت ھمل ھیدر ءِ ھمے ھبرءِ نیمگءَ رو ایں کہ راستیءَ واجہ ھیربکشءِ بیان کتگیں نیشنل ازم ہٹلرءِ نیشنل ازمءِ چھرگءَ جنت…..؟
اڈولف ہٹلر 1933 ءَ جرمنیءِ چانسلر گچین کنگ بیت ، 1933 ءَ داں 1945 ءَ جرمنیءِ سر ءَ ھاکمی کنت۔ ہٹلر جرمن نسلءِ بالادستی ءِ سر ءَ بیسہ داشتگ ءُ اے گشتگ کہ جرمنءِ نسل دنیاءِ شرتریں نسل انت ءُ آئیءَ را دنیاءِ سر ءَ ھاکمی کنگءِ ھک ھست ۔ہٹلر کمیونسٹ ءُ یھودیانی سک باز ھلاپ بوتگ ءُ آئیءِ گوشگ اے بیتگ کہ جرمنیءِ مرچی ئیں جاورھالءِ زمہ وار یھودی ءُ کمیونسٹ انت ۔ھمے ھاتر ءَ آئی ءَ یھودی ، کمیونسٹ ءُ جپسیانی چُکچینی کتگ۔
ہٹلر سرجمیں یورپءِ کبزہ کنگءِ واست ءَ بازیں ملکانی سر ءَ ارش کنت ، بازیں ملک کبزہ کنت ، لکّانی ھسابءَ مردماں کُش اِیت، ھاس یھودیانی گومءَ آئیءِ نپرت بیت ءُ انچو گش اَنت کہ ہٹلرءَ اے وھدءِ میانءَ شَست لک یھودی کُشتگ۔ پنچ لک جپسی ھم کشتگ ئِے بلے چوشکہ جپسیانی دنیاءِ سر ءَ اسرے نہ بوتگ (تا روچ ءمروچی ھم نیست انت) ھمے سوبءَ آھانی چُکچینی ءِ ھال انگت جوانےءَ دنیاءِ دیمءَ نہ اتکگ۔
دومی نیمگءَ ما واجہ ھیربکشءَ گند اِیں کہ آئیءِ سرجمیں زند بلوچ آجوئیءِ جد ءُ جھدءِ تہءَ گوستگ ، واجہءَ دگہ راجےءِ سر ءَ کبزہ نہ کتگ، بلوچ راجءَ چہ دگہ راجےءَ شرتر سرپد بوگءِ گپ ھچبر نہ کتگ۔ واجہ نہ تھنا بلوچ بہ گندئے دنیاءِ ھرچ ھند ءِ ایردستیں راجانی باروءَ آھانی آجوئیءِ ھکانی باروءَ گپ کتگ۔ وتی زندءِ گُڈّی وھدءَ سندھیانءَ پہ آجوئیءِ ھاتر ءَ بلوچءِ گومءَ یکجھتیءِ کلوہءَ دنت۔
واجہ مارکسٹ پکرءِ منّوکے بوتگ ءُ دنیاءِ کلیں ایردستانی آجوئی ءِ گپ ئِے کتگ بلے واجہ اے پکرءِ منّوک بوتگ کہ کسےءِ ودارءَ مہ کن وتی جنزءَ وت مھکم کنگءِ جد جھدءَ بہ کن ءُ دیمءَ بہ جنز۔
واجہ 2008 ءِ یک گلگدارےءِ تہءَ گش ایت کہ سُوّر ءِ گومءَ نشت کن ئے بلے پنجابیءِ گومءَ ناں۔ پد ءَ 2010 ءَ آئیءَ چہ پد دگہ یک گُلگدارےءِ تہءَ گش ایت کہ من یکجاھے ءَ گشتگ کہ سُور ءَ گوں نشت کن ئے بلے پنجابیءَ گوں ناں ، برے برے من جیڑاں کہ باز زیادہ گشتگ بلے وھدے کہ زرینہ مریءِ ویل ءُ وتی راجءِ گلامیءَ گند آں گڑا من ھمے سرپد باں کہ من رد نہ گشتگ ، سورءِ گومءَ نشت کن آں بلے پنجابیءِ گومءَ اناں۔ (سورءِ درور ئِے اے ھاتر ءَ داتگ کہ اسلامءِ تہءَ سور ھرام انت۔)
اد ءَ واجہءِ گپءِ سر ءَ کہ کسے چار ءُ بچار کنت گڑا اد ءَ نسل پرستیءَ چہ گیشتر گلامیءَ گوں نپرت گندگءَ کیت اِنت اد ءَ گپءِ بنزہ ایش نہ انت کہ بلوچ پہ اے ھاتر ءَ پنجابیءِ گومءَ نشت نہ کنت کہ آ چہ پنجابی راجءَ چہ شرتریں نسلے ، اد ءَ گپءِ بنزہ ایش انت کہ بلوچ پہ ھمے ھاتر ءَ پنجابیءِ گومءَ نشت نہ کنت کہ آئیءَ بلوچءِ زمین کبزہ کتگ، بلوچ راج وتی گلام جوڑ کتگ، بلوچ زمینءِ لٹ ءُ پل کنگءَ انت ، بلوچ راجءِ نسل کشیءَ کنگءَ اَنت۔
کسے گوں واجہءِ اے گپءَ اختلاف کت کنت ، واجہءِ بازیں گپ ءُ آئیءِ کاراں چہ اختلاف داشت کنت بلے ہٹلر کہ آئی یورپءِ نیم کبزہ کتگ ، راجانی نسل کشی کتگ ، لکانی ھسابءَ مردم کشتگ ، آئیءِ نیشنل ازمءَ گوں واجہءِ نیشنل ازمءَ ھمے ھبرءِ بنیاتءَ ھمدپ کنگ اے یک مزنیں زیادھی بیت۔
بگندئے واجہءِ ھبر مرچیگیں ہومن رائٹس ءِ دنیاءِ ھمدپیں گپ نہ انت بلے یک گلامیں راجےءِ نیشنل ازم ءُ کبزہ کنوک ءِ نیشنل ازمءِ بس چندے گپ ءُ ھبرءِ بنیاتءَ یک ھساب چارگ یک بلاھیں ردی یے۔ دنیا کہ مرچی فلسطینءِ نیشنل ازم ءُ اسرائیلءِ نیشنل ازمءَ یکیں کنڑءَ نہ چار ایت گڑا بلوچءِ نیشنل ازم ءُ پنجابیءِ کبزہ ھم یکیں ھسابءَ چارگ بوت نہ کنت۔
دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت