شال ءَ بیگواھیں مردمانی واستا زھرشانی برجاہ، نواب ھیر بکش مری ءِ سالروچ دارگ بیتگ

شال ءَ بیگواھیں مردمانی واستا زھرشانی برجاہ، نواب ھیر بکش مری ءِ سالروچ دارگ بیتگ

دی بلوچستان پوسٹ

بلوچستان ءِ بنجاھی شھر شال ءَ وائس فار بلوچ مسنگ پرسنز ءِ زھرشانی بنجل ءَ 3 ھزار 9 سد ءُ ھشتاد ءُ چار روچ سرجم بیتگ – چاگردی باسک ھالدہ ایڈوکیٹ ءَ ھوار جتائیں تکاں سیادی کنوکجں مردماں بنجل ءِ تر ءُ تاب کرتگ ءُ کھولانی گون ءَ پدردی درشان کرتگ ھمے وھد ےَ میر گپار قمبرانی، ساجدہ، ھسیبہ قمبرانی ءُ دگہ بیگواھیں مردمانی دگہ مردم جاڑیگ بیتگ اَنت –

وی بی ایم پی ءِ بنجل ءَ نواب ھیر بکش مری ءِ ششمی سالروچ ءِ درگت ءَ “پاک تاک ” بھر ءُ بانگ کنگ بیتگ –

بلوچ زرمبشت ءِ سرھیل منّوکیں نواب ھیر بکش مری ءِ ششمی سالروچ ءَ مروچی بلوچستان ءَ ھوار درملکاں ھم دارگ بیگ ءَ اِنت – نواب ھیر بکش مری دَہ جون دوھزار ءُ چاردہ ءَ کراچی ءَ نادراہ جاہ ءَ بیران بیتگ آ بلوچ راج ءِ واستا یک جوان ءُ سوھیں رھشونے بیتگ –

بلوچ ھلکاں آئی ءَ پیامپر آشوب، امام ء آجوئی، امام بلوچ ءُ درسگاہ ء آزادی ءَ دیم روھے ءِ رنگ ءَ یاتگیری بیگ ءَ اِنت – نواب مری ءَ اوگستان ءَ وتی ھمراھانی ھمراھی ءَ دراں ڈیھی گوازینتگ، آ شال ءِ روکپتی دمگ چلتن دامان ءَ نیوکاھان ءَشھدائے بلوچستان مانشجاہ ءَ آسودگ اِنت –

نواب مری ءِ بارہ ءَ گْوش اَنت کہ آئی ءَ بلوچ راج ءَ را جنگ ءِ راہ پیش داشتگ ءُ آیاں زانت ءُ زانش ءِ راھے ھواری ءَ رھشونی کرتگ –

وی بی ایم پی ءِ ماما قدیر بلوچ ءَ پاک تاک بھر کرتگ ءُ دوا کرتگ ءُ گْوشتگ کہ بلوچ راج نواب ھیر بکش مری ءِ راہ ءَ بہ رو اَنت ءُ راست ءُ تچکی ءِ سپر ءَ پیلو بہ کن اَنت-

آئی ءَ رسانکدری نمائندگاں گوں گپ کنان ءَ گْوشتگ کہ مروچی ءِ روچ بلوچ راج ءِ واستا دردناک ءُ پکری ءِ روچے ءِ بستار ءَ اِنت بلوچ راج روژنائیں روچ ءُ چاگرد ءِ راستی ءِ زور ءَ ریاستی چیریں ادارہ ءُ پوج یک رنگے ءَ ھلاس کنگ اِنت ءُ ھزاراں ھما وڑئیں کسان سالیں بلوچ بے دردے ءَ گوں شھید کنگ بیتگ اَنت کہ آیانی نازروکیں بدن ءَ گیر انسانی لٹ ءُ کُٹانی نشانگ پِر بیتگ اَنت –