بالگتر ءَ مروچی دومی روچ ءَ ھم چار ورناھانی آوار جنی ءِ بگیری ءَ لس مھلوکے زھر شانی برجاہ اِنت۔
سربوتگیں ھالانی رِد گوستگیں روچ ءَ بالگتر ءَ پاکستانی پوج ءَ چار نودربر دزگیری ءَ پد وتی بُنجل ءَ بُرتگ ءُ بندیگ کُتگ اَنت. آھانی یل کنائینگے ھاتر ءَ مروچی دومی روچ ءَ بیگواھیں مردمانی کھول ءُ لس مھلوک ءَ بالگتر ءِ پوجی بنجلے دپ ءَ نندانک جتگ ءُ زھر شانی کُتگ.
سربیتگ ایں ھالانی رِد ءَ بالگترے پوجی بنجلے دپ ءَ لس مھلوکے مزنیں کچے یکجاہ بوتگ ءُ ھمودا ننداک جتگ ءُ زھرشانی کُتگ.
زانگ بہ بیت گوستگیں روچ ءَ بالگتر ءِ دمگ گڈگی ءَ دو براتاں ھوار چار مردم پاکستانی پوج ءَ زورانسری آوار جتگ ءُ وتی نزیکیں بنجل ءَ بندیگ کُرتگ انت ورناھانی آوار جنگ ءُ بیگواھی پد لس مھلوکے مزنیں کچے ءَ لشکری بنجلے دپ ءَ نندانک جتگ ءُ ورناھانی یک کنگے لوٹ کُرتگ. بلے پوج ءَ آھانی یل دیگ ءَ انکار کُتگ ھمے گوشتگ کہ مئے کرا نہ انت گڑا لس مھلوک ءَ ھمودا نندانک جتگ ءُ نشتگ انت .
ھالانی رِد ءَ نندانک ءُ زھرشانی کنوکیں مردمانی گُشگ انت کہ اگاں ورناء یل کنگ نبوتاں گڑا ما وتی زھرشانی ءَ بالگتر ءَ چہ کیچ ءِ بنجاھی شھر تربت ءَ سر کن ایں ءُ شدکُشیں ھرتال ءَ نندیں.
زھرشانی کنوکیں مردماں چہ انسانی ھکانی گل، انسان دوست ادارہ ءُ چاگردی رسانکدر کارمرز کنوکاں چہ لوٹ کُتگ کہ آ مئے ھمراہ داری بہ کن انت ءُ وتی انسان دوستی ءِ پرز ءَ پیلو بہ کن انت.
بالگتر ءَ آوار جتگیں ورناھانی ویل ءِ درگت ھیومن رائٹس کمیشن آف بلوچستان ءِ جارکش عبداللہ عباس ءَ ٹوئٹ ءِ تھءَ گوشتگ “دگہ چار ورناہ گوں دو ھقی ایں براتاں ھوار فورسزاں آوار جتگ اَنت۔
آئی ءَ دیمترءَ گوشتگ کہ بیگواھیں مردمانی پجار ماجد سپاھان، شھاب سپاھان، ابوالحسن رھمت ءُ اھساب ھلیل ءِ نامءَ بیتگ اَنت۔
عبداللہ عباس ءِ ردءَ ماجد ءُ شھاب ءِ کماش سپاھان لھتیں سال پیش ھیلی کاپٹرانی شیلنگانی تھءَ کُشگ بیتگ۔ عبداللہ عباس ءَ چاریں ورناھانی زیت یلو کنگ ءِ لوٹ کُتگ۔”