نبشتانک: مُچی ءِ ندارگ
نبشتہ کار: سکی ساوڑ
دی بلوچستان پوسٹ
من سھب ءَ چَہ واب ءَ پاد آھت آں، جانے شُشت، چاہ ءِ نشہ چو سگریٹ ءِ وڑ ءَ بیوار کنگ ءَ اَت، پد ءَ بازار ءِ گردگ ءُ شرنگیں کاڑانی چارگ ءُ دیوان کنگ ءِ ھم تلب بوگ ءَ اَت ، چاھے اَڈّ کرتگ ءُ وارت، وتی بان کُبل کرت ءُ دیم پہ بازار ءِ نیمگ ءَ رھادگ بوت آں، داں یک دگے ءِ سر ءَ مُچی یے گندگ بوت کہ یک کاڑے ءَ وتی گُشان سر ءَ اَت ، ھمے مُچی ءِ تہ ءَ اوشتاگ اَت ءُ گوں رسانکداراں گپ ءَ اَت، بلے آئی ءِ گپ منی اے کرّیں گوشاں کپگ ءَ نہ اِت اَنت بلے کوریں چم کمو گندگ ءَ اِت اَنت کہ یکے ءَ را دو اکس دست ءَ اَت ،برے اکس ءِ چارگ ءَ اَت ءُ برے گوں رسانکداراں دلگوش اَت، من گوں وتی تُنّیگیں بالاد ءَ ھمے مچی ءِ نیمگ ءَ روان اِت آں برے یک ھیالے پیداک اَت بلے نوں تُنّ ءِ جاہ ءَ وتسر ءَ وت ترسے ودی بوان اَت باریں چونیں مچی یے کہ اد ءَ گندگ بوگ ءَ اِنت، بلے پد ءَ دل ءَ گْوشت” ترا چِہ کار اِنت کہ وت ءَ ازابانی دیمپان کن ئے، تو پرچا گنوکی کنگ ءَ ئے؟ اے جیڑہ تئی نہ اِنت بلکیں اے جیڑہ ھماوانی جند ئیگ اِنت ءُ تو پرچا مپت ء ھدا ءَ وت ءَ پالومپے گُٹ ءَ دے ئے؟ یکبرے وتی تُنّ ءِ ھیال ءَ بدار پد ءَ بیا مُچی ءِ ھال ءَ بگر، دگہ ھم ترا گپے گْوش آں چوش کن تو یکبرے وتی گِس ءِ مردمانی ھیال ءَ بو بھتاور اگاں تو ایشانی کرّ ءَ شُت ئے کہ پرچا مُچ اَنت؟ بوت کنت جنگے بوگ ءَ اِنت ، تو وت ءَ پرچا لگت ءُ مُشتے وارین ئے اللہ مہ کنت تیرگْواری یے بہ بیت ءُ تیرے تئی دلبند ءَ بہ لگ اِیت تو بہ مِر ئے گڑا تئی گِس والا گنوک نہ بنت؟ منی ھبر ءَ زور ئے گاماں دو گام مہ کن”.
مُچی ءِ چاریں آتراپاں سِلاہ بندیں مردم ھم گندگ بوگ ءَ اِت اَنت، دَگ ءِ سر ءَ گاڑی ءُ مردم رو ءُ آ کنگ ءَ اِت اَنت، بلے کسے ءِ ھیال گوں اے مچی ءَ نہ اَت انچوش سما بوگ ءَ اَت کہ مردم چو منیگ ءَ کَر ءُ کور اَنت کہ ھچ میم کنگ ءَ نہ اَنت ،انچوش سما بوگ ءَ اَت درست کَرّ ءُ کورانی وڑ ءَ روگ ءَ اَنت، لھتیں مردمے دکانانی دپ ءَ اوشتاتگ اَت ءُ لھتیں مردم ءَ سَودائی گپتگ اَت ءُ روگ ءَ اِت اَنت، دگہ مردے گوں دو زھگ ءُ جنینے ءَ چَہ گاڑی یے ءَ ایر کپت ءُ کندان ءَ ھمے مزنیں دکان ءِ تہ ءَ پُترت ، من ھمے ندارگانی چارگ ءَ اِت آں، پد ءَ من ءَ ھمے ھیال آھت اے دل مدام مکن کنگ ءَ جاڑی اِنت، من چار اِت اے دل مکن کنگ ءَ اِنت، من یکبرے وتی گام اوشت ءِ آماچ کرت اَنت ءُ یک کِرّے ءَ اوشتات آں داں چَہ کسے ءَ ھمے جُست ءَ بگر آں ءُ پکا بہ کن آں کہ جیڑہ ءِ جند چے اِنت ؟مھلوک پرچا دگانی سر ءَ اوشتاتگ اَنت؟ ھمے وھد ءَ منی کَش ءَ یکے ءَ وتی دومی ھمراہ ءَ را گْوشت ” یار مروچی دگہ لھتیں شرّنگ آھتگ،بلے لھتین ءَ وتی دیم بَستگ نوں زانگ نہ بنت کہ سک شرنگ اَنت یا ناں، پد ءَ ھم اللہ ءِ شگر اِنت لھتیں شرّنگ ءَ وتی دیم ءَ پَچ کرتگ، روچ پہ روچ وڑ پہ وڑیں شرنگ اد ءَ گندگ بوگ ءَ اِنت، پیسر ءَ ما اے شرنگ اد ءَ نہ دیستگ اَنت اے مئے وشبھتی اِنت کہ مروچی ما ایشانی دیدارے کرت کن ایں چے گْوش ئے تو انچوش نہ اِنت”؟
آئی ءِ سنگت ءَ ھندگے جَت ءُ گْوشت” تئی گپ کدی دروگ بوت کن اَنت کہ مروچی بنت؟ تئی گپ منی گپ اَنت بزاں منی ءُ تئی سوچ یک اِنت ، بازار ءَ اے وڑیں شرنگ باز اِنت بلے مئے دل چَہ آواں شُتگ”.
من ھم زانت کہ اے منی وڑیں تُنیگ اَنت،ھمے وھد ءَ آوانی ھندگ برز بوت اَنت ، من چَہ کسے ءَ جُست نہ کرت ءُ ھمے مُچی ءِ نیمگ ءَ جنز اِت آں دانکہ وت برو آں ءُ جیڑہ ءَ سرپد بہ باں بلے دل ءَ پد ءَ مکن کنگ ءَ بنا کرت ، اے رندی من آئی ءَ را موہ نہ دات ءُ مچی ءِ تہ ءَ وت ءَ را سر کرت داں اے مُچی ءَ دگہ کُشت ءُ کوشے گندگ بوگ ءَ نہ اَت بس لھتیں زالبول ءُ لھتیں ورنا ءُ کماش ءَ را اکس دست ءَ اَت ءُ ھمے لوٹ ءَ کنگ ءَ اِت اَنت” مئے بیگواھیں مردماں دیم ءَ بیار اِت ھر گناھے اِش کرتگ آواں ماں ھامیدگِس ءَ بیار اِت ءُ سزا بہ دے اِت اِش بلے سالانی سال بیگواہ اِش مہ کن اِت”.
من چار اِت کُشت ءُ کوش یا جَنگ ءُ چوپ نیست من ھم آوانی ھمراھی ءَ توار چِست کرت، پد ءَ من ءَ ملکناز ءِ گپ یاد آھت کہ گْوشتگ اِت ئِے” اد ءَ تو ھک ءِ گپ جت ، ھراب ءَ ھراب گْوشت یا تو دزانی دیم ءَ اوشتات ئے گڑا الّم تیر تئی سِینگ ءَ سُمب اَنت”.
من ھمے وھد ءَ یکبرے پد ءَ ترس ءِ آماچ بوت آں ءُ جیڑگ ءَ لگ اِت آں ایش اِنت ناں وت ءَ پسّینت،اے بابُل تئی جیڑہ نہ اِنت پرچا نا سرپدی کنگ ءَ ئے؟ ھمے وھد ءَ دل ءَ گْوشت بزگ کمو دیم ءَ روان کن دگہ چے بوگ ءَ اِنت ءُ موھے پَٹ وتی جان ءَ کَش، من اوگام (نعرہ) جَنَگ ءَ بند کرت چو مہ بیت اے بیگواہ بوتگیں مردم اوگام ( نعرہ )والا بہ بنت مروچی ھمے اوگام جَنَگ ءِ پُشت ءَ بیگواہ بوتگ اَنت ءُ آوانی مردم دگانی باھوٹ اَنت، بیزار چَہ دگہ کَٹّ ءَ جند اِت بیگواہ مہ بیت، من پہ ترس ءُ لرز یک پہ یک ءَ ھمے مردمانی چارگ ءَ لگ اِت آں باریں چِہ کَس اَنت! من مچی ءِ تہ ءَ روان اِت آں نا اود ءَ ھدا ءَ گندگ بوگ ءَ اَت ءُ نا آئی ءِ ولی، نوں من زانت ھُدا ءُ آئی ءِ ولی بیگواھی ءِ ترس ءَ نیاتکگ اَنت، ھمے وھد ءَ من دیست داں یک ماسے ءَ را اکسے دست ءَ اَت ءُ گپ کنگ ءَ اَت کہ ھمے گپ ءِ وھد ءَ چُوڑ بوت، کپت ءُ بے سما بوت، مردماں آئی ءَ را آپ جت ءُ پد ءَ وتی سما ءَ آھت، من یک اکسے کَش اِت ،دل ءَ گْوشت (سِلفی یے) ھم بگر گڑا من (سلفی یے )ھم کَش اِت داں مردم بزان اَنت من شمے دردوار آں، مچی ءِ کَش ءَ ھما بانک گندگ بوگ ءَ اَت کہ گوں رسانکدار ءَ گپ ءَ اَت من ھمائی ءِ کرّ ءَ شُت آں بلے نوں منی گوشاں آئی ءِ گپ ءُ گریوگ آیگ ءَ اِت اَنت من چار اِت داں آئی ءِ ارس چَہ انارکانی سر ءَ تچان ءُ زمین ءِ دلبند ءَ کپان اِت اَنت، زمین بزگ گَل اَت کہ مروچی منی تُن پروشگ بوگ ءَ اِنت، آئی ءَ گریت ءُ گپ جت ،من آئی ءَ شری ءِ سر ءَ گوش داشت داں آ گْوشگ ءَ اَت کہ پیسر ءَ ھم منی براسے شھید کنگ بوتگ ءُ نوں منی دگہ دو براس برگ بوتگ، وھدے من اے گپ اِشکرت اَنت گُڑا من ءَ وتی گھار یاد آھت اَنت، ھمے وھد ءَ من ءَ وتی دل ءِ گپ یاد آھت واکی اڑے دل ءَ راست گْوشتگ منی چِہ کار کہ من وت ءَ دست ء وت بہ پسّین آں،اگاں مروچی تو اد ءَ آھتگ ئے بِلّے تو توار چِست کنگ ءَ نہ ئے ءُ ندارگ چارگ ءَ ئے پد ءَ اکس کَشگ ءَ ئے بَلے گپ اِیش اِنت اے زمانگ ھراب اِنت چو مہ بیت کہ تئی جند بیگواہ بہ بیت ،پد ءَ تئی گھار دگانی باھوٹ بہ بنت ءُ مچی ءِ یک مردمے گیش بہ بیت، من زوت زوت ءَ ھمے مچی ءِ اکس وتی گوانکو ءِ تہ ءَ چَہ کور کرت اَنت ءُ چَہ مچی ءَ دَر آھت آں دیم پہ تُنّ پروش جاہ ءِ نیمگ ءَ روان ءُ چک جنان اِت آں چو مہ بیت کہ من ءَ یکے بہ گند اِیت ءُ بیگواہ بہ کنت کہ تو پرچا مچی ءَ ھوار بوتگ ئے؟ پد ءَ دومی ترس ایش اَت کہ من ءَ وتی گھار دگانی سر ءَ پہ اے وڑی ءَ دل نہ بوگ ءَ اِت اَنت کہ باندا منی رَدی ءِ پُشت ءَ دگانی باھوٹ بہ بنت پرچاکہ اے منی جیڑہ نہ اِنت، من روان اِت آں بلے نہ زان آں ھمے پریاتانی توار پرچا انگت منی گوشانی تہ ءَ جکسگ ءَ اِت اَنت، من گُڈی رَند ءَ چَک جت داں مچی برجاہ اَت ءُ اکس گندگ بوگ ءَ اِت اَنت وھدے من وتی دیم ترینت داں گاڑی یے ءَ چار سِلاہ بندیں مردم ءَ دَور کرت ءُ منی دیم ءَ اوشتات اَنت.
دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔