بلوچستان ءَ ڈنک ویل ءِ ھلاپ ءَ زھرشانی برجاہ

تربت ءَ بیتگیں ویل ءِ ھلاپ ءَ سرجمیں بلوچستان ءَ زھرشانیانی درچ برجاہ اَنت – برم یکجھتی کمیٹی، بلوچ راج ڈیرہ ھان ءِ نیمگ ءَ مروچی ھزدار، ڈیرہ گازی ھان، سوراب، نوشکی ءُ قلعہ عبداللہ ءِ زھرشانی کنگ بیتگ –

دوشمبے ءَ ھُزدار ءِ شھر ءَ مھلوک ءِ نیمگ ءَ میونسپل کمیٹی ءَ یک روانکے کَش اِتگ کہ بازار ءَ گوزان بیتگ ءُ آزادی چوک ءَ ھلاس بیتگ – زھرشانی کنوکاں ویل ایر جتگ ءُ ترندی ءَ ایراد گپتگ –

زھرشانی کنوکاں ڈنک ءِ ویل ءَ ھواریں مجرمانی سزا دیگ ءَ ھوار بلوچستان ءَ مانپچتگیں ڈیتھ اسکواڈ ھلاس کنگ بہ بنت-

بلوچ راج ڈیرہ گازی ھان ءِ نیمگ ءَ ڈیرہ گازی ھان ءَ ویل ءِ ھلاپ ءَ زھرشانی کنگ بیتگ – زھرشانی ءَ زالبولاں ھوار چُکاں ھم بھر زرتگ –

بلوچستان ءَ گوستگیں دو ھپتگانی تہ ءَ مھلوک ءِ نیمگ ءَ زھرشانی درچ برجاہ اَنت – برمش یکجھتی کمیٹی ءِ نیمگ ءَ یورپی ڈیھاں ھم ویل ءِ ھلاپ ءَ زھرشانیانی ٹاہ ڈیگ بیتگ اَنت –

ویل ءِ ھلاپ ءَ قلعہ عبداللہ ءَ مھلوک ءِ نیمگ ءَ چَہ نوشکی ءَ نیشنل پاڑی ءِ نیمگ ءَ زھرشانی کنگ بیتگ –

ھمے وڑ ءَ اورناچ ءَ ڈنک ویل ءِ ھلاپ ءَ روانک کشگ ءُ زھرشانی کنگ بیتگ –

روانک بازار ءَ گوزان بیتگ ءُ چوک ءِ سر ءَ مُچی ءِ دروشم ءَ اتکگ ءُ بی این پی تھسیل اورناچ ءِ سروک عبدلباقی، میر صمد بروھی ءُ دگہ مردماں مچی ءَ تران کرتگ ءُ گْوشتگ کہ برمش بلوچ ءُ آئی ءِ مات ءِ کشندھاں تچک تچک ءَ دزگیر کنگ ءُ کانودانی رد ءَ سزا دیگ بہ بنت –

زھرشانی کنوکاں گْوشت کہ ڈنک ویل ءَ بلوچ چاردیواری ءِ پادمالی ءَ مروچی سرجمیں ڈیھ ءَ زھرشانی بیگ ءَ اِنت –

آیاں گْوشت کہ ما سرکار ءِ بلوچستان ءُ بنجاھی سرکار ءَ چَہ دزبندی کن ایں کہ برمش بلوچ ءَ مُزگیری بہ دنت –

ھمے وڑ ءَ کیچ ءِ دمگ ناسر آباد ءَ ھم ڈنک ویل ءِ ھلاپ ءَ زھرشانی کنگ بیتگ –

بلوچستان ءِ دمگ نوشکی، ڈیرہ گازی کلات ءَ نھ جون ءَ زھرشانیانی جار پرینتگ وھدیکہ دگہ شھرانی ورنایاں سرپدی ءِ واستا پنتاک بھر ءُ بانگ کنگ بیتگ –