نبشتانک: اے جیڑہ تھنا بْرمش ءِ نہ اِنت ، راجی جیڑھے
نبشتہ کار : سرباز وپا
دی بلوچستان پوسٹ
26 سوچکان ( مئی ) 2020 ءَ کیچ ءِ دمگ ڈنک ءَ گْوھار ملکناز ءِ ھِمّت کنگ گوں دُز ءُ ڈنگاں جنگ کنگ ءُ آئی شھیدی ءُ کسانسالیں بْرمش ءِ ٹپّی بُوَگ ، سرجمیں بلوچ راج ءَ را ھمت ءُ توکلے بکشائیت ءُ راستی یے پدر کنت ۔ شھید گْوھار ملکناز بلوچ ، بلوچ جنُز ءِ تہ ءَ شیرزالی ءِ کِسّہ ءَ نوک کنت ۔ آ یک انچیں کردارے ءِ واھند اِنت آئی ءِ کردار ءِ سرا نبشتہ کنگ پہ منی وڑیں نزوریں نبشتہ کاراں سک گْران اِنت ، شھید گْوھار ملکناز ءِ کُربانی بے مٹ اِنت ۔
پاکستان ءِ داشتگیں ڈُنگانی چہ اے دلسوزیں کار ءَ بلوچ راج ءَ را ھمے سِکین دات پہ کسانسالیں بْرمش ءَ توار ءِ چست کنگ المی اِنت ۔ بلوچستان ءِ جتا جتائیں دمگاں شرّیں وڑے ءَ زھرشانی بُوَگ ءَ اِنت مرچی ھر بلوچ ءَ ھمے مارت ءَ پہ کسانسالیں بْرمش ءَ توار چِست کنگ بہ بیت اے وھیل ءِ ناشرکاریں ڈُز ءُ ڈنگ گِرگ بہ باں گوں بْرمش ءَ انساپ بہ بیت ۔ بلوچ راج ءِ اے جُھد ستا کرزیت گوں شرّیں وڑے ءَ وتی جُھد داشتگ ءُ دیم ءَ برگ ءَ اَنت ۔ اے گپ ھمے پیشداشتگ کہ راج یکمُشت ءُ تپاک بوت آ یک توپانے ءِ دْروشم ءَ بیت ۔ اے توپان داں وتی منزل ءَ سر نہ بوت ءَ ایشی ءِ دیم ءِ دارگ سک گْران اِنت ۔
ھر ھند ءُ دمگاں ھمے جار جَنَگ بیت ( بْرمش کو انصاف دو ) وھدے ما اے جیڑہ ءِ سر ءَ کمو بہ جیڑ آں اے تھنا بْرمش ءِ جیڑہ نہ اِنت ، اے بلوچ راجی جیڑھے! گُڑا اے جیڑہ مارا چہ بُنھشت ءَ چارگی اِنت ۔ اگاں ما گوں ایمانداری ءَ بِہ چار آں کلیں جیڑہ راست ءُ تچک ءَ مئے دیم ءَ کاینت ۔ گُڑا اے جیڑہ بْرمش ءِ نہ بیت، گلامی جیڑھے اِنت ۔ ھمے رنگ ءَ ما گْوست ءَ بِہ چار آں ھما اِنت بلوچ وتن ءِ سر ءَ پہ زُور ناشرّیں پاکستان ءَ کْوزہ کُتگ ، اے جیڑہ چہ ھما وھد ءَ بنا بوتگ ءُ دیم ءَ روگ ءَ اِنت ۔ ھزارانی ھساب ءَ بلوچ پاکستان ءِ ڈُنگیں پوج ءِ دست ءَ جَنَگ ءُ شھید بوت ءَ ، ءُ بازیں پاکستان ءِ جوڑ کُرتگیں راج دُژمنیں ڈُنگانی دست ءَ جَنَگ ءُ شھید بوت ءَ ۔ چہ ھما وھد ءَ بلوچ ورناہ ءُ کماشاں ابید مئے لج مئے گیرت ، مات ءُ گوھار ھم چست کنگ ءُ گار ءُ بیگوا کنگ بوتگ اَنت ، شھید کنگ بوتگ اَنت ۔
وھدے ما بْرمش ءِ جیڑہ ءَ دیم ءَ بَرگ لوٹ آں گُڑا مارا بلوچ راجدپتر ءِ گْوست ھم وانگ لوٹ اِیت ۔ جُنز ھر وھد ءَ راستی نبشتہ کنان کنت ، جُنز پہ کس ءَ ریا نہ کنت ۔ بلوچ ءِ اے گلامی ءِ جیڑھے تہ ءَ بلوچ راج ءِ شھید ، گار ءُ بیگوائیں پُسّگ سک باز اَنت ۔ بازیں مات ءُ گْوھار گار ءُ بیگواہ کنگ بوتگ ، بازینے چو شھید مَلِکناز ءِ وڑ ءَ شھید کنگ بیت ۔ بازیں چو کسانسالیں بْرمش ءِ وڑ ءَ ٹپّی بوتگ ۔ 1971 جاہ ءِ آھُو جکّی ءَ پاکستانی لشکر ءِ دست ءَ اتا سمالاڑی ، مھبت ھان ، نیٹو بلوچ ءَ گوں ھوار ھپت بلوچ شھید کنگ بیت۔ مات سومری ءُ پیراڑی بَرگ ءُ گار ءُ بیگواہ کنگ بَہ اَنت داں روچ ء مروچی آیانی کس ھالاں نہ دنت کہ کبر اِش کُجا اَنت ۔
چہ کوہلو ءُ کاھان پ زرینہ مری ءُ ھنیپہ بگٹی گار ءُ بیگواہ کنگ بَہ اَنت ءُ انگت گار ءُ بیگواہ اَنت ۔ 25 تاکشان (دسمبر ) 2012 ءَ مشکے چُٹّوک ءَ سد گنج ء رھیمداد ،ھدا داد ء نور مھمد ، گل بی بی ء مھمد اُمر ، الم خان ء کماش ساھو ،بختی ء دینار ، مھناز ء رھمت ، الی جان ءِ لوگبانک گنجو پاکستانی دُزّیں پوج ءَ شھید کُتگ اَنت۔ 9 سارتان ( اکتوبر ) 2013 ءَ ھاران ءِ دمگ بیسیمگ ءَ ھلیمہ بلوچ ءُ آئگی براس زپر بلوچ پاکستانی دُزّیں پوج ءَ شھید کُت اَنت ۔ 29 ساچان ( اگست ) 2013 ءَ مند ءَ بلوچی زبان ءِ ورنائیں شائِر شبیر مھسُوم بلوچ ءُ ھان مھمد بلوچ ، ماس جوانین ملک ء ھاجی جُما ءَ پاکستانی پوج ءَ شھید کُتگ ۔ 2 بھاران ( جنوری ) 2015 ءَ مشکے سُنیڑی ءَ اَبدالستار ء مھمود ، سبزل خان ء مھمود ، داد مھمد ء مھمود ، امان اللہ ء مھمود ، بی بی سمینہ ء مھمود شھید کنگ بیتگاں ۔ 5 مولمان ( مارچ ) 2017 ءَ بلیدہ الندور ءَ دہ سالی ئیں پاتُمہ بلوچ ء ھالد ، امیر بکش بلوچ ء داد رھمان ، رشید بلوچ ء گْوھرام ، پاکستانی پوج ءَ شھید کُتگ اَنت ۔ 1 تاکشان ( دسمبر ) 2017 ءَ مشکے گجلی ءَ گوس بکش بلوچ ءُ آئی مات گنجل ءَ پاکستانی پوج ءَ شھید کُتگ ۔ 5 بھاران ( جنوری ) 2015 ءَ جاہ ءِ آھُو مُلّا گزّی کَور ءَ پاکستانی بالی گُرابانی تیرگْواری ءَ چہ کسانسالیں درئے ھان ء شیرمھمد شھید بیت آئی ءِ یک براتے ءُ مات ، یک گْوھارے ٹپّی کنگ بیت ۔
6 تومشان ( سمبر ) 2016 ءَ پاکستانی آئی ایس آئی ءَ گْوھار بھتاور بلوچ ءَ گوں ھوار آئی 2 کسانیں زھگ وتی بندیگ کُت اَنت ۔ 30 سارتان ( اکتوبر ) 2017 ءَ جاہ ءِ آھُو کوھڑو ءَ پاکستانی پوج ءَ تیوگیں میتگ ءِ زھگ ءُ زالبول لٹ دات اَنت چہ ھمے لٹ ءُ چوپ ءَ گْوھار گل بھت ء شاہ داد ءَ پاکستانی لشکر ءَ بازیں لٹ ءُ چوپ ءَ پد گران کُتگ اَت گْوھار گل بھت بازیں وھد ءِ بے ھوش بوتگ ۔ تاکشان ( دسمبر ) 2018 ءَ کماش گل شیر ء رھمت ءَ پاکستان ءِ جوڑ کُرتگیں دُز کھور ء ھدُو پنّام ء منان ءَ لٹ دنت ءُ آئی ءِ کسانیں تامُرے شنگ کنت ۔ 23 جلکشان ( جولائی ) 2018 ءَ چہ مشکے النگی ءَ اللہ بکش بلوچ ءِ لوگبانک بی بی نور ملک آئی چُک بی بی ھسینہ ء اللہ بکش، بی بی سمینہ ء اللہ بکش، زمیراھمد ء اللہ بکش، دولت ء داد مھمد پاکستانی پوج ءَ بُرتگ ءُ وتی بندیگ کُتگ اَنت ۔ 22 کَرا ( اپریل ) 2019 ءَ چہ آواران پیراندر ءَ اَبدُالھئی بلوچ ، بی بی شاھناز ، کسانسالیں فرھاد جان ، بی بی صنم ءُ آئی دو زھگ ملین جان ءُ مھدیم جان ، بی بی نازل آئی دو زھگ اِجاز بلوچ ءُ دردانگ بُرتگ ءُ بندیگ کُتگ اَنت ۔
22 مولمان ( مارچ ) 2019 ءَ چہ مشکے گجلی ءَ گلشیر ء رھمت ءِ لوگبانک بیبی نوری ءُ آئی گْوھار جان بی بی گوں کسانیں دو زھگ ءَ ھوار پاکستانی پوج ءَ آوار جتگ ءُ وتی بُنجل ءَ بُرتگ اَنت ۔ 29 گْوبشان ( نومبر ) 2019 ءَ چہ آواران ءَ بی بی سکینہ ، بی بی سئیدہ ، بی بی ھمیدہ ء دلبود ءَ ھوار بی بی نازل ءَ دومی رند ءَ پد ءَ پاکستان ءِ آئی ایس آئی ءَ آوار جتگ ءُ وتی بندیگ کُتگ ۔ 14مولمان ( مارچ ) ءَ چہ آواران زیارت ءِ ڈنّ ءَ پاکستانی پوج ءَ سکی داد ءِ لوگبانک بی بی رزیہ ءَ چہ آئی گِس ءَ آوار جتگ ءُ وتی بُنجل ءَ بُرتگ چہ بازیں لٹ ءُ چوپ ءَ پد آئی نیم زندے ھساب ءَ آئی ءَ کار اِیت ءُ گِس ءِ نزیک ءَ دور دنت ۔
وھدے تو بلوچستان ءِ نگیگیں جاورانی سر ءَ چماں شانک دئے ءُ چارے اے گُلامی اِنت ، اگاں ما پہ دائمی ایمنی لوٹ اِیں گڑا مارا وتی گلامی ءِ ھاتر ءَ جنگ کنگی اِنت داں بلوچ چہ اے ناشرکاریں پاکستان ءِ گلامی ءَ آجو نہ بوتگ ہر وھد ءَ ملکناز شھید کنگ بنت ءُ برمش ٹپّیگ ، بائدیں جیڑہ بْرمش ءِ جیڑہ لیکگ مہ بیت اے جیڑہ راجی جیڑھے ءِ نیمگ ءَ جنُزاں بِہ کنت ۔ اگاں اے وڑیں جیڑہ ءَ را ھاندانی جیڑھے لیک اِت ، اے جیڑہ پہ راج ءَ تبائی ءِ بیت ۔
انچوش کہ من ساری ءَ گْوشت 1971 ءَ جاہ ءِ آھُو ءِ تہ ءَ پاکستانی پوج ءَ اتا سمالاڑی ، مھبت ھان ، نیٹو بلوچ شھید کُتگ اَنت ءُ مات سومری ءُ پیراڑی گوں وت بُرتگ اَنت کہ انگت آھانی ھال نیست ، گڑا ما چار اِیں چہ آ وھد ءَ راج ءِ نا تپاکی ءَ چہ پد چینچو مات ءُ گْوھار بیگواہ کنگ بوت گاَنت ءَ چینچو شھید کنگ بوتگ آ جیڑہ ءَ را باگیانی جیڑھے نام دیگ بوتگ ۔ چہ راج ءِ ھاموشی ءَ مارا اے گُلامی ءَ چینچو تاوان داتگ ۔ ھما سومری ءِ بچّ میر مولابکش مھمدھسنی ءِ نام ءَ زانگ بیت ، مرچی پاکستان ءِ کُشندہ ٹولی ءِ ھمراہ اِنت ءُ راج دُژمن ءِ نام ءَ زانگ بیت ۔ اگاں راج وتی بْرمشانی سلامتی ءُ پھازگ ءَ لوٹ اِیت گڑا اے جیڑہ تھنا بْرمش ءِ جیڑہ نہ اِنت ، بلکیں یک راجی جیڑھے ۔ پہ راجی جیڑھے گیش ءُ گیوار ءَ آجوئی ءِ جُھد ھژدری اِنت ، اگاں نا گُلامی ترا پہ دائِمی بیگواہ کنت ۔
دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔