ڈنُک ویل ءِ بگیری ءَ برلن ءَ زھرشانی کنگ بیت

برمش یکجاھی کمیٹی جرمنی ءِ نیمگ ءَ چہ شنگ بیتگیں درشان ءِ تھ ءَ جار پرینتگ ءُ گوشتگ کہ جرمنی ءِ شھر برلن ءَ کیچ ءِ دمگ ڈنُک ءَ بوتگیں ویلے بگیری ءَ سینزدہ جون ءَ زھر شانی کنگ بیت۔

درشان ءِ تھءَ گوشگ بیتگ کہ کیچ ءِ دمگ ڈنک ءِ ویل ءَ شھید بوتگیں مات ملک ناز ءُ آئی ءِ چورو ایں جنکو برمش بلوچ ءَ ھک ءُ انساپ دیَگ ءِ ھاتر ءَ سرجمیں بلوچستان ءَ زھرشانی برجاہ اِنت-

درشان ءِ تھءَ دیمترءَ گوشگ بیتگ کہ بلوچستان ءَ سرکار ءِ چیردستی ءَ کارکنوکیں ڈیتھ اسکواڈانی ھلاپ ءَ گوں تُرندی ءَ توار چِست کنگ ءَ اَنت۔ ھمے یکشلہ برجاھیں زھرشانیانی ھمراھی ءَ سینزدہ جون شمبے ءِ روچ ءَ ماں جرمنی ءِ شھر برلن ءَ ھم زھرشانی کنگ بیت –

برمش یکجاھی کمیٹی ءِ باسکاں درشان ءِ جرمنی ءَ نندوکیں سرجمیں بلوچاں گوں دز بندی کُتگ کہ آ اے زھرشانی ءَ بھر بزور اَنت ڈُنک ءِ وئیلے بگیری ءَ توار چِست بہ کن اِت-

آھاں گُشتگ زھرشانی ءَ بھر زوروکیں کلیں سنگت کرونا وائرس وڑیں وبایے رکگ ءِ ھاتر ءَ ماسک دپ ءَ کنگ ءِ ھمراھی ءَ کمو کمو گستا بہ بہ اِت ءُ وتی ھیال ءَ بدار انت.