آزمانک: شکاری گریکُس
آزمانکار: فرانز کافکا
رجانک: میار بلوچ
اولی بھر
دی بلوچستان پوسٹ
تیاب دپ (پورٹ) ءِ دیوال ءِ سر ءَ دو بچک نشتگ ءُ گوں چَکّا (ڈائس) ءَ لیب ءَ اَت۔ یک مردینے ءِ گوستاک ءِ یاتگیریں سرپدانکانی (سیڑیانی) سر ءَ نشتگ ءُ روتاک وانگ ءَ اَت سگار داشتگیں بامرد ءِ ساھگ ءَ یک جنکوے وتی ٹب ءِ تھ ءَ چہ آبشار ءَ آپ پُر کنگ ءَ اَت۔ یک نبیبگ (فروٹ) بھا کنوکے وتی تور ءِ کش ءَ وپتگ اَت ءُ تیاب ءَ چارگ ءَ اَت۔
چہ ترنداپجاہ ءِ بچیں دروازگ ءُ دریگانی تھ ءَ چہ دو مردم شراب ورگ ءَ گندگ بیگ ءَ اَت۔ درنداپجاہ ءِ واھند ءِ دیم ءَ یک ٹیبلے سر ءَ نشتگ ءُ وابینگ اَت۔ یک کسانیں لانچیں انچش تیاب دپ ءَ کسانیں اوشتارینتگ جاہ ءِ نیمگ ھاموشی ءِ سر ءَ پیداک اَت، گش ئے زاناں اے آپ ءِ سر ءَ جُنزینگ ءُ دیم ءَ آرگ ءَ اِنت۔ یک نیلیں جیکٹ گورائیں مردینے ءَ چہ لانچ ءَ بُست کُت ءُ کُنڈ ءَ اَتک ءُ سادے ءَ چہ یک آسنے ءِ تھءَ چہ گوازینت ءُ بندگی بندات کُت ۔ لانچ ءَ ایر کپتگیں مرد ءِ پُشت ءَ دگہ دو مردم ایر کپت کہ سیاھیں رنگیں کوٹ اِش گور ءَ اَت کہ چاندی ءِ بٹن اِش لگوگ اَت، یک جون بروکے گون اَت اِش، آئی سر ءَ ایریں بکملی گُد کہ کنڈ ءَ پُل دروشم ءِ نکش اڈ اِت اَنت ایشی ءِ چیر ءَ الم مردمے لیٹیتگ اَت۔
کس جیٹی ءَ نوک اتکگینانی آیگ ءِ درگت ءَ دلگوش گور نہ اَت، داں انچوکہ کہ آیاں وتی جون بروک جھل ءَ ایر کُت ءُ پہ وتی لانچ ءِ ناھدا ءِ وداریگ اِت اَنت کہ آ داں انگت گوں ساد ءَ مانگیشتگ اَت اَنت۔ کس آیانی کر ءَ نہ شُت، کس ءَ یک جُستے ھم نہ کُت، کس ءَ شری ءِ سر ءَ چارگ ءِ ھم جھد نہ کُت۔
لانچ ءِ واھند ءَ یک سر پچیں چُک ماتیں جنین آدمی کہ چُک گوران اَت آئی ءِ سوب ءَ گیشتر اوشتگ کپت کہ آ برز ءَ گندگ بیگ ءَ اَت۔ آ پد ءَ دیم ءَ شُت، یک نزیک گندگ بیوکیں زردیں دو تبکیں لوگ ءِ نیمگ ءِ دز چِست کنان ءَ کہ چہ آپ ءِ یکدم چپ ءِ نیمگ ءَ ھشکاوگ ءِ سر ءَ اَت۔
جون بروکاں پد ءَ وتی بار بڈ ءَ کُت ءُ یک کسانیں بلے وش جوڑکتگیں کمباھانی دروازگ ءِنیمگ ءَ برُت۔ یک کسانیں بچکے ءَ ھمے دمان ءَ یک دریگے پچ کُت ءُ دست کہ چون اے ٹولی لوگ ءِ تھءَ چون زیت گار بیت ءُ دریگ ئِے پد ءَ زیت بند کُت۔ نوں دروازگ ھم بند اَت۔ اے سیاھیں داراں گوں اڈ بیتگیں مھکمیں دروازگے اَت۔ کپوتانی یک ٹولی یے کہ ٹاور ءِ سر ءَ بستگیں گھنٹی ءِ چاریں نیمگ ءَ بال کنگ ءَ اِت اَنت، لوگ ءِ دیم ءَ اتک اَنت ءُ نشت اَنت ۔ کپوت دروازگ ءَ دپ ءَ یکجاہ بیت اَنت، انچش گمان بیت کہ پورا ایشانی ورگ لوگ ءِ تھءَ ایر اَنت۔ چہ ایشاں یکے ءَ بال کُت ءُ اولی تبک ءَ شُت دریگ ءَ چنب ءِ جنگ بندات ئِے کُت۔ اے وش رنگیں، شر رُودینتگیں، مُرگ اِت اَنت۔لانچ ءَ سواریں جنین ءَ چنک پُر کُت ءُ پہ مرگاں دان ریتک۔ اے دانانی ورگ ءَ پد مُرگاں بال کُت ءُ دیم پہ جنین ءَ شُت اَنت۔
یک مردینے کہ آئی ءَ دراجیں کلاھگ سر ءَ اَت کہ رنج ءِ چیدگ لگوگ اَت یکیں چہ کسانیں، تنگیں، کشکاں چہ اتک کہ ھمے کِشک دیم پہ تیابءَ روگ ءَ اَنت۔ آئی ءَ گوں تیزی ءَ اِنگور آنگور چارت۔ آ ھمک ندارگاں زھر کُت۔ آئی ءَ کُنڈ کپتگیں لھتیں کچراھانی گندگ ءَ پد دیم چوٹ کُت۔ یاتگیریں سرپدانکانی سر ءَ لھتیں نیبگانی (فروٹانی) پوست کپتگ اِت اَنت۔ انچش کہ آ چہ اود ءَ گوزگ ءَ اَت آئی ءَ وتی لَٹ ءِ گوما چہ آود ءَ کنزینت اَنت۔
آئی ءَ لوگ ءِ دروازگ جت، داں ھمے وتی سیاھیں کلاہ ءَ گوں راستیں دست ءَ کشگ ءَ اَت کہ دست ءَ ھم سیاھیں دستی پوشے پوشیتگ اَت۔ دروازگ زیت پچ بیت، ءُ کساس پنجاہ کسانیں بچک، دو جتاھیں ٹولیانی تھءَ لین ایش جوڑ کُت ءُ آئی ءَ دیم ءَ سر جھل کُت اِش ءُ سلام اش کُت۔ لانچ ءِ نا ھدا جھل ءَ اتک، ھمے واجکار ءَ دوچار کَپت ءُ بُرز ءَ بُرت ئِے۔
روان اِنت
دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت