برمش مارا انساپ بہ دے – سکی ساوڑ

نبشتانک: برمش مارا انساپ بہ دے

سیاستدانانی نمدی یے پہ برمش ءَ

دی بلوچستان پوسٹ

نبشتہ کار: سکی ساوڑ

وھد: سُھب ءِ نُھ

روچ: چار شمبے

رمس: 2 جُلکان( جون) 2020

دراہ بات ئے برمش

ما کُل وش ءُ جوڑ ایں، مارا انچکیں کارے نہ بوتگ کہ ما لاگر ءُ بزگ بہ بہ ایں بلے کرونا ءِ سَواب ءَ ھچ جاہ ءَ روگ بوگ ءَ نہ اِنت، پمیشکا ماشاءاللہ ما کمو گیش زَنڈ ھم بوتگ ایں، تو انچوش بہ پھم بلکل ما بروبر ایں ، بلے تو مارا کمو پریشان کرتگ ءُ چَہ ترا انساپ ءِ تلبگاری ءَ اے نمدی ءَ ما کُل بلوچ مُلکار ( سیاستدان) نبشتہ کنگ ءَ ایں ءُ اُمیت اِنت تو مئے سر ءَ بزگ کن ئے ءُ مارا انساپ دے ئے، تو مارا سک لاچار کرتگ کہ ما وتی داشتگیں مردمانی ھلاپ ءَ توار چِست بہ کن ایں، ترا باور کنت ما ناں آپ ورگی ایں ناں نان، پمیشکا ما توار چِست کنگ ءَ ایں دانکہ مھلوک ءِ شک مئے سر ءَ مہ روت بلے مھلوک انگت مئے سر ءَ شَکّو شَکّو اِنت پمیشکا ما گیش گنوکی ءِ آماچ بوان ایں، ما سُھب ءَ داں شپ ءَ سھڑگی دو دو گولی مہ وریں باور کن مارا نا واب کیت ءُ نا ما سَھڑ اِت کن ایں، اگاں ترا باور کنت ما سک بزگ اِیں بلے اے مئے کوھیں دل اِنت ما ڈن ءَ در آھتگیں یا وتی مردم ڈن ءَ در کرتگ اَنت، اگاں ما در مہ کن ایں گڑا ما گنتر بزگ بہ ایں، اے گپ ھست کہ ما یک پارٹی یے دومی پارٹی ءِ ھلاپ ایں بلے مروچی اے جیڑہ ءِ واستا ما درست یک ایں پرچاکہ اے یک پارٹی یے ءِ جیڑہ نہ اِنت کہ آئی ءِ پارٹی یا مُلکار بزگ ءُ رسوا بنت بلکیں اے مئے درستیں مَلکارانی جیڑہ اِنت کہ ما درست ھمے کار ءَ گون ایں.

راستیں گپ ھم ھمیش اِنت ما وت ءَ کمو پیشدارگ لوٹ ایں پرچاکہ تو اے گپ ءَ کمو سرپد ئے اد ءَ ھمے دُود جوڑ بوتگ، بلے تو مارا یک کسانیں موھے ھم داتگ ما وت ءَ مھلوک ءِ دیم ءَ پیشبدار ایں دانکہ مردم ھمے بہ پھم اَنت ما آوانی دردوار ایں.

برمش جان تچکیں گپ وَ ایش اِنت اد ءَ ما موہ پَٹّ ایں داں کہ مارا موھے بہ رس اِیت ءُ ما وتی راجکاری( سیاست) ءِ بان ءَ مھکم بہ کن ایں ءُ ھمے پیشبدار ایں اگاں اد ءَ دردوارے ھست اگاں اد ءَ لَج پھازوکے ھست گڑا آ ما ایں، اد ءَ ما اے ھم گْوش ایں”بلوچ راج ءِ سر ءَ کہ زُلم بوگ ءَ اِنت،ھمیشی ءِ بَگیر ءَ ما توار چست کرتگ ءُ کنگ ءَ ایں دانکہ گُڈی گچینکاری ءَ ما سوبمند بہ بہ ایں، پرچاکہ اے راجکاری ءِ یک مزنیں بھرے، راجکاری ءِ واستا مردمانی کُشگ ءُ پد ءَ ھما کوش ءِ ھلاپ ءَ توار چِست کنگ ھم یک بلاھیں پندل ءُ سوبمندی یے، اد ءِ راجکاری ھمے وڑ اِنت، اد ءَ تئی وڑیں زھگانی کُشگ یا زَدگ کنگ انچکیں مزنیں جیڑھے نہ اِنت تو زندگ بہ ئے یا مِر ئے اے ھم انچکیں مزنیں جیڑھے نہ اِنت بلے مزنیں گپ ایش اِنت ما ھمے ویل ءَ چَہ وتی راجکاری دکان ءَ چینکس سِینگار اِت کرت کن ایں اے چیز مئے واستا گیش ارزشت دار اِیت، اد ءَ ما موہ پَٹّ ایں، اد ءَ مروچی یکیں تو ءُ تئی ماس نہ بوتگ اِت کہ کیچ ءِ تہ ءَ تِیر وارتگ ءُ زدگ یا شھید بوتگ اِت بلکیں سرجمیں بلوچستان ءِ دلبند ءَ ما ھمے بادشاھی ءَ کنگ ءَ اِیں، روچے یکے ءِ گِس ءَ دَور کن اَیں ءُ شھید ءُ بیگواہ کن ایں، گِس ءِ تہ ءَ یک کاری ئیں چیزے پَشت نہ گیج ایں، بلے اے کسہ ءَ یلہ کن ………
برمش تئی لک منت کہ تو مارا اے وڑیں موھے بَکشاتگ کہ ما گیش وتی راجکاری پندل مھکم بہ ایں بلے اے بَری کمو ما بیوار ایں بلے جھد برجاہ اِنت ما باج بہ بر ایں، تئی ءُ تئی ماس ءِ اے کُربانیاں داں جھان ھست ما پراموش کرت نہ کن ایں،مروچی تئی ءُ تئی ماس ءِ سَواب ءَ ما ھمے نیمون ءَ وتی پارٹی ءِ بیرک زُرتگ ءُ شمے واستا توار چست کنگ ءَ ایں کہ ” برمش کو انصاف دو” تو بہ گْوش چَہ اے وڑیں موہ ءَ دیم دگہ موہ کجا بوت کنت؟ بلے بھتاور تو مارا سک بیوار گپِتگ، انگت اللہ ءِ شگر اِنت اے ناسرپدیں راج اے گپ ءَ سرپد نہ اِنت اے دُز ءُ ڈنگ کے ءَ جوڑ کرتگ اَنت ءُ ایشانی مستر ءُ کستر کے اِنت؟ چو مہ بیت یکے شُومی یے بہ کنت ءُ مئے نام ءَ بہ گِیپت کہ دُزانی پُشت مُلکار( سیاستدان) اَنت، پمیشکا مروچی ما وتی رکینگ ءِ ھاتر ءَ اد ءَ گرم ءِ جَل ءَ توار چِست کنگ ءَ ایں پرچاکہ مئے پارٹیانی راھبند کہ ھست اَنت ھمے راھبندانی شِک لمبر چارمی ءِ تہ ءَ ھم ھمے مان اِنت

” بلوچ راج ءِ سر ءَ ھرچ زوراکی یے بوت گڑا پارٹی درستاں چَہ پیش توار چِست کنت ءُ دانکہ انساپ نہ رس اِتگ پارٹی ھاموش نہ بیت توری پارٹی ءِ ھر یک باسکے ءِ سرانی دیگ بہ لوٹ اِیت انگت پارٹی چَک ءُ پد نہ بیت”
تو انگت بہ گْوش کہ توار چِست نہ کرتگ ، بس اللہ مارا وشنام بہ کنت راج دگہ مزنیں کوکار ءُ جاکے مہ کنت، ما جھد ھم کنگ ءَ ایں ءُ چیرُکائی مئے درستیں پارٹیانی یک مزنیں دیوانے ھم بوگ ءَ اِنت ءُ ما ترا انساپ دے ایں دگہ بازیں لوٹے مہ کن بس تئی ماس ءِ کُشوک ءُ تئی زدگ کنوکاں بندیگجاہ ءَ دیم دے ایں، گوں تو دزبندی اِنت دگہ باز کوکار مہ کنائین چو مہ بیت راج ءِ دست مئے گُٹ ءَ بہ رس اِیت ءُ اللہ مہ کنت مارا دُزانی مستر بہ لیک اَنت.

برمش جان بچار دگہ باز کوکار مہ کنائین کہ شر نہ اِنت پرچاکہ مئے راجکاری ءَ ھوار ما ھم تاوان ور ایں، مئے گُٹ سک ھشک اِنت باور کن سک بیوار ایں، مروچی دوازدہ سال ءَ پد ماں کیچ تربت ءَ شھید پِدا چارراہ (چوک) ءِ سر ءَ مزنیں مُچی یے گندگ بوتگ، وھدے مارا اے اکس سر بوت اَنت کہ ھزاراں مردم شھید پِدا چار راہ (چَوک) ءَ مُچ اِنت باور کن مئے گُٹ ءَ آپ نہ شت، گوں تو دزبندی اِنت ھمے توار ءَ بے برمش بہ کن، تئی نام برمش اِنت واکی تو برمشے چِست کرتگ بلے بھتاور تو وتی نام ءِ بزانت ءِ وڑ ءَ مہ کرتیں، ما چَہ ترا دزبندی کن ایں مارا انساپ بہ دے ، ما تئی دست ءُ پاداں کپ ایں تو ھمے توار ءَ ھلاس بہ کنائیں، باور کن تو سرجمیں بلوچ راج چست کرتگ مروچی پنجگور ءَ ھم زھرشانی اِنت، بلیدہ ، ھاران، دالبندین، نوشکی، واشک ءُ بیسمہ ءَ ھم زھرشانی بوتگ، پسنی ءُ کراچی ءَ ھم بوگ ءَ اِنت، ترا چونیں دردے دل ءَ اِنت کہ تو مارا سزا دیگ لوٹ ئے، اگاں ما بزانتیں شمے گِس ءَ پہ دُزی ءَ دیم دیگ ءَ اے وڑیں جاک ءُ سَلوات بوتگ اَت مارا نسوا ء توبہ اَت ما دُزی ءَ دیم بہ داتیں، اللہ زانت ما نہ زاتگ اے وڑیں توارے چِست بیت، ما ھمے پھم اِتگ پیش ءِ وڑ ءَ کس ھچ توار نہ کنت ءُ توار چِست نہ بیت.

برمش جان پھل کن ما گوں اے مزنیان پریشانی ءَ بے ھیال بوت ایں، گپ ایش اِنت ما تئی ماس ءَ را سرکاری نیمگ ءَ شھیدی ءِ درجہ داتگ، باید اِنت تو اے گپ ءَ وش بہ بَے، اللہ مہ کنت ءُ اے گپ ءِ کنگ ھم شر نہ اِنت اگاں تو ھم بیران بوتیں ما ترا ھم سرکاری شھیدی ءِ نام داتگ اَت پرچاکہ اے مئے راجکاری ءِ یک بھرے اے بھر ھمک مردم ءَ را نہ رس اِیت اے پہ ھما مردمانی واستا اِنت کہ آوانی تاوان دیگ ءَ پد ما سک بیوار بہ بہ ایں گڑا ما وتی ھمے پندل ءَ کارمرز کن ایں، شمے واستا مئے دگہ دادے ھم ھست آ ھم ھمے وڑ ءَ اِنت، اگاں ما بہ لوٹ ایں کسے ءَ را ناشرکار، کسے ءَ دز ءُ گناھگار، کسے ءَ را کُشندہ ءُ ھونی ءُ کسے ءَ را کاپر ءِ داد ءَ ھم بکشات کن ایں پرچاکہ اے مئے جھدانی برورد اِنت ءُ راجکاری ءِ بھرے ھم.

مئے نُکانی ھُشک کنوکیں برمش یکبرے پد ءَ ما گوں تو دزبندی کن ایں تو اے توار ءَ ایرموش بہ کنائین ءُ ما جھد کن ایں دگہ وھد ءَ وتی اے پندل ءَ کمو بدل کن ایں، پرچاکہ اے نوں بے سوب بوت،اُمیت اِنت تو ھپتگے کپے ءَ داں اے توار ءَ ھلاس کنائین ئے.

ہم کو انصاف دو
تئی انساپانی تلبگار تئی دیار ءِ لنگڑ ءُ ایمانداریں کُلیں مُلکار

دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت