نبشتانک: آزمانک :۔ بانُکیں جَنّک
نبشتہ کار :۔ بلوچ ھُسین
دی بلوچستان پوسٹ
پاولوکونیلھو وتی کتاب الکیمسٹ ءِ تھ ءَ گوش ایت “یک چیزے آگاں تو دل ءَ گوں بِہ لوٹ ئے دگنیا ءِ درستیں تَاکَت یکجاہ بنت آ چیزے ترا دیگ ءِ واست ءَ بَلّے من ءَ باور نہ بوت اے گپ ءِ سر ءَ من گوش آں دانکہ تئی جِند پہ ھما چیزے جھد مہ کنت آ چیز بے تئی نہ بیت انچوش کہ یک بلوچی ءِ شائرے گْوش ایت شوھازگ ءَ ھزار رَسِ ایت آ بَلّے نہ رَس اِت چونیں چونیں دوست ءُ یار رَس اِت انت آ بَلّے نہ رَس اتگ شائر ءَ راست گوشتگ آ نہ رَسِ ایت دَانکہ تو پہ ھمائی ءَ جھد مہ کن ئے۔
منی کَسّہ چَہ ھمد ءَ بندات بیت آ من اولی رند ءَ یک شمبے روچ ءَ تراون ءِ سر ءَ دیستگ ءَ کہ نَگَنْ ئِے پَچَگ ءَ اَت موسم سک گرم اَت انچوش سما بوت کہ مرچی ھُدا دوزہ ءِ دپ تربت ءِ نیمگ ءَ پچ کُتگ آزمان ساپ اَت گْوات لھم لھم ءَ کشگ ءَ اَت اے گرم ءَ گوات ھم نادراہ ئِے کُتگ اَت من گْوات ءِ نارگانی آواز ءَ اشکنگ اَت آں بَلّے آ اے گرم ءِ ٹاک ءَ ھچ نہ مارگ ءَ اَت ھمّے گرم ءِ تہ ءَ تَرُونْ ءِ سر ءَ نشتگ ءُ وت کول کنگ ءَ اَت ءُ وت تَرُونّ ءَ نگناں جنگ ءَ اَت۔ ھمّے دمان ءَ آئی ءِ مات آتک ءُ کمو ناں تلاہ اَت ءُ گوشت ئِے نگن ءَ بور کہ تو سُھب ءَ شَری ءَ اَرَزبند نہ کُتگ بَلّے آئی سر جھل اَت نَگَنْ ءَ پچگ ءَ اَت۔
ھمّے دمان ءَ یک پسے آتک ءُ ھمّے تلاہ ءِ نگناں دپ جنگ ءَ لگ اِت آئی ءَ تَرُونْ ءِ شو ءِ چِست کُت پس را جت ئِے۔ رَپَٹَگ ءَ لگ اِت من ءَ انچوش سما بوت کہ آ گوشگ ءَ اَت من ءَ گرم ءَ دل سیاہ کُتگ یکے تو بوت ئے منی دل سیاہ کنگ ءَ آتکگ ئے چونیں جاھلیں پسے۔
بوت کنت کہ آ چُش گْوشگ ءَ نہ بوتگ من چہ وتی لوگ ءِ دَریگ ءَ اے درسیں نِدَارَگْ چارگ ءَ اَت آں من آئی آواز اَشکنگ نہ اَت آں۔ پد ءَ آئی تیز تیز ءَ وتی گشان ءِ لمب زُرت وتی دیمّ ءِ ھید پھک کُت اَنت ءُ لھیں ٹَالْ زلپ کہ دیم ءَ شنگتگ اَت آں شَر ئِے کُت انت پد ءَ نگن ءِ پچگ ءِ بندات کت
انچوش سما بیگ ءَ اَت کہ آ گرم ءَ پَکّ دل سیاہ کُتگ آئی ھید چہ پیشانی ءَ پیڈگ ءَ اَت اَنت ءُ تَرُونْ ءِ تہ ءَ کپگ ءَ اَت انت پرچی ءَ کہ تَرُون ءَ دوت کُتگ ءَ اَت ،اے دوتاں پورو جنت ءِ وش بوے آؤرت پد ءَ دومی نیمگ ءَ من ءَ یک بلاھیں کتابے ونگ اَت آں کہ آ لیوٹلسٹائی ءِ” جنگ ءُ امن” اَت،
من ءَ پد ءَ ھمے دمان مار اِت آ ھم یک جنگ ءِ کنگ اِنت گوں گرم ءُ تبد، لِوار ءَ من ءَ سک باز بژن بوت کہ چونیں شوکیں شررنگیں کاڑے مال ءُ دولت ءَ چہ یک آباد ءُ سیرین سر زمین ءِ واجھے آئی سرزمین ءَ گیس تیل اے دیگہ درستیں امبار ھست اَنت بَلے آئی ءِ نسیب ءَ بس ھمّے دوت ءَ ابید ھچ نیست۔
وھد گوزان اَت من ءَ پہ ونگ ءِ وست ءَ ابا ءَ شال ءَ دیم دات شھدربرجاہ من وانگ بِندات کُت ھالت ءُ جَاوَر ھم وش وش نہ اَت اِنت پمیشکا من دو سال ءَ لوگ ءَ نہ شُت آں۔
یک روچے ءَ شال ءِ شھدربرجاہ لھتیں نوکیں نودربر آتکگ اَت آ گوں بلوچی پوشک ءَ سک باز زیبا اَت انت۔ من ءَ منی یک سنگتے ءَ گوشت کہ چہ تربت شھدربرجاہ ءَ لھتیں نودربر اتکگ ءُ مرچی مئے شھدربرجاہ اے نودربراں چہ تربت شھدربرجاہ ھال ءَ پاکستان ٹوار بوتگ بیا رو ایں کہ منی ناکوزتکے گون اِنت گوں من ءَ گْوشتگ ئِے بیا ترا گِند آں کہ ما بیگاہ دو ءِ ساھت ءَ تربت ءَ روگ ءَ ایں گُڑا من گْوشت ھو رو ایں”
گُڑا ما آئی ھمراہ ءَ آئی ناکوزتک ءِ کِرّ ءَ شُت ایں کہ من دیست ءُ ھیران بیت آں آئی ءِ ھمرے ءَ ھما تَرُونْ ءِ سر ءِ جنک ءَ منی ھمساھِگ من دو سال ءَ پیسر دیستگ اَت من ھیران بیت آں اے ھما بانُکیں جَنّک اِنت کہ آ ھرشپ منی واب ءَ کیت من آئی ءَ گِندگ آں ھر ساھت ءُ دمان ءَ دوا کُتگ آئی گندگ گوں من باز گل بیت آ ساھت ءَ گوش ئے وھد اوشتاتگ۔ بَلے من ءَ ھمت نہ بوت کہ من آئی ءِ گون ءَ گپ بہ کن آں ءُ آئی بہ گْوش آں کہ تو من ءَ سک باز دوست بَہ ئے تو ھر شپ ءَ منی واب ءَ کا ئے منی روکیں دل ءِ تَرُونْ ءِ آس ءَ وتی نَگَنْ پچ ئے بَلّے من ھچ ھبر کُت نہ کُت من گُنگ اَت آ ساھتاں .
چَہ ھمد ءَ من ءَ باور بوت پاولوکونیلھو ءِ ھما گپ ءِ سر ءَ اگاں تو چیزے چَہ دل ءَ بِہ لوٹ ئے دگنیا درستیں تاکت یکجاہ بنت کہ آ چیز تئی بہ بیت بَلے شرت ھمیش اِنت کہ تو پہ ھما چیزے وست ءَ جُھد بِہ کن
بَلّے منی جھد نزورْ اَت منی جُھد گوں سرکاری نوکری ءُ روزگارے بندوک اَت یک شپے ءَ من ءَ ھال ءَ گپت کہ مرچی آئی ءِ آروس بیتگ من پرشت آں من ءَ ھمے گپ ءَ بژنی کُت کہ پرچا من آئی ءَ وتی دل ءِ پاکیں گپ نہ گْوشتگ ۔
دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔