برمش ءُ راستیں جیڑہ – زیردان بلوچ

نبشتانک: برمش ءُ راستیں جیڑہ

نبشتہ کار: زیردان بلوچ

دی بلوچستان پوسٹ

26 مئی ءَ ضلع کیچ ءِ بُنجاھی شھر تربت ءِ دمگ ڈنک ءَ سے دُز یک لوگے ءَ دور کن اَنت ءُ اود ءَ ساڑی ئیں زالبول ملک ناز “مزاھمت” کنت گڑا دُز آئی ءَ تیر باران کن اَنت آ ھما دمان ءَ شھید بیت ءُ آئی ءِ چار سالی ئِیں جنکو برمش ھم تیر وارت ءُ ٹپی بیت، اے اولی ویل نہ اِنت ءُ اے گُڈی ویل ھم نہ بیت دانکہ ما گوں راستی ءُ تچکی ءَ پاد میا اِیں ءُ جھد مہ کن ایں-
اے وڑیں ویل ھمک روچ بلوچستان ءِ ھمک جاگھاں بوگ ءَ اَنت ءُ ھرکس ھم سرپد اِنت کہ اے کاراں کے کنگ ءَ اِنت ءُ کئی سرکماشی ءَ بوگ ءَ اَنت بلے مات ملک ناز ءِ ھمّت ءُ دلیری ءَ اے دُزانی دبوکہ دور کت ءُ سرجمیں راستی دیم ءَ آؤرت ءُ دراھیں مردم چیدگ کت اَنت-

اے دراھیں دُز پاکستان آرمی، آئی ایس آئی ءُ ایم آئی ءِ داشتگیں کارمند اَنت اِشاں سِلاہ ھمے سرکار ءَ داتگ کہ ھرچی کن اِت شمارا اِجازت اِنت بس منی ھلاپ مہ بئے، آئی ایس آئی ءُ ایم آئی ءَ ابید اے دراھیں دُزّ پارلیمانی گلاں چہ سیادی دار اَنت ھُورت چاری بہ کن ئے اے درست بی اے پی، نیشنل پارٹی، بی این پی مینگل، بی این پی عوامی، جمیعت علمائے اسلام ءَ ھوار ھرچ کہ پارلیمانی گلے ھست اے گُنڈہ ھمے مردماں پہ وتی سیتّانی ھاتر ءَ داشتگ اَنت ءُ اِشاں ھندی دُز ءُ دلّار اشانی سروک کتگ اَنت چُشکہ یاسر بھرام، ابوبکر دشتی، راشد پٹھان، بابو ڈکیٹ، سمیر سبزل، پِدا ھکیم، میران ازیر ءُ اِشاں چہ ابید دگہ سک باز ھست کہ ھمے دُزّ ءُ دلّارانی سروکی ءَ کنگ ءَ اَنت گوں راستی ءُ ھورت چاری ءَ بلوچ راج اشانی پُشدر ءَ بچار اِیت داں دراھیں چیز پدّر بنت-

ڈنک ویل ءَ چہ رَند چش کہ بلوچ راج ءَ وتی توار بُرز کتگ ءُ لوٹ کنگ ءَ اِنت کہ دراھیں دُز ءُ دلّار بے سلاہ کنگ بہ بنت اے یک جوانیں گامگیجے ءُ لک ستا کرز اِیت کہ آیاں جیڑہ ءِ جند چست کتگ بلے اے جیڑہ ءِ راستی چی اِنت ءُ آ دگہ پارلیمانی گلانی زھرشانی ءُ مزمتی بیانانی مکسد ءُ مول ءُ مراد چی اِنت اے الم زانگ لوٹ اَنت اگاں نا ما تھنا ادارُکی ھمے یکیں جیڑہ ءَ بزور اِیں ءُ دیم ءَ بہ بر اِیں گڑا اے جیڑہ باندا ھلاس کنگ بیت ءُ پد ءَ ھما بیت کہ پیسر ءَ بوتگ-

اے مُچّی ءُ زھرشانیانی توک ءَ بی اے پی، نیشنل پارٹی ءُ بی این پی مینگل ءِ ٹوھیں باسک گندگ بوتگ ءُ آیاں ھم اے دُز ءُ ڈنگانی بگیری ءَ کوکار کتگ بلے کسّے ھست کہ آیاں جست بہ کنت واجہ شمے گلانی ھم داشتگیں سلاہ بندیں دُز ءُ ڈنگ ھست اَنت آ ھوں ساپ ءُ پلگار نہ اَنت آ پرچا سلاہ بند کنگ بوتگ اَنت؟ نیشنل پارٹی ءَ ھوار آ دگہ گلانی رھشون کہ اے جیڑہ ءِ سر گپ جنگ ءَ اَنت اشانی مکسد پہ “برمش” ءَ اِنساپ نہ اِنت اے وتی سیاسی “حریف” ءَ ایرجنگ ءُ وتی زھرانی درشانی ءَ دیم ءَ اتکگ اَنت ءُ اے دراھیں سلکاری، دُزی ءُ ڈنگی ءَ دراھیں پارلیمانی گل ھوار اَنت اے وت پد ءَ اے ھاتر ءَ گون اَنت کہ ھرکس وت ءَ را ساپ کنگ لوٹ اِیت، وھدیکہ گپ کیت بی اے پی {باپ} ءِ سر ءَ گڑا بی اے پی ءَ چہ درستاں دستے دیم ءَ اے و پاکستان آرمی ءِ جوڑ کتگیں پارٹی اِنت ءُ دراھیں دُز ءُ ڈنگ آؤرتگ ءُ ھمشی ءِ توک ءَ جاگہ داتگ اَنت گپانی مکسد اِیش انت کہ بلوچ راج اے کُلاں سرپد بہ بیت آ نا سرکاری جھگیرانی گپّاں ھاموش بہ بیت ءُ نا کہ دگہ پارلیمانی گلانی سر ءَ اوست ءُ امیتے بہ دار اِیت اے جیڑہ ءَ راجی جیڑھے سرپد بہ بیت ءُ جھد بہ کنت ھما وھد ءَ داں ھاموش مہ بیت دانکہ سرجمیں بلوچستان ءَ ریاست وتی داشتگیں گنڈہ ءُ دُزانی سِلاھاں پچ نہ گیپت- ءُ دومی آ دگہ پارلیمانی پارٹیاں اے راجی جیڑہ ءِ سر ءَ”پوائنٹ اسکورنگ” ءِ مُوہ مہ دے اِت، اگاں راستی ءَ زانگ لوٹ ئے شمے ھمے روانک ءُ زھرشانی ءَ ریاست ءُ آئی ءِ داشتگیں جھگیر جیڑگے ءَ دور داتگ اَنت آ نو سرپد اَنت کہ بلوچ راج ءِ توک ءَ سرپدی اتکگ آ نوں زانتکار اِنت وتی دوست ءُ دُژمن ءَ زانگ ءَ اِنت نوں پہ چانوگ واراں ھچ پشت نہ کپ ایت آ وتی ھرچ وڑیں وس ءُ واک ءَ کن اَنت کہ اے مردم ریپینگ ءُ ھاموش کنگ بہ بنت بلے جھدے کہ بِنا بوتگ گڑا باید اِنت اے آسرے ءَ برگ ءُ سر کنگ بہ بیت-
دومی نیمگ ءَ ھمے دُزانی سروک مزمتی بیان دیگ ءَ اَنت ءُ سادگیں بلوچاں ریپینگ لوٹ اَنت کہ ما بے میار اِیں چشکہ یاسر بھرام، ابوبکر دشتی، لالا رشید ءُ زھور بلیدھی ءَ ھوار دگہ سرکاری جھگیر نِشتگ ءُ مزمتی بیان دے اَنت شما زاناں چی گُش ئے یک نیمگے مردماں بہ جن اِت دُزی ءُ سلکاری بہ کن اِت ءُ دومی نیمگ ءَ بیا اِت وتی زُبان ءَ چَرپ بہ کن اِت ءُ دراجیں مزمتی بیان شنگ بہ کن اِت شمے کرتوت گڑا چیر بنت زاناں شمارا اے راج نہ زانت ءُ سرپد نہ اِنت؟ ھرکس زانت کہ اے دُزی ءُ سلکاری شمے سرکماشی ءَ چہ بوگ ءَ اَنت-

یاسر بھرام کہ مزمتی بیان دنت گوستگیں رمزان ءِ ماہ ءَ دشت ءِ دمگ اچانک بازار ءَ یاسر ءِ کارمند ملا ابدلکریم ء ملا مھمد رھیم جاہ منند دشت لنگاسی، ھاپِز نئیم ء سوپی شاہ دوست جاہ منند دشت کھیرین، ملا امان ء ھاجی اھمد جاہ منند دشت کروس تنک ءُ کاری جمیل جاہ منند گِھنہ اے زھگ ءُ زالبولاں لٹ ءُ کٹ کن اَنت لوگانی سامانانی ھواری ءَ آیانی گوشانی سُھراں کشّ اَنت ءُ بر اَنت گڑا ھمے میتگ ءِ مردم ھمّت کن اَنت پولیس ءَ ھال دے اَنت پولیس اشانی راہ ءَ بند ایت ءُ ڈی بلوچ ءِ دگ ءَ اِشاں گوں تُپنگ ءُ دُز اِتگیں ساماناں گیپت بلے ھما دمان ءَ یاسر گوں ایم آئی ءِ پنجاپی اپیسرے ءِ گوما تربت ءَ پولیس تھانہ ءَ روت ءُ پولیس کارمنداں ھبر ءُ ھال دنت ءُ گش اِیت کہ اے منی مردم اَنت اِشاں یلہ بہ دے ھمے وڑ ءَ دومی روچ ءَ مُپتی شھمیر ھم تھانہ ءَ روت کہ اے مردماں یلہ ہ دے پد ءَ لھتے روچ ءَ رَند اے دراھیں مردم یلہ کنگ بنت ءُ انگت ھم ھمے مردم یاسر ءِ ھمراہ ءُ گاٹ اَنت، دشت بل نگور، کپکپار ءُ کھیرین ءَ ھوار دگہ بازیں جاگھاں یاسر ءِ دُزی ءُ ڈونگیانی گواھی ءَ اود ءِ مردم انگت دے اَنت پد ءَ مرچی ھمے دُزانی جند وت اتکگ ءُ مزمتی بیان دے اَنت اڑے کمو شرم بہ کن اِت-
دشت بل نگور ءَ جامُل نامیں مردے ھمے یاسر ءَ گوں وتی گاٹاں جت ءُ دوکان پُل اِت، چارشمبے نامیں کماشے ءِ لوگ ءَ دور کت ءُ آئی ءِ سرجمیں زر بُرت اَنت ءُ آئی ءِ پیریں لوگ بانک ماسی مِھرک ءَ کہ مزاھمت کت گڑا ھمے یاسر ءَ آ گوں تُپنگی کُنداکاں ماں بند کُت چشیں سلکاری اے واجھاں ھزاراں کتگ-
ھمے یاسر بھرام ءَ کسّے جست بہ کنت کہ تو وتی جند ءِ میتگ کھیرین ءَ چنچو زالبولانی گوما کم شرپی کتگ شپانی نیم ءَ تو گوں وتی سلاہ بندیں ڈُنگاں مھلوک ءِ لوگاں دور کتگ کجام کار نہ کتگ باریں، گڈ سر ءَ مردم بیزار بوتگ اَنت آیاں وتی لوگ ءُ جاگہ یلہ داتگ اَنت ءُ لڈ ءُ بار اِش کتگ-

ابوبکر دشتی کہ وت ءَ را ساپ ءُ پلگاریں مردے کنت آئی ءِ دُز ءُ ڈنگیں کارمنداں چینچو رند ءَ دشت پرنٹ بازار ءَ درر کتگ ءُ زالبولانی گیرت ءِ گوما لیب کتگ ءُ آیانی اَکس گپتگ ءُ شنگ کتگ اَنت، دشت مُلائی نگور ءَ ھمے ابو ءِ داشتگیں مردماں زھگ ءُ زالبول لٹ جتگ اَنت ءُ بے اِزت کتگ اَنت، دشت شولیگ ءَ زالبول جتگ اَنت ءُ زاہ ءُ بد کتگ اَنت گوادر سربندن ءَ زالبولے ءِ گیرت ءِ گوما لیب کتگ ءُ آئی ءِ برھنگیں اَکس کش اِتگ اَنت اے واجہ درست ھمے مردمانی کار اَنت کہ مرچی نشتگ اَنت ءُ گش اَنت کہ برمش ءِ گوما اِنساپ بہ بیت، پیشکان ءَ ابو ءِ مردم یک لوگے ءَ دور کن اَنت ءُ زالبولاں جن اَنت آیانی سُھر، زَر ءُ موبائلاں گوں وت بر اَنت ءُ آیانی کھول ءِ مردماں بیھار دے اَنت اگاں شما اے درگت ءَ گپ کت ما شمارا چست کنائین اِیں، دشت زیارتی ءَ ابو ءِ داشتگیں گنڈہ اکبر ء ابدی، ناسر گوں ابو ءِ کستریں برات امران ءُ ایف سی ءِ سوبیدارے ءِ ھمراھے ءَ کماشیں ایسّا ءِ لوگ ءَ دور کن اَنت زھگ ءُ زالبولانی جنگ ءَ رَند کماش ایسّا ءَ گوں آئی ءِ چُک ءِ ھمراھی ءَ ھمے مردمانی جند آوار جن اَنت ءُ بل نگور ءِ بنجل ءَ سر کن اَنت اے واجہ ھمے مردمانی اسلیت اِنت-

زھور بلیدھی کہ مروچی نِشتگ بٹاک جنت آئی ءِ کرتوتانی جست ءَ برو اَت بلیدہ ءِ مھلوک ءَ جست بہ کن اِت کہ مردم کجام ھال ءَ کتگ انت ئِے، آئی ءِ کارمنداں ڈاکٹر تیّب ءُ آئی ءِ ورناھیں چک جت اَنت ءُ آیانی لاش چات ءَ دور دات اَنت ھمک روچ زھور ءِ داشتگیں گنڈہ لس مھلوک ءِ راہ ءَ بند اَنت ءُ آیاں پُل پانچ کن اَنت ھمے مردماں بلیدہ ءِ توک ءَ چنچو لوگ ءَ دور کتگ ءُ زالبول ءُ چُکّانی گوما سُبکّی کتگ اے چہ کس ءَ چیر نہ اَنت، زھور ءَ ڈاکٹر ھامِد ءُ آئی ءِ برات میّاہ ءَ ھژدہ گاٹ سلاہ بند کتگ ءُ داتگ کہ برو اِت دُزّی ءُ سیلکاری بہ کن اِت پد ءَ ھمے زھور کیت مات ملک ناز ءِ پُرس ءِ پتّر ءَ نِند اِیت ءُ بلاھیں بٹاک جنت کہ ما دُزّاں گِر اِیں واجہ دُز شما وت اِت شما مارا جَتگ ءُ اتکگ اِت مئے تماشاہ ءِ چارگ ءَ؟

میران ازیز ءُ شھمیر ازیر ءَ اِنچو تُپنگ ءُ سلاہ کے ءَ داتگ کہ ھمک روچ بلوچ دوداں لگتمال کن اَنت ءُ زھگ ءُ زالبول اِشانی لٹّانی چیر ءَ اَنت، درمکول، پیدراک، جمک، گورکوپ ءُ آ دگہ ھند ءُ دمگاں اِشانی مال ءُ متاہ دُزی ءُ ڈونگی اِنت اشاں لس مھلوک ءِ زندمان آس ءَ کتگ-

مند ءِ توک ءَ بابو ڈکیٹ ءُ برکت سیاھُک ءَ ابید نوں جلال ھان ءِ جِنک زبیدہ ءَ ھم لانک بَستگ کہ من پشت مہ کپ آں، مند ءِ توک ءَ سک باز سلاہ بندیں دُز ءُ سلکار ھست کہ آ تچک ءَ تچک زبیدہ جلال ءِ داشتگیں مردم اَنت کہ دُزّی ءُ بھتہ کُوری ءِ سر ءَ لاپ گِرگ ءُ ورگ ءَ اَنت-

اے درست سرکار ءِ داشتگیں مردم اَنت، سرکار ءَ اِیشاں سلاہ بڈ ءَ داتگ ءُ رودینتگ اَنت دُزی ءُ ڈُونگیاں ھوار اے ھمک روچ شرپ داریں ءُ کماشیں مردماں شھرانی توک ءَ کم شَرپ ءُ سُبک کن اَنت اے وڑیں بے زانت ءُ سلکاریں مردمانی بڈ ءَ کہ تُپنگ بیت گڈمڑا پدّریں گپّے کہ ھمک روچ یک ملک نازے شھید بیت ءُ یک برمشے چورہ ءُ ٹپّی بیت اگاں ما ءُ شما اے سلکاری ءُ ھراب کاریاں ھلاس کنگ ءِ جھد ءَ کن اِیں گڑا اے توار کہ بُزر بوتگ اے توار ءَ ھاموش بوگ ءَ میل اِیں سرکار ءَ کہ ھرچ مردمے سلاہ بند کتگ ءُ مزن کتگ آ دراھیں پدّر کنگ ءُ دیم ءَ آرگ ءِ ھواری ءَ بے سلاہ کنگ بہ بنت-

اے مردمانی پُشدر ءَ ھرکس سرپد ءُ زانت کہ اِشاں چَلّے بھا نہ بوتگ مرچی گاٹ ءُ پریٹ اَنت ھرکس ءَ ھژدہ ھژدہ گاٹ سرکار ءَ داتگ ءُ مزن کتگ نوں درست ھمیش اِنت لس مھلوک ءِ سر ءَ شیر اَنت ءُ ھمک روچ یک لوگے ءَ دور کن اَنت، اسل میار اِشانی ءُ اشانی واجکار سرکار ءِ نہ اِنت اسل میار بار ما وت اِیں کہ اے مردم ما آؤرتگ ءُ اد ءَ سرکتگ اَنت اے گوں تُپنگاں کسّے ءِ لوگ ءِ دپ ءَ شتگ اَنت گڑا مردماں وتی سر ءِ بان ءَ نادینتگ اَنت ءُ مروچی کہ مزن بوتگ اَنت کردار ھمیش اَنت مئے شمے دیم ءَاَنت-

دگہ یک راستیں گپّے ھم ھست سرکار ءَ اِشاں تپنگ و داتگ بلے اِشاں دگہ پنچ کلدار نہ دَنت اشانی مھار ئِے یلہ داتگ کہ برو اِت منشیات بھا کن اِت، مردم بُہ کش اِت، دُزّی ءُ سلکاری بہ کن اِت وتی لاپ ءَ درگیج اِت بس منی کار ءَ کار مہ دار اِت اے سرکار ءِ وتی جند ءِ پالیسی اِنت باید اِنت ما دراھیں چیزاں سرپد ءُ پُوہ بہ بہ اِیں گڑا آسرے ءَ شت کن اِیں، نادراھی ءِ جند ءَ کہ بزان اِیں گڑا اِلاج ھم درکیت-

نوں باید اِنت ما وتی دوست ءُ دُشمناں شری ءَ پجّاہ بیار ایں ھچ پارلیمانی پارٹی ءُ سرکاری جھگیر ءِ شِیرکنیں گپانی سر ءَناوست مہ کن اِیں ءُ وتی جُھد ءَ نزور یا ھلاس مہ کن اِیں بلکیں اشی ءَ ھمک ساھت ءُ کَترہ دیم ءَ بران بہ کن اِیں دانکہ دگہ برمشے چورہ مہ بیت اے دُزی ءُ سلکاریاں دراھیں پارلیمانی گلانی دست مان اِنت-

گڑا ما اد ءَ کس ءَ سیاست ءُ “پوائنٹ اسکورنگ” ءِ موہ مہ دے اِیں اے راجی جیڑھے ءُ اشی ءِ سر ءَ کس سیاست کنگ ءِ جھد مہ کنت گڈی گپ ھمیش اِنت کہ اگاں واکی ما لوٹ اِیں کہ دگہ ملک نازے شھید کنگ ءُ دگہ برمشے چورہ ءُ ٹپی کنگ مہ بیت گڑا تچکیں جیڑہ ءِ جِند گِرگ ءُ آسرے ءَ سرکنگی اِنت اگاں نا پد ءَ پیسری وڑ ءَ ھاموش بوت اِیں گڑا ھمک روچ دگہ ملک ناز ءُ برمشے وتی باریگ ءِ ودار ءَ بہ کنت داں ھمے وڑ ءَ اے آس میتگانی ھمک گس ءَ مان بہ دار ایت-

دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔