تربت ڈنک ءِ ویل ءِ بگیری ءَ مھلوک ءِ زھرشانی

تربت ءَ زھرشانی ءِ مُچی ءَ سدانی کچ ءَ مھلوک ءَ تپتگیں گرم ءَ ابید ھم بھر زرتگ –

بلوچستان ءِ شھر تربت ءَ مھلوک ءِ نیمگ ءَ ڈنک ء ویل ءِ بگیری ءَ بازیں کَچے ءَ زھرشانی کنگ بیتگ -چِل ءُ ھپت ڈگری گرمی ءَ ھم سدانء کچ ءَ زالبول، مردین ءُ چُکاں ویل ءَ زدگ بیتگءِ برمش ءِ مُزدگیری ءِ دگانی سر ءَ درکپتگ اَنت –

تربت شھر ءِ میانی دمگ شھید پدا چاراہ ءَ زھرشانی روانک ءخ نندانک جتگ، جتائیں سیاسی ءُ چاگردی مردماں ھوار ڈنک ءِ ویل ءَ جتگیں مردمانی کھولاں بھرزرتگ ءُ زھرشانی ءَ تران کرتگ –

گوستگیں ھپتگ ءَ تربت ڈنک ءَ شپ ءَ سلاہ بندیں مردماں یک لوگے ءَ دور کرتگ ءُ دُزی ءِ جھد کرتگ -ھمے وھد ءَ جنگ ءُ چوپ بیتگ ءُ سلاہ بنداں تیرگواری کرتگ چریشی ءَ چَہ یک زالبولے زدگ بیتگ ءُ چار سالی ئیں جنکو برمش زدگ بیتگ –

دمگی مردماں سلاہ بند دزگیر کرتگ ءُ پھزدارانی دست ءَ داتگ ءُ وھدیکہ تیرگواری ءَ زدگ بیتگیں برمش کراچی ءَ درمانی بیگ ءَ اِنت –

ڈنک ءِ ویل ءَ ترندیں رنگے ءَ مردم ایرجنگ ءَ اَنت -چاگردی رسانکجاھاں ویل ءِ بگیری ءَ زھر ءِ درشان ءَ کنگ ءَ اَنت ءُ سیاسی ءُ چاگردی پاٹیانی نیمگ ءَ سرکار ءِ سر ءَ ترندیں ایرادگری کنگ ءَ اَنت –

تربت ءِ زھرشانی کنوکیں مردماں گْوشت کہ مردمانی اے توپان مجرما ءُ آئی ءِ پلامرزی کنوکانی بگیری ءَ زھر ءِ درشانے- زھرشانی کنوکاں گْوشت کہ تربت ءِ شھر ءِ کش ءُ گوراں دُزی ءُ دازی ءِ درچ یک دراجیں مدتے ءَ چَہ برجاہ اِنت چریشی ءَ مھلوک ءَ جانی تاوان، مالی تاوانانی دیمپانی کنگ کپگ اِنت بلے سرکار ءِ نیمگ ءَ اے بارو ءَ ھچ گامگیج زورگ بیگ ءَ نہ اِنت –

زھرشانی کنوکاں لوٹ کرت کہ ڈنک ءِ ویل ءَ ھواریں مردم دزگیر کنگ ءُ آیانی ڈبیتگیں دیم ڈن ءَ کنگ بہ بیت -سرجمیں مکران ءَ اسپیت پوشیں گیرسرکاری سلاہ بند کہ چریشانی تہ ءَ لھتے نامی ئیں مردمانی پھزدار اَنت –

زھرشانی ءَ بیران بیتگءں ملک ناز ءِ گوھار ءَ تران کنان ءَ گْوشت کہ مروچی مئے لوگ ءَ اُرش بیتگ ءُ باندا دگہ کَسے ءِ لوگ ءَ اے ارش بیت کنت ءُ بنکی مجرم دزگیر کنگ ءُ آمید ءِ سر ءَ آرگ بہ بنت –

آئی ءَ گْوشت کہ مئے زھرشانی داں ھما وھد ءَ برجاہ مان اِت کہ مارا مزدگیری بہ رس اِیت –

زانگ بہ بیت ڈنک ویل ءَ پد تربت ءَ ھوار بلوچستان ءِ سرکاری ادارھانی ڈیتھ اسکواڈ ءِ سروکاں بھتامانی دیمپانی بیگ ءَ اِنت گوست ءَ ھم پاکستانی لشکر ءُ چیریں ادارھاں بھتام جنگ بیتگ –

نیشنل پاٹی ءِ بنجاھی سروک ءُ بلوچستان ءِ گوستگیں سروزیر ڈاکٹر ابدلمالک بلوچ ءَ پریس کانپرنس ءَ تران کنان ءَ گْوشت کہ ڈنک ءِ ویل مئے ھیال ءُ نزیک ءَ یک راجی جیڑھے ءِ بنیاد ءَ داریت – ریاست ءِ تہ ءَ نندک ءُ جوڑ جنگ ءُ زاتی لشکر ءِ ھکم کنگ کسے ءَ اجازت نیست، سیاہ شیشگیں گاڑیاں سواریں سی تیری دست ءَ ءُ بیرکے ءِ مک کنوک دگ ءِ میان ءَ اُوشت اَنت ءُ دگ ءَ بند کن اَنت وتی ھکم ءَ ھلائین اَنت اے چونیں تاگتوریں مردم اَنت کہ آیاں وتی زاتی گاٹ جوڑ کرتگ ءُ سلاہ بند اَنت ءُ تر اَنت ایمنی ءِ واب ھلاس کرتگ اَنت ءُ کجام ھم شریپیں مردے ءِ لوگ ءَ مانریچگ ءُ چکانی سر ءَ دست چِست کنگ –

نیشنل پاٹی ءِ بیان ءَ گوشگ بیتگ کہ وھدیکہ سرکاری سلاہ بندیں مردمانی زور اتکگ گڑا کیچ ءَ ھوار سرجمیں بلوچستان تنک آھورتگ ءُ آوار جنی، دزی، سیاسی باسکانی بیگواہ کنگ بلوچ ماتانی کمشرپ کنگ ءُ آیاں شھید کنگ ءِ ویل بیگ ءَ اَنت

ھمے وڑ ءَ برمش ءِ واستا چاگردی رسانکجاھاں کمپئن کامرد کنگ بیگ اِنت کیچ ءَ ھوار جتائیں جاھاں ویل ءِ بگیری ءَ زھرشانی بیتگ –