نبشتانک: برمش تو بےبرمش بو
نبشتہ کار: نبیل نود
دی بلوچستان پوسٹ
شُما مَلگ زان اِت بلے ائیپ کہ شُمئے آستیگ لُک اَنت
من ھیران آں کہ آل پارٹیز چی ءَ زھرشانی کَنگ ءَ اِنت ۔ دْراھیں دُز ءُ ڈُنگ ھمے آل پارٹیانی تہ ءَ اَنت ھمشانی داشتگین اَنت یک پاٹی یے اوں بے دُز ءُ ڈُنگ نہ اِنت کہ مردم ءَ اوپارے بُروت ۔۔۔
اے چہ کَے ءَ انساپ لوٹ اَنت ؟؟
اے تپلانی سر ءَ تیر جَنوکائی مرچی ناں چُنت دَھَک گْوستگ ءُ انگت برجم ءُ برجاہ اِنت.
سی سال ءَ پیش تپلیں یاسمین ءَ پہ تْرمپے آپ ءَ ھون ریتک ءُ جان دات ۔۔۔۔
، ما گِندیں کہ دْرست پوسٹ کنگ ءَ اَنت اے مسلہ آئیلائٹ انت گڑا ما وتی پوسٹاں دئیں گوں ۔۔ گِند ئے مسلہ سرد بوت ما دْرست ھاموش بئیں.
چُشیں مسلہ ھر سال پیداک اِنت ءُ بُوَگ اِنت مئے چم دیست اَنت ما گپ ھمود ءَ جَنیں کہ اود ءَ گپ بوَگ اِنت اود ءَ ھاموش بئیں کہ دْرست بےتِرْک ءُ توار اَنت.
اے دُز کمو روچ ، ماہ ءُ سال ءَ پَد پَد ءَ یلہ دَیگ بنت اے منی ایمان اِنت اشاں سزا دَیگ نہ بیت اِد ءَ کہ انساپ نیست ما چہ کَے ءَ انساپ ءِ لوٹ ءَ بکن ایں ؟ اگاں اشاں سزا رَس ات ھما روچ ءَ منی کبر ءَ لٹ بجن اِت.
ما پیسبک ءَ یک کمنٹے دئیں دنیا بدبارت کہ شما شھر ءِ امن ءَ ھراب کن ات، چونی ءَ مارا چہ اے تُپنگ ءُ تیراں چیں ازل ءَ بیم کَیت ۔ ما گڑا کجا بے امنیں مردمیں ۔ اِد ءَ آئی ءَ کلم دست ءَ اِنت بزاں بے امنیں مردمے ھمائی ءَ تُپنگ دست اِنت مردم کُشیت ھون ریچیت آ امن برجم کنگ اِنت ۔۔ ۔
اشاں کس جست نہ کنت ھرجاہ تپنگ گوں مردم جنت ۔ بلے یکے ءَ کلم گوں شئرے نبشتہ کنت اے، ھراب اِنت.
شُما بلوچے ءِ لوگءَ ودی بوتگ اِت شما بلوچ زالبولے ءِ چُک اِت بلے شمئے چماں چہ یک ترمپے بلوچُکی آپ اوں در نئیت ؟
دُزانی ھلاپ ءَ دُز روانک کَش اَنت دُزانی سزا دیگ ءَ ما دُزاں چہ امیت دار ایں ۔۔ چشیں سادگی کَسی بنجاہ ءَ مہ بات ۔۔ اِد ءَ وتی سیاسی دکاناں رش ءَ پچ کن اَنت کَئی سودائی باز بیت لس مھلوک انچش سربیتگ انت بزگ لوٹیت ھک وتی ھک ءِ واستا در کیت بلے نہ زانت کہ منی ھک کَےءَ وارتگ ءُ کجا پچ بگر آں.
اگاں ایش سزا دیگ بوت اَنت پَد ءُ چُشیں ویل ھلاس بنت ؟ برمشے تیر نہ وارت ؟ یاسمین پد ءَ تیر نہ وارت ؟
اگاں نہ وارت راج وَت اِشاں دْرنج ایت باردگپرے چُشیں ویل مہ بیت بلے اش سزا ور اَنت اشانی جاگہ دگے دارگ بنت دگہ برمشے تیرانی آماچ بنت دگہ ملک ناز وڑالیگ بنت ۔۔۔۔
اِد ءَ من دگہ زات ءُ دْرامدانی گِلہ ءَ نہ کناں چی ءَ کہ
دُشمن ءُ بدواھاں ھرچی گُشتگ اَت وَ گُشتگ اَت
تو کہ گُشتگ چہ دل ءَ مئیگ ءَ گلگداری نہ شُت.
چی ءَ کہ بلوچے بلوچے ءِ لوگ ءَ دور کنت ۔ بلوچ ءِ بلوچی ءِ ننگ ءُ ناموس ءَ پامال کنت وتی ھزاراں سالی دوداں پہ لگگز گاڑی یے ءَ لگتمال کُت کنت ۔
گوشت چہ ناکُن ءَ جُتا نہ بیت ۔ آ بلوچ ماتے ءَ پیدا کُتگ اَنت ءُ بلوچستان ءَ ودی بوتگ اَنت ۔ اشاں کہ وتی گھار ءِ گشان چہ زرءَ دیم ءَ تِر اِنت گڑا کئی گلہ ءَ کن ئے ؟؟؟
چاکر ھرچی یے بوتگ بلے میار جلیں بلوچے بیتگ گوھر آئی ءِ میار بوتگ کہ نہ داتگ ئِے.
دودا میار جلی ءَ پہ سمی ءَ جان دنت ۔۔ مروچاں میار بلوچ ءِ سر ےَ انچیں بلائیں بارے بوتگ جھندم پہ دگر ءَ بلوچ وتی میار ءَ وت زُرت نہ کنت.
دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت