نبشتانک: رژنائی ءَ کندیل بلان اَت
نبشتہ کار: شیردل بلوچ
شھید اُستاد واجـہ سبا دشتیاری ءِ نھمی سالروچ اِنت واجہ ءَ را کندیل بلوچ ءِ نام دیگ بوتگ ءُ آ رژنے اَت گیدی ءِ ھر نیمگ ءَ رژنائی تالان کنگ ءِ جھد ءَ گوں گلائش اَت، آجوئی ءِ سکیں دیوکیں رھدربرے اَت ،وتی سر ءَ پہ وتن ندر کنگ ءَ ساڑی اَت ،ھر وھد شھید ءِ ھمے ھب اَت کہ منی ساہ پہ بلوچ سرڈگار ءَ ندر بہ بیت ،آئی ءِ پگر ءُ زانت چوں مھکمیں کلات ءَ مِک اَت ءُ مدام آئی ءِ تمردی پہ راج ءَ ابدمان ءُ نمیران اِنت….ـ
شھید کندیل بلوچ یک ٹوھیں ءُ جوانیں انسانے اَت آ مدام گوں راجی کاراں ھمگرنچ اَت،
وھدیکہ من دوھزار دہ ءِ روتاک توار ءَ نبشتانکے وانگ ءَ اِت آں منی پھم ءَ یک گالے نیاتک گڑا من وتی گوشی زورت ءُ واجہ ءِ شمار ءَ را جت گوانکو چست کت ئِے…
دروت ءُ درھبات ءَ رند من گال ءِ بزانت جُست کُت، شھید ءَ گوں پُر کندگیں ءُ شیرکیں زبان ءَ منی پسو تر اینت ءُ رند ءَ من ھمے گوشت ترا ازیت کُت بہ بکش ئے واجہ…..،، ـ ـ ـ
واجہ سبا ءَ پسّو ھمے دات کہ ناں اے مزنیں جیڑھے نہ اِنت ھروھد ءَ جست کت کن ئے…….،،ـ ـ ـ
من ءَ ھم چو جُست ئِے نہ کُت کہ تو کے ئے …؟ ھما روچ ءَ چَہ من واجہ ءَ چہ سک باز ھدوک بوت آں..، من ھیران بوت آں ءُ سک جیڑ اِت کہ اے چونیں مزنشانیں رھدربرے ..!!!،
واجہ کندیل بلوچ پہ وتی راج ءَ ملنگ تبیں رھشونے اَت ءُ گوں وتی راج ءِ کاراں شپ ءُ روچ ساڑی اَت..!!ـ
من وھدے آئی گُشتانک گوش داشتگ اَنت من ءَ تاھیر رس اتگ ءُ دگہ من گلامی پھک مار اتگ کہ ما سک گلام ایں…!
استاد سبا ءِ اِلم ءُ زانت ءِ بادشاھے اَت ءُ راجدوستی ءِ سرچمَگ اَت دلانی تاھیر بکشوکے ات ،راجانی باندات ءِ نشان ات ءُ راجی جنز ءِ شھید گلام مھمد ءَ پد راجی بامرد اَت…!
وھدیکہ من شھید ءِ ھیال ءَ کپ آں گڑا گیدی ھر کُنڈ ءَ یک کمی یے سما کن آں چے ءَ کہ راجدوستانی جتائی راجانی سرین پروشی ءِ داب انت…!!
بَلے! منی دل نہ من ایت کہ سبا چہ ما جتا کنگ بیتگ..! من ءَ انچو گُمان بیت کہ سبا نمیران اِنت مئے چمانی دیم ءَ اندر انت بلے دلانی تہ ءَ ھر وھد ساڑی انت …!!
من ھر وھد ءَ گمان کنگ ءَ آں کہ واجہ سبا پہ آجوئی ءِ سکین دیگ ءَ سپرے ءَ دَر کپتگ،ترءُ تاب ءَ دمک پہ دمک انت ، بلوچستان ءِ دمگ ءُ دشت ءُ ویراناں پہ راج ءِ توار ءِ سر کنگ ءَ سر گردان انت…!!!
راجی مُچی ءِ تلّو ءِ سر ءَ نشتگ ءُ تسبی ماں گردان ءَ مان تر اینتگ اَنت ءُ جوانیں گُشانک دیگ ءَ انت ،وابیں دلاں آگاہ کنگ ءَ انت ، اِستان ءِ دراھیں ناشرکارانی کارپداں وتی راج ءِ ءُ جھان ءِ دیم پدر کنگ ءَ انت…!!!
من وھدے پہ سبا ءَ جیڑ آں من ءَ ھمے سما بیت کہ سبا گوں ما ھر وھد ءَ ھور انت ، وانگی ماں بگل ءَ انت ئِے، اسا ئِے گون اِنت ءُ بلوچ نودربر گل ءِ باسکاں راج دوستی ءِ درونت دیگ ءَ اِنت، شھید رزا جھانگیر ءُ الیاس نزر ھمراہ اَنت ئِے، گام پہ گام آجوئی ءِ منزل نیمگ ءَ جُنزاں اَنت ءُ پہ بلوچ راج ءَ رژن تالان کنگ ءَ انت. !!ـ
زوراکی ءُ گلامی ءِ گرنچ یکروچے پر ریچگ بنت، پہ بلوچ ءَ آجوئی ءِ رژنائیں ءُ نوکیں سبایے بندات بیت ،انسان دوستی کسہ آرگ بیت ءُ شھیدانی گُڈی اُوست سرجم بنت…
منی مھروانیں استاد شھید سبا تو نمیران ئے.
دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت