نبشتانک: بلوچی مئے وتی شھدیں زبان اِنت
نبشتہ کار: باست بلوچ
دی بلوچستان پوسٹ
مرچی ما وتی راجی پجّار ءُ راجی شھدیں بلوچی زبان ڈالچار ءِ آماچ کُتگ ءُ دِگِہ زبانانی رند ءَ کپتگ ایں ،چوناھا لھتے بلوچ ءَ وتی زبان ءِ وانگ ءُ نبیسگ ءِ ھُبّ ءُ واھگ نیست چی ءَ کہ گیشتر دِگہ زبانانی نیمگ ءَ دلگوش اَنت بلوچ راج ءِ پدریچ ءَ بلوچی زبان ماں وانگجاھاں وانینگ نہ بَیگ ءَ اِنت بلکیں بلوچ راج ءَ دگہ زبان انچوشکہ سندھی، سرائیکی، ھندی ءُ پارسی وانینگ ءَ بے وس کنگ بوگ ءَ اَنت چریشی ءِ آسر ءَ بلوچ راج وتی جِند ءِ ماتی ءُ راجی زبان ءِ وانگ ءُ نبیسّگ ءَ ھیل ءُ بَلد نہ انت ءُ چمیشکا ما بلوچی زگریں گالاں ما کارمرز کنگ ءَ نہ زان ایں بلکیں ما اے گالانی جاہ ءَ دِگہ ھندی ءُ پارسی کارمرد کنگ ءَ ایں۔۔۔
دومی گپ! اگاں ما ٹوک کنگ ءِ وھد ءَ کمیں ھیالداری ءَ بِہ کن ایں گڑا الّم ھما ٹوک ءُ گپ ءِ دُمب ءَ پارسی ءُ ھندی گال مان مہ کن ایں باید انت چہ ایشاں وت ءَ پھریزگ لوٹ ایت۔۔۔۔
البت مرچی مئے راج ءِ جھدکار، ندکار ءُ زانتکار ھمے جھد ءَ کنگ ءَ اَنت کہ بلوچی زگریں گال گار ءُ بیگواہ مہ بَنت۔۔
جھدکار ءُ زانتکاراں وٹسپی گَل (گروپ) اڈّ کتگ مئے سوج ءُ سر کنگ ءِ واست ءَ، ما باید وٹسپی گَلانی تہ ءَ ھوار بِہ بَہ این ءُ وتی سیاھگاں راست بِہ کن ایں۔ پیسک ءُ تندجاھاں ھم بلوچی وانینگ بَیگ اِنت بلے بژن اِنت کہ مارا بلوچی وانگ ءُ نبیسگ ءِ ھُبّ ءُ واھگ نیست اِنت۔۔۔
بلوچ راج بلوچی زبان ءِ وانگ ءُ نبیسگ ءَ ھیل نہ اَنت دِگِہ زُبانانی وانگ ءُ زانگ ءَ ھیل کنگ ءَ اَنت۔۔۔
ما گِندگ ءَ ایں کہ بلوچی ءَ رومن آبانی سر ءَ نبیسگ اَنت چَہ ھمایاں دزبندی اِنت کہ بلوچی ءَ بلوچی آبانی سر ءَ بِہ نبیس اِت باید ما وتی بلوچی ءَ بلوچی آبانی سر ءَ بہ نبیس این ءُ شھسسا سید ھاشمی رھبند ءَ بِہ زیر ایں ءُ دیم ءَ جُنزان بِہ بَہ ایں۔۔
بلوچ راج ءِ نوک باھندیں ورناھاں گوں دزبندی اِنت کہ شما زبان ءِ وانگ ھیل بہ کن اِت، وتی بلوچی وانگجاھی گلاں (گروپاں) اڈ بِہ کن اِت ءُ اود ءَ وت ماں وت بلوچی نبیسّگ ءَ بُنگیج بِہ کن اِت انچوشکہ چَہ وانگ ءُ نبیسگ ءَ زبان ءَ بے کساس دیمروی کنت اِنت۔ اگاں نبیسّگ ءِ وھد ءَ ردی یے چیزے بیتگ گُڑا ایشی ءَ ھچ وڑ ءَ مڑا مہ پھم ایں بلکیں ھمے ردی ءَ دگہ زانتکاریں باسکے راست بِہ کنت ءُ چہ ھمے ردی ءَ ما دراھیں دیوان ءِ باسک چیزے دربر ایں۔ چوناھیگا نودربر ردی وَ کنت ءُ انچوشکہ ما مُدام ءُ یکشل ءَ چہ وانگجاھاں ردیِاں کنان ءَ جُنزان ایں دومی کہ بنی آدم ءَ مُدام چَہ ردیِاں دربُرتگ پمیشکا سنگت ءُ گْوھاراں دزبندی انت کہ اوشت ءِ آماچ مہ بہ بہ اِت بلکیں دیم ءَ جُنزان کن اِت۔
وش ءُ سلامت بات اِت ءُ بلوچی زبان شالا زوت دیمروی کنات۔ شالا انچوش بات
دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت