شال ءَ بیگواھیں مردمانی درگیجگ ءِ زھرشانی ءَ 3 ھزار 9 سد ءُ ھپتاد ءُ سَے روچ سرجم

بلوچستان ءِ بنجاھی شھر شال ءَ وائس فار بلوچ مسنگ پرسنز ءِ زھرشانی گدان ءَ 3ھزار 9 سد ءُ ھپتاد ءُ سَے روچ سرجم بیتگ – شال ءَ چَہ مھمد لال بلوچ، در مھمد بلوچ ءُ دگہ مردماں بنجل ءِ تر ءُ تاب کرتگ ءُ بیگواھیں مردمانی کھولاں گوں پدردی درشان کرتگ ءُ ھمے وھد ءَ وی بی ایم پی ءِ چیئرمین نسر اُلا بلوچ ھم جاڑیگ بیتگ –

وی بی ایم پی ءِ کسان کمک سرکماش ماما قدیر بلوچ ءَ ھمے وھد ءَ گْوشت کہ وی بی ایم پی پاکستان ءِ کانود ءُ رھبندانی تہ ءَ نیشتگ ءُ چیریں ادارھانی دست ءَ بے ارزی گرزی ءَ بیگواہ کرتگیں بلوچانی درگیجگ ءِ واستا پُرایمنیں جنزے کہ گوستگیں یازدہ سالانی تہ ءَ ھمک وھد زُلمانی بگیری ءَ توار چِست کنگ ءَ اِنت –

آئی ءَ گْوشت کہ چوشیں روچے نہ گْوز اِیت کہ بلوچستان ءِ واستا ایمنی ءِ سارتی اِنت – پاکستانی چیریں ادارھانی نیمگ ءَ جوڑ کرتگیں ڈیتھ اسکواڈ ءِ نیمگ ءَ پوجی آپریشن، بے گناھیں بلوچانی آوار جنگ ءُ آیانی سر ءَ لَٹ ءُ کُٹ کنگ ءُ لوگانی تہ ءَ دُزی کنگ ءَ پد سوچگی ویل ءُ دُزی دازی روچ ء رھمانی بیگ ءَ اَنت –

آئی ءَ گْوشت کہ چیریں ادارھانی سروکی ءَ ڈیتھ اسکواڈ ءِ کارندھاں دُزی ءِ نام ءَ تربت ڈنک ءَ جاسم ء امیر ءِ لوگ ءِ سر ءَ بیڑ برتگ ءُ اود ءَ جنگ ءُ چوپ ءِ وھد ءَ ڈیتھ اسکواڈ ءِ کارمنداں تیرگواری کرتگ ءُ چریشی ءَ چَہ زالبولے شھید ءُ یک کسانوکیں جنکوے کہ آئی ءِ نام برمش اِنت زدگ بیتگ ءُ کراچی ءَ درمان بیگ اِنت –

ماما قدیر بلوچ ءَ گْوشت کہ باز بر ءَ ما گْوشتگ کہ ڈیتھ اسکواڈ ءِ کارندہ بلوچانی کُشگ ءُ بیگواہ کنگ ءِ ھواری ءَ لشکری ادارھانی چیردستی ءَ دُکانی سامانی پیم ءَ منشیات بھا کنگ ءُ دُزیاں کنگ ءَ اَنت بلے ھمک وھد ءَ چیریں ادارھانی زور ءَ ایف آئی آر ءَ نبشتگ نہ کن اَنت ءُ پد ءَ دزگیری ءَ پد یلہ کنگ بنت –

آئی ءَ گْوشت کہ یک مئی ءَ چَہ بلوچستان ءِ جتائیں جاھاں درزانی کَچ ءَ بلوچ مھلوک بیگواہ کنگ بیتگ اَنت -ھمے وھد ءَ ھپت مئی ءَ جاوِد ء گوھرام پاکستانی چیریں ادارھاں بیگواہ کرتگ ءُ پد ءَ پانزدہ مئی ءَ آئی ءِ چاردہ سالی ئیں برات انیس ھم بیگواہ کرتگ – ھبدہ مئی ءَ جاوِد نیم زندی جاوراں مند ءَ سورو بازار ءَ چگل دیگ بیتگ ءُ پد ءَ دردانی نہ سگگ ءَ بیست ءُ پنچ مئی ءَ شھید یتگ –

ماما قدیر بلوچ ءَ گْوشت کہ من دراھیں انسان دوستیں مردماں ھوار راج ءَ گوں دزبندی کن آں آ ترس ءَ چَہ در بیا اَنت ءُ پاکستانی پوج ءِ نیمگ ءَ بلوچستاں ھستیں زُلم، فوجی آپریشن، آوار جنی، لوگانی تہ ءَ دزی ءُ بلوچ چاگرد ءَ نیکراھی ءِ سر ءَ میڑینگ ءِ نیمگ ءَ پرینگ، ڈیتھ اسکواڈ ءَ بلوچ راج ءِ ھلاپ ءَ الک کنگ ءِ سر ءَ جمھوری رنگے ءَ مئے زھرشانی ءَ ھوار بہ بنت –