نبشتابک: بِچکند کہ پہ تو زھیریگاں
نبشتہ کار: ماھکان بلوچ
دی بلوچستان پوسٹ
مارا اے سبک ھما روچ ءَ چہ وتی سرکل ءُ مھروانیں دوستاں رس اتگ کہ آزاتی ءِ ھاتِر ءَ ھر وڑیں کُربانی ءِ دَیَگ ھژدری اِنت ، چی ءَ کہ تو وھدے چہ وتی گُلزمین ءَ درآمد ءَ کشّگ ءُ گلّینگ لوٹ ئے گُڑا ترا پہ ھر وڑیں چکّاسانی دیمپان بُوَگ ءَ جاڑی بُوَگی اِنت ۔
وھد ءِ ھمراھی ءَ اے جُھد دیم ءَ کِنزان اَت ءُ آشوب ءِ رنگانی گُبار ڈیھ ءِ ھمُک دمکاں امبازان اَت ، رنگرنگیں دْروشمانی تِلاوت زِرد ءِ رگ ءُ بنداں بُوجان اَت ۔
بلے ھما ساھت ءَ من ءَ اے ھیال ءَ چم سُھری دات ءُ گْوشت ، اے کاروان کہ دیم پہ مِنزل ءَ رھادگ اِنت چو بیت کہ باندا بازیں مُساپِر چہ وتی تچکیں دگ ءَ پچ بِہ ترّ اَنت ءُ لگوری ءِ پوشاکاں بُہ پوش اَنت۔
پہ راستی جُھد ءِ گْواچنیں کِسّہ وت ءَ انچو مانا کنان اِنت ، چوش کہ مئے بلوچ راج جاھے گْوش اِیت دریا کہ مست بیت گُڑا گند ءُ گسڑاں لیپگ کنت ۔ پرے ھاتِر ءَ من ءَ ، بلکیں تانسریں بلوچ راج ءَ را گمیگ بُوَگی نہ اِنت کہ اے لگور ءُ بُزدلاں وتی تُوپکّ دُژمِن ءِ دیم ءَ چگل داتگ شھیدانی کاروان ھمد ءَ اُوشت ءِ آماچ بیت ءُ سپر ءَ بُرّ اِیت ۔
اے ھما گند ءُ گسڑاں کہ راجی جُنز ءَ لیپگ کُتگ اَنت ءُ آیانی بِستار راج ءِ دیم ءَ پدّر کُتگ کہ اے روبا شیری پوشاک ءِ تہ ءَ چینچو وتگلا ءُ چمکُٹ بوتگ اَنت ۔
بژن پرے ھبر ءَ کہ آیاں دِگہ بازیں شیری گُلڑاناں اے بُھتام جتگ ءُ گْوشتگ کہ اے ھرّگ جنانی چُک باریں داں کد مئے ھمراہ اَنت ، بلے آسری ھمراہ نہ ِبنت۔
اے راستے کہ جُھد ء آجوئی ءِ سپر ءَ ٹکّ ءُ بولک ، زات ءُ زُریات ، سیری ءُ ازگاری ءِ گپ ھِچّ مانایے نہ دار اِیت ، چی ءَ کہ اے جُھد بَہ کَول ء چیئرمین واجہ کلیل بلوچ ، بلوچ ءِ وتواجھی ءِ جُھد اِنت ۔
چوش کہ لھتیں کُچلّیں دانک بنت کہ اِیربرگ نہ بنت دانکہ آیانانی راستی وت ، وتی آشنائی ءَ مہ کنت ۔ ھمیشاں کہ زِی سرجھل کُتگ اِیشاں مُدام ھمے گْوشت کہ اے ھرّگ جنانی چُکّ ، دومی اے اکیل پنّام ء آزاد ءِ سر گوں انچیں دوتل دوپُوستاں کپتگ نوں بید ء ڈُھل جَنَگ ءُ ھرّگ ءِ ٹپّگ ءَ سرمچاری ءِ ڈُبّہ ءَ پیلو کُت نہ کنت ۔ گھتر اِنت کہ بُروت ءُ وتی پِت ءُ پیرُکی کِسب ءَ دست ءَ بِہ کنت۔ پہ تژن ءُ ٹاکُور ، پہ کندگ ءُ مشکرا ڈوبار اِت ءُ وتی کلّریں کست ءُ کینگ ءِ ڈگار آپ دات۔
بلے کامریڈ اسد جان ءُ سوبین جان ، پُلّیں اکیل آزاد ءَ اے پدّر کُت ءُ پیشداشت کہ پہ گُلزمین ءِ مھرانی موکگ ءُ وپا ءِ تاس ءِ تِنگ ءَ توکل ءُ مُھکمیں اِیمانے لوٹ اِیت نیکہ زات ءُ زُریات۔
مرچی ھما شھزادگاں کہ وت ءَ وتی دِل ءَ راجی جُنز ءِ چم ءُ پونز لیک اِتگ اَت ، پدرنداں دنز اِش گِندگ نہ بنت ۔ چی ءَ کہ راجی جُھد ءُ ھیش ءُ نوش ،وشوابی ءُ گُلگانی سمارگ نہ بیت ، بلکیں راجی جُھد ءِ ھاتِر ءَ چہ زِند ءِ ھر واھگ ءُ واھشت ءَ سرگْوزگ لوٹ اِیت ۔ اے ھبر پہ آیاں کارچ ءُ کاٹار اَت کہ راہ ءِ نیم ءَ سِلاہ چگل دات اَنت ءُ واجکار ءِ سلامی ءَ دِرکّ بست ۔
بلے مرچی کہ کولواہ ءِ سارتیں کَوش کہ شیکّان ءَ کشّ اِیت گُڑا من ءَ ھمے شُبینگ بیت کہ اے کَوش ءَ وت ءَ آزاد جان ءِ ٹھکانی توار مانپوشتگ ءُ دمک دمک ءَ آجوئی ءِ سِکین ءَ چو گُلاب ءِ وشبو ءَ شِنگینگ ءَ اِنت ۔
آزاد انگت مرچی زِندگ ءُ اے کَول ءَ بوجگ ءَ اِنت کہ راجی جُھد ءِ دیم ءَ چونیں اڑاند ءُ مُشکلے ، بیھار ءُ پادتراپے کہ میلانک بیت تو آئی ءَ چہ رُوتگاں ولگوج کن ءُ پہ وتن ءِ اِشک ءُ مھر ءِ پاسپانی ءَ گامے دیم ءَ بِہ جن ، چی ءَ کہ ترا اے سما بِہ بیت کہ اے جنگ من پہ وتی ادارُکی آسودگیں زِند ءِ ھاتِر ءَ بِندات نہ کُتگ ، بلکیں اے جنگ پرے ھاتِر ءَ وتی کُوپگاں زُرتگ دانکہ منی آیوکیں پدریچ پہ وش ءُ وژدلی ، اِیمن ءُ کراری وتی گُلزمین ءِ سر ءَ آجوئیں زِند ءِ پدیانکاں بِہ بیت ۔گُڑا اے ھبر ءَ دلجم ببُو کہ اے راہ چہ درد ءُ دور ، سکّی ءُ سوری ءَ پُرچکار اِنت ، بلے تئی آکبت ءِ سُوب گوں ھمے دگ ءَ نبشتگ اِنت دانکہ وتی مِنزل ءَ سر بِہ بَہ ئے۔
مرچی کولواہ ءَ ھوار تانسریں ڈیھ گوں آزاد جان ءِ ھمراھی ءَ کُلیں شھیدانی سر ءَ نازان اِنت کہ آیاں پہ منی آجوئی ءَ وتی ھونانی جمبر گْوارینت بلے لگوری ءُ سرجھلی ءِ نام وتی نام ءِ کش ءَ نبشتگ نہ کُت ۔
پمیشکا من پہ پھر گْوش آں کہ اے بامردانی راجی داستان داں بلوچ راج ھستمانی ءِ ساھگ ءَ منتگ اے کِسّہ راجدپتر ءِ تاکدیماں پہ مُدامی مان اِیت ، ھر بلوچ زھگے کہ اے داستان ءَ وان اِیت گُڑا آ ھم پہ مڑاہ ءُ شان وت ءَ آزاد جان ءِ گوں سنگتاں ھمگنگل گْوش اِیت ءُ اے کاروان ءِ ھمراھی ءَ دیم پہ مِنزل ءَ سپر کنت ، بلے پہ لگوراں پِٹّ ءُ لانت شکسائیت ۔
چی ءَ کہ لگور ھر راج ءِ راجدپتر ءَ پہ وشنامی گیر آرگ نہ بنت ، بلکیں پہ آیاں دائم پِٹّ ءُ لانت شکساھگ بیت ۔ آ کہ ڈیھ ءِ رکّینگ ءِ جنگ ءَ پاکمِریں مرگ ءَ کبول کن اَنت ، آیانی سر داں مھشر ءَ بُرز ءُ بُلند بیت ءُ راجی ھستمانی ءِ رُوژنائیں کندیل گْوشگ بنت ۔
ھمیش اِنت زِندمان ، کَے وت ءَ کُجام نام ءَ دنت ءُ چرے گیدی ءَ سپر کنت
دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت