نبشتانک: سَنگت شاری ءَ کینسر اِنت
نبشتہ کار: شُپانک بلوچ
سیمی بھر
دی بلوچستان پوسٹ
شاری گش ات لالا ترا گپے بگشاں تو پکا نوں من ءَ یل نہ کن ئے ءُ نہ روئے؟ کمبر جان شتگ من ءَ هچ وش نہ بیت تو شش ماه بیت نہ اتکگ ئے مرچی اتکگ ئے گُش ئے رواں.
شاری جان من مرچی همدیاں کولیگاں تو برو بَلّی ءَ بِچار باریں چاه کتگ ئِے چاهاں بیار من تو چاه ور ایں، هو لالا من رواں! شاری شت چاهانی رند ءَ گوں وتی بَلّی ءَ اتک بَلّی ءَ گُشت شاری شما اَنچو مهر داتگ وتی مات ءَ گوں اِنچو وش ئِے نہ بیت کہ گوں شما اِنچو وش ئِے بیت دراھیں روچ نشتگ شمے هیالاں اِنت الله شمے هیر ءَ بکنت شما اگاں اِد ءَ مہ بہ ات شاری دراھیں روچ ابیتک اِنت نشتگ نہ نان وارت الکاپ ءَ نہ وپس ایت بس همے وڑ ءَ شپاں روچ کنت برے روت وانگ جاه ءَ برے نہ روت.
من گُشت شاری جان تو چی ءَ وانگ جاه ءَ نہ روئے ، گشت ئِے لالا من ءَ نہ بر اَنت وانگ جاه ءَ ،ساری ءَ کمبر جان اتکگ من ءَ سینکل ءَ سوار کت ءَ بُرتگ آ اِد ءَ نہ اِنت من نہ رواں.
گپ ئِے دپ ءَ اَت کہ میتگ ءَ کوکار مَچ اِت کہ دری ڈنگاں دور کتگ ماهتون ءِ لوگے کر ءَ سر اَنت نزدیک اَنت شاری ءَ زار کت بزگ ءَ گُشت ئِے لالا تو برو کہ مرچی تئی دیدار ءَ من نہ لوٹ آں بَلّی ءَ زوت منی سرین بند ءُ لٹ ءُ همیل آورت اَنت بزان سنگت پیسر ءَ سرپد ءَ من شاری کمے بَگل ءَ کت گھن ءُ بوسہ دات ءُ درشتاں دیم پہ جو ءِ کشک ءَ سنگت ءِ نیمگ ءَ منی سنگت ءَ گُشت تئی پون من سک باز زند ءَ جتگ بلے بهتاور تو چِست نہ کتگ وت روے شاری ءَ گوں پیر زال ءَ بزگ کن ئے.
من گشت داں من زندگاں شاری ءَ کس هچ نہ کنت بلے وهدے من شاری ءِ کِر ءَ کا آں اَنچو گمان بیت کہ بهشت ءِ درگاه ءَ آں من بس همے واب ءِ ساهگ ءَ اندیم بَہ آں دل گشیت بس شاری ءَ گوں گپ ءُ هبر هال کن داں شپ روچ بہ بیت.
بلے سنگت من هپت شپ بیت بے واب آں بلے ساهتے شاری ءِ دیدار ءَ گوں چمانی واب شت دل ءَ تاھیر رس ایت بلے شاری ءِ باریں هال چے بیت اے رستر میتگ ءَ باریں چی ءَ اتکگ اَنت.
ما روان اَت ایں، پیر زال ءَ پمن ءُ شاری ءَ پہ ورگ جوڑ کتگ اَت من سک شدیگ اَت آں من زان آں شاری هم مرچی ورگ نہ وارت من سک بے چاڑ اَت آں داں ما اتک ایں کلبر ءِ کور ءَ پیشے ءِ بُن ءَ سینکل داشت کہ ما کمو دمے بال ءَ کن ایں آ دگہ کاروان جنزان بیت دیم ءَ کیت پد ءَ وردنے جوڑ کن ایں، ور ایں ءُ پد ءَ در کپ ایں.
بلے منی هیال مرچی گوں شاری ءِ یات ءَ اَت بس ھمراهانی تہ ءَ ات آں بلے بے ماتیں چکے وڑ ءَ هیال اِد ءَ نہ اِنت.
سنگت ءَ آرت کَش ات چادر تالان کت کہ دیم ءِ کاروان پیداک اِنت لوگ ءَ ورگ زورگ نہ بوتگ اد ءَ کلبر ءِ چمگے سر ءَ آرتے جوڑ کن ایں ورگ جاه ءَ شر کن ایں ءُ سِک ءَ لهتیں دار ماندار ایں.
روان انت
دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔