نبشتانک: ھیال ءِ چادر ءِ لمب ءَ
نبشتہ کار: میرل خان
دی بلوچستان پوسٹ
اگاں ملایانی سر ءَ ھبر بہ کن ئے آ بد بر اَنت ءُ مردم ءَ پہ تیر بدل کن انت ھمے رنگ ءَ اگاں بلوچ نیشنلزم ءُ بلوچ راجی جنز ءِ نزوریاں دیم ءَ بیار ۓ گڑا اے مردم دلار کُشگ بنت بلے پد ءَ اوں چہ بازیں وھداں مار اِتگ کہ اے ھاتر ءَ چیزے گال نبشتہ بہ کن آں گڑا کلم چست کُت ءُ تاکے زرت پہ سیاہ ءُ سبز کنگ ءَ۔
اے ھما روچ ات اَنت کہ من وانگ جاہ ءَ وانگ اِت آں کہ نواب اکبر بگٹی شھید کنگ بوت۔
وھدے کہ پاکستان ءِ یزیدیں لشکر ءَ بلوچ راج ءِ اے گھگیریں سر چہ بلوچاں سست چریشی ءَ ھرچ پسگ ءِ دل کینگے ءَ رنگ زرُت ءُ بلوچستان ءِ بازیں ھند ءُ دمگاں بلوچ راج ءَ زھرشانی بنا کرُت ءُ مئے وانگ جاہ اوں پہ شھید ءِ ھاتر ءَ بند کنگ بوت اَنت۔
نواب ءِ شھید کنگ ءَ رند بازیں وزیراں وتی وزیری یلہ کُت ءُ چیزے مپاد پرستیں سیاسی راھشون اوں زھرشانیاں گندگ بوت اَنت ءُ دومی نیمگ ءَ بی این ایم ءُ بی ایس او آزاد کوم ءِ شرتریں گل زانگ بوت اَنت ھمے پیم ءَ من وتی راج ءِ بزگی چہ بن ءَ دیستگ ات ءُ ھما وھداں جھد کُرتگ اَت کہ انچیں گلاں گوں وت ءَ نزیک بہ کن آں۔ ھمے وھداں بی ایس او آزاد ءُ بی این ایم ءَ پہ سیاسی چست ءُ ایراں ماں بازار ھوٹل ءُ ھمے پیمیں جاگھاں دیوان برجم داشت کہ من آیانی تہ ءَ بھر زرت ءُ چہ سنگتانی اے گپاں من انچوش مار اِت کہ مئے آزادی سک نزدیک انت۔ اے وھداں من تبک ھشت ءَ وانگ اِت آں ءُ چہ کلاس ھشت ءَ سوبین بوتاں ءُ پہ گیشین کلاساں من دگہ وانگ جاھے ءَ داکلہ زرت ءُ اے وانگ جاہ گوں وتی استاداں پہ من نوک ات اَنت پمے ھاتر ءَ من وانگ جاہ ءِ وھداں مدام ھاموش اتاں ءُ گوں کسے ءَ نیم زبان گپ تاں نہ کرُت ۔
یک روچے مئے وانگ جاہ ءَ بی ایس او آزاد ءِ باسک آتک اَنت ءُ چہ (ھیڈماسٹر) مزن استاد ءِ اجازت ءَ رند سنگت مئے کلاس ءَ آتک اَنت ءُ نودربرانی سیاسی چست ءُ ایرانی ھک ءَ گپ کرت اِش ءُ مارا سرپدی اِش دات ءُ گوں ھاموشی ءَ سنگتانی ھبر گوش داشت اَنت گڈسر ءَ چہ بی ایس او ءِ سنگتاں یکے ءَ جارے جت کہ کسے اگاں بی ایس او ءِ سیاست ءَ من اِیت ءُ گوں مئے گل ءَ ھوار بیت ما آئی ءَ را وش اھت کن اِیں.
سنگتانی جتگیں جار ءِ پسو ءَ من گشت کہ من شمئے ھمراھداری ءِ کنگ ءَ تیاراں چد ءُ رند سنگتانی گشگ ءِ رد ءَ من وتی اکسے آواناں دات ءُ نی بی ایس او ءِ باسکی کارڈ جوڑ بوت ءُ من پکا بی ایس او ءِ باسک لیکگ بوتاں چہ منی بی ایس او ءِ ھواری ءَ رند ھمے سال ءَ بلوچ راجی آجوئی ءِ3 سنگت گلام مھمد لالامنیر ءُ شیر مھمد پاکستانی لشکر ءَ آوار جت انت ءُ چیزے روچ ءَ رند آواناں شھید کُرت ءُ آیانی جون چہ کیچ مرگاپ ءَ دست کپت اَنت چہ شھیدانی شھید کنگ ءَ بلوچ راج گیشتر جزبات ءَ آھت ءُ آیاں ھمک ھند ءُ دمگاں وتی راجی آجوئی ءِ گپ کُت ءُ وتی سرمچارانی ءُ دگہ سیاسی گلانی پکر دیمءَ آرگ ءِ کوشست کُرت گمان انچو بوت کہ پہ پاکستان ءَ نوں اللہ وت انت پرچا کہ مئے وانگ جاھاں پاکستان ءِ راجی سوت گشگ ءِ بدل ءَ نودربراں وتی راجی سوت گشت ءُ پاکستان ءِ بیرک ایر کنگ بوت ءُ بلوچستان ءِ بیرک درنگ کُرت۔
منءَ انچو گمان بوت کہ ما اوں بنگلہ دیش ءِ پیم ءَ وتی واجہ وت بہ ایں، بی این ایم ءُ بی ایس او آزاد ءِ جلسھاں سنگتاں شھید بلاچ مری، شھید گلام مھمد ، شھید ڈاکٹر ھالد، شھید نواب اکبر بگٹی ءُ ڈاکٹر اللہ نزر ءِ اکس ایر کت انت ۔
ھر روچ یک نوکیں ھالے آھت کہ مئے سیاسی راھشون شھید کنگ ءُ آوار جنگ بوت اَنت مئے سرپدی زانت کار ءُ سیاسی راھشوناں بی ایس او ءُ بی این ایم ءِ سنگتانی آوار جنگ ءُ شھید کنگ ءِ بارو ءَ اے گشت کہ اے سنگتانی نزدیکی گوں سرمچاراں ھست اَنت پرے ھاتر ءَ مئے سنگت گیشتر زدگ بوگ ءَ انت ءُ واکی آ سرپدیں سنگت وتی جاگہ ءَراست ات انت بلے مئے چیزے ناسرپدیں سنگت ءُ گَلی باسکاں سرپدی ئیں مردماناں دلار لیکت ءُ آیانی ھلاپ ءَ گوں در ءُ دیواراں آیانی دلاری ءِ زکر کُت ءُ ھرکس وتی توک ءَ وت یک لیڈرے جوڑ ات چہ اے سوب ءَ پوج ءِ آپریشن گیش بوت اَنت ءُ پزیدی پوج ءَ بی ایس او ءِ سر ءَ پابندی جت ءُ دومی نیمگ ءَ بی ایس او ءُ بی این ایم ءِ نزوریانی کشوکیں مردماناں مئے نا سرپدیں سنگتاں دلار لیک اِت۔
بلوچ آجوئی لشکراں مردم ءِ تب نہ زانت ءُ پہ دیمیں مردم گوں وت ءَ ھوار کُرت کہ آیانی تہ ءَ دز ءُ ڈنگ نشہ آوان ءَ ءُ ایندگہ بے سر ءُ بے پادیں مردم ھوار اِت اَنت کہ ایشاں مئے راجی لشکراں باز تاوان دات گوں وتی اے رنگیں نزوری ءُ ناتپاکی ءَ ۔
دژمن پوج ءَ مزھب کارمرز کُرت ءُ مئے راجی جنز نزور کنگ لوٹ ات کہ چیریشی ءَ مئے سنگتاں راجی جنُز ءِ رکینگ ءَ شریں گامیگج نہ زرت۔
پاکستانی پوج ءَ مزھب ھے ھد ءَ داں کار مرز کرُت کہ ناسرپدیں ملایاں بلوچ پسگ مدرساں داشت اَنت ءُ آیاناں پہ اپگانستان ءِ تالبان ءِ جنز ءَ ھوار کُرت بلے مرچی ما گند ایں کہ ھمے مئے ملا ء ُگوستگیں بلوچ( تنظیم) گلانی باسک پاکستان ءِ پوج چا پالیسیاں ءُ آئی ءِ ناشریں کاراں دیم ءَ برگ ءَ اَنت۔
باید ھمیش انت کہ بلوچ راجی جنز ءِ سنگت وتی ادارھاں مھکم بہ کن انت ءُ اے رنگیں جیڑھاں کنڈم پہ کن انت انچو کہ یک ءُ دو سال ئیں مئے چیزے راجی آجوئی جنزاں وتی تہ ءَ کمے شری آرگ جھد کتگ امید انت آ ھرچ نزوریاں زور اَنت ءُ آیانی پرشگ ءِ جھد ءَ کنت۔
دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔