کیچ ءَ لشکر ءِ دست ءَ یک ورنایے بیگواہ، آواران ءُ کیچ ءَ چار مردم یل کنگ بیتگ

سربیتگیں ھالانی رد ءَ کیچ ءِ دمگ جوسک ءَ پاکستانی لشکر ءَ جوسک چیک پوسٹ ءَ یک ورنایے آور جتگ ءُ برتگ –

آوار جنگ بیتگیں ورنایے ہجار پرویز ءِ سادک جھمنند آواران ھارونی ڈن ءِ نام ءَ زانگ بیتگ –

دمگی مردماں ٹی بی پی ءَ گوں گپ کنان ءَ گْوشت پرویز دو رند ءَ پیسر ءَ ھم آوار جنگ ءُ بیگواہ کنگ بیتگ ءُ پد ءَ یلہ کنگ بیتگ ھمے وڑ ءَ زیکیں روچ ءَ کیچ ءَ چَہ آواران ءَ روگ ءَ بیتگ کہ جوسک ءَ پاکستانی لشکر ءَ گاڑی چَہ ایر گپتگ ءُ گوں وت برتگ –

بلوچستان ءَ مردمانی آوار جنگ ءُ بیگواھیانی درچ یکشل ءَ برجاہ اَنت ءُ بلوچستان ءَ بیگواھیں مردمانی شوھاز کنوکیں گل وائس پار بلوچ مسنگ پرسنز ءِ رد ءَ تنی وھدی بلوچستان ءَ بے کساسیں کَچے ءَ مردم گار ءُ بیگواہ کنگ بیتگ اَنت ءُ گل ءِ گوشگ اِنت یک نیمگے ءَ کم ءُ کساس مردماں یل کنگ دومی نیمگ ءَ دگہ کَساں آوار جنگ ءُ بیگواہ اِنت، گل ءِ گوشگ اِنت بلوچستان ءَ انسانک ھک ٹوھیں رنگے ءَ لگتمال اَنت –

ھمے وڑ ءَ پنچ ماہ ءَ پیسر آواران ءِ دمگ تیرتیج ءَ پاکستانی لشکر ءِ دست ءَ آوار جنگ بیتگیں یاسین ء موسا گوستگیں روچ ءَ یلہ کنگ بیتگ ءُ ھمے وڑ ءَ گوستگیں روچ ءَ کیچ تمپ سرنکن ءَ آوار جنگ بیتگیں چار مردمانی تہ ءَ سَے یل کنگ بیتگ ءُ اشانی تہ ءَ آوار جنگ بیتگیں الی ھیدر انگت ءَ یلہ نہ بیتگ۔