آدینگ ءِ نھنگام ءَ پاکستانی لشکر ءَ بلوچستان ءِ مزن شھر شال ءَ نیوکاھان ھنکین ءَ بیڑ بُرتگ ءُ لوگ پَٹ اِتگ اَنت ھمے وھد ءَ دو برات دزگیر کُتگ ءُ ناشناسیں جاھاں بُرتگ اَنت۔
ھندی مردمانی رد ءَ پاکستان ءِ لشکر ءُ سادگیں پُچ پوش اِتگیں کارمنداں وتی اولاک چہ ھندی مردمانی لوگاں چہ دیر اوشتارینتگ اَنت ءُ گوستگیں شپ ءَ کساس یک بج ءِ وھد ءَ پادانی ھند ءَ پُتر تگ اَنت ءُ بازیں لوگانی سر ءَ بیڑ بُرتگ اِش۔
رس اِتگیں ھالانی رد ءَ لشکر ءَ نھنگام ءَ برتگیں بیڑ ءِ نیام ءَ یک اسکولے ءِ اُستاد شیر دل مری ءُ آئی ءِ برات نادر خان مری دزگیر کنگ ءَ پد ناشناسیں جاھاں بُرتگ اَنت۔
اھوالکارانی گُشگ اِنت پاکستانی لشکر ءَ دوئیں برات ھما جاہ ءَ سک لٹ ءُ کُٹ کُتگ اَنت، چماں پوچ اِش بستگ ءُ پہ زور شپ ءِ نیم ءَ گوں وت بُرتگ اَنت کہ آئی ءَ پد داں انگت ءَ آیانی درگت ءَ ھچ وڑیں ھال نہ رس اِتگ ۔
شیر دل مری چہ ھما اُستاداں یکے کہ آیاں نیو کاھان شال ءَ بلوچ زھگ مپت ءَ وانینتگ۔
آئی ءِ کھول ءِ مردماں انسانی ھکانی گلاں چہ دزبندی کُتگ کہ آ بلوچستان ءَ پاکستانی لشکر ءِ نیمگ ءَ چہ بیوکیں انسانی ھکانی لگت مالی ءُ زوریں بیگواھیانی دارگ ءِ ھاتر ءَ دزمانجنی بہ کن اَنت۔
یات بہ بیت کہ ھمے اسکول ءِ دگہ یک اُستاد ءِ عبد الرحمٰن ء حاجی بلوچ خان مری 2011 ءَ پاکستانی لشکر ءَ دزگیر کنگ ءَ پد بیگواہ کُتگ ءُ کہ آئی ءِ درگت ءَ داں انگت ءَ ھچ وڑیں ھال نیست۔
کھول ءِ رد ءَ عبد الرحمٰن شال کرانی دگ ءَ بس ءَ سوار نیتگ ءُ روگ ءَ بیتگ کہ ظفر آباد ءَ ایف سی چوکی ءِ سر ءَ لشکر ءُ چیریں ادارھانی کارمنداں بس ءِ دارگ ءِ ھاتر ءَ دست شھار اِتگ اَنت۔
کھول ءِ رد ءَ کارمنداں بس ءَ نشتگیں درائیں مساپر وتی پجار نامہ ءَ دیگ ءِ گوشتگ۔ عبد الرحمٰن ءِ پجار نامہ ءِ چارگ ءَ پد آیاں دزگیر کُتگ۔ آئی چماں پوچ اِش بستگ ءُ لٹ ءُ کٹ کنگ ءَ پد ایندگہ درائیں مساپرانی دیما داں چیریں ادارھانی گاڑی ءَ گِران کُتگ اِش ءُ پد ءَ گوں وت بُرتگ اِش ۔
عبد الرحمٰن ءِ زوریں بیگواھی ءَ نھ سال گوستگ بلے داں انگت ءَ آئی ءِ کھول ءَ آئی ءِ درگت ءَ کجام ھم وڑیں ھچ اھوال نہ رس اِتگ۔
بلوچستان ءَ زوریں بیگواھیانی ھلاپ ءَ وائس فار بلوچ مسنگ پرسنز ءِ نیمگ ءَ چہ جتگیں زھر شانی بنجل برجاہ اِنت کہ آئی ءَ گوستگیں روچ ءَ 3957 روچ سرجم بیتگ۔
ھمے وڑ ءَ چاگردی رسانکدرانی تندجاھانی سر ءَ بلوچ نودربر ءُ دگہ تکاں گوں سیادی داروکیں بیگواھیں مردمانی آجوئی ءِ ھاتر ءَ کمپین جُنزینگ بیگ ءَ اَنت۔
بیگواھیں نودربر پیروز بلوچ ءِ زوریں بیگواھی ءَ یک سالے سرجم بیگی اِنت اے درگت ءَ آئی ءِ کھول ءُ نودربرانی نیمگ ءَ چہ مروچی چاگردی رسانکدر ءَ #SaveFerozBaloch ءِ ھیش ٹیگ ءَ گوں کمپین کنگ بیگ ءَ اِنت۔
پیروز بلوچ سئی ءُ یک مئی دوھزار ءُ نوزدہ ءَ آئی ءِ ناکوزتک ءِ ھمراھی ءَ قلات ءَ چہ ابید ءِ آمید گِس ءِ سرپدی ءَ دزگیر کنگ بیتگ۔
دوئیں ورنا بلوچ اسٹوڈنٹس ایکشن کمیٹی (بی ایس اے سی) ءِ رھشون اَنت ۔ جمیل بلوچ کمو وھد ءَ پد آجو بیتگ اَت بلے پیروز بلوچ داں انگت بیگواہ اِنت۔
بی ایس اے سی ءِ ھمے درگت ءَ یک درشانے ءِ رد ءَ بی ایس اے سی نودربرانی مھکمیں گل اِنت کہ بلوچستان ءَ ھوار سرجمیں پاکستان ءَ وتی وانگی کاراں کنگ ءَ اِنت ۔ گل ءِ مول نودربرانی تھ ءَ علمی ءُ پکری رژن ءِ ودی کنگ اِنت داں کہ یک پُر ایمنیں چاگرد ءِ جوڑ بہ بیت۔
درشان ءَ گُشگ بیتگ کہ گل ءِ بنجاھی رھشونانی دزگیری ءِ سوب ءَ ما یک بے باوری ءِ جاورھال ءَ چہ گوزگ ءَ ایں ءُ نودربر یک بے سوبیں تُرسے ءِ آماچ بیتگ اَنت ۔