بلوچستان ءِ دمگ ھاران ءِ جھمنندیں بلوچ زبان دوست، جھد کار ءُ بلوچی زبان ءِ دیمروی ءَ کارکنوکیں ادبی گَل ،،نسیر کبدانی لبزانکی دیوان ءِ پاگواجہ سنا سیاپاد پاکستانی لشکر ءَ گوستگیں روچ ءَ دزگیر کنگ ءَ پد ناشناسیں جاھاں بُرتگ۔
سنا سیاپاد اَلامہ اکبال اوپن مزن شھدربرجاہ ءِ نودربرے کہ لٹریچر ءِ تھ ءَ ایم فل کنگ ءَ اِنت، کہ گوستگیں روچاں ھاران ءِ میتگ جوژان ءَ چہ دزگیر کنگ ءَ پد بیگواہ کنگ بیتگ ءُ آئی ءِ ھچ وڑیں ھال تنی وھدی نیست ۔
سنا بلوچ ءِ بیگواھی ءِ پشدر ءَ چاگردی رسانکدارانی تھءَ ترندی ءَ گوں ایر جنگ بیتگ ءُ چہ سرکار ءَ لوٹ کنگ بیتگ کہ سنا بلوچ زوت آجو کنگ بہ بیت ءُ وانندگ ءُ زانتکاریں نودربرانی بیگواھی دارگ بہ بنت ۔
زانگ بہ بیت سنا سیاپاد بلوچی زبان ءِ دیمروی ءُ زبان دوستیں اولی مردم نہ اِنت کہ بیگواہ کنگ بیتگ۔ چَہ ایشی ءَ پیش سال دو ھزار ءُ دہ ءَ کماشیں بلوچ شائر ءُ زبان دوستیں جھد کار نَسیر کمالان ءِ بیگواہ کنگ ءَ پد آئی ءِ تیر سُپتگیں جون جنگل ءَ چگل دیگ بیتگ۔
ھمے وڑ ءَ جون دو ءُ ھزار یازدہ ءَ سید زَھور شاہ کتابجاہ ءِ بن ھشت ایر کنوک ءُ بلوچی زبان ءِ زبانزانت ءُ کواس اُستاد سبا دشتیاری پاکستانی چیریکانی تیر گواری ءِ سوب ءَ شال ءِ دگ ءِ سر ءَ روچ ء رھمانی نشانگ کنگ ءُ جنگ بیت۔
بلوچستان ءِ تھ ءَ زبانزانتانی بیگواھی ءُ کُشت ءُ کوش مزنیں کَچے ءَ برجاہ اِنت، سال دو ھزار ءُ پانزدہ ءَ بلوچی زبان ءِ نامی ئیں شائر انور ساھب ھان چہ وتی لوگ ءَ گوں دو چک ءَ ھوار بیگواہ کنگ بیتگ ءُ مزنیں لٹ کُٹے ءَ پد یل کنگ بیتگ اَت۔
ھمے وڑ ءَ گوستگیں سال ءَ مارچ ءِ ماہ ءَ بلوچ زبان ءِ ورنائیں شائر نزر دوست کہ چہ مزن ھور ءَ ملک ءَ پہ موکل ءَ اتکگ دزگیری ءَ پد بیگواہ کنگ بیتگ اَت، ءُ پد ءَ مزنیں مدتے ءَ بیگواھی ءَ پد آجو کنگ بیتگ اَت۔
ھمے وڑ ءَ بلوچستان ءِ دمگ ھزدار ءَ براھوئی زبان ءِ ورنائیں گشندہ گلام مھمد ساکب جھالاوان کمپلیکس ھزدار ءَ ناشناسیں مردمانی تیر گواری ءَ جنگ بیتگ اَت۔
بلوچستان ءِ تھ ءَ داں انگت مزنیں کچے ءَ زبانزانت کُشگ ءُ بیگواہ کنگ بیگ ءَ اَنت، ءُ بیگواھی ءُ مرگ ءَ رکگ ءِ ھاتر ءَ بازیں بلوچ کواس مروچی جھان ءِ جتا جتائیں ڈیھاں باھوٹی زند گوازینگ ءَ اَنت –