نمدی :من ءَ شھداد ءِ نمیرانی دوست بیت
نبشتہ کار: حیراف بلوچ
اُمیت کن آں کہ وش جوڑ ءُ سلامت ئے،
تئی سلامتی ءِ لوٹوک آں-
مرچی دل لوٹ اِیت کہ گوں کسے ءَ بہ رپٹ آں گوں کسے ءَ وتی دلے زنگاں بہ ریچاں بلے چو مدامی ءَ کس نیست منی کش ءَ. گُڑا دست پہ کاگد ءُ کلم ءَ شُت اَنت ءُ مجگ ماں تئی یاتاں کپت.
پرچا تو شموشگ نہ بئے؟ پرچا چو گیر کائے ‘همون’؟
پرچا چوں دور ءُ جِتا ئے. بلے پد ءَ جیڑ آں کہ هرچی بیت پہ شری ءَ بیت ، شریں کہ تو دور ءُ گِستا ئے. جوان اِنت کہ ترا پروا نہ کنت پہ من ءَ سک جوان اِنت کہ تو وتی وڑ ءَ زندگی کنگ ءَ ئے، نوں من هم آدت کُرتگ بے ترا، نوں من هم ترا نہ لوٹ آں، نوں واتر هم مہ کن پہ من ءَ، نوں من ءَ هم پروا نہ کنت پہ ترا. هُدا بزانت گنوک بوتگ آں یا کہ نوں سار ءَ اتکگاں بلے تو زان ئے مردُم من ءَ چے گوش اَنت؟
ملنگ اِنت،ابدال اِنت وتی جند ئِے دوست نہ بیت ءِ پیمشکا شہ درستیں دگنیا ءَ نا اُمیت اِنت. گوں مهلوک ءَ همچمی کنگ نہ زانت واب نہ گندیت همے وڑ کہ زندگ اِنت ءُ همے وڑ زندگ بیگ لوٹ اِیت. دگنیا ءِ زیبائی ءَ نہ دیستگ، مردمانی وشگپیاں نہ کند ایت، شھر ءُ بازار ءِ ڈولداری ءَ نہ پهمِ اتی پمیشکا شھر ءُ بازار دوست ئِے نہ بنت، کوه ءُ گیابانی شیدا اِنت.
اگاں لوگ ءَ بہ بیت گُڑا یکیں کوٹی ءَ وتی بند اِنت. نہ چکانی کندگ ءَ کندیت ءُ نہ گریو ایت. تهنائی سک دوست بیت ءِ هلک ءِ درُستیں یاگی تبیں مردُم همیشی سنگت اَنت.
مارا ایشی مسلمانی ءِ سر ءَ باور نہ بیت بلے شوم برے برے نُماز هم وانیت ءُ روچگ هم داریت. گوں کس ءَ کار نہ داریت میتگ ءِ مردم ایشی ءَ نہ زان اَنت هم، بس کدی کدی میدانے سر ءَ نند ایت گُڑا هلک ءِ مردُم گند اِنت ئِے.
نہ زاناں کہ چونیں بَچکے بلے دُکان والا گوش اَنت کہ ساری ءَ گوں هلک ءِ بَچکاں باز نند ءُ نیاد هم کُرت ئِے، بازینے گوش ایت کہ همے وڑ ءَ چُپ شر اِنت کہ دپے پچ بیت دل گوشیت کہ زبان ءَ ئِے بُر، کس ءَ نہ منّ ایت مُلایانی پُشت ءَ نماز نہ وانیت گوشیت کہ منی نماز اے دو پوست دو تلیں ملایانی پُشت ءَ نہ بیت پرچا کہ من اے ملایاں مناپک سرپد باں،پرچا کہ اے هر وهدے موسا ءِ جاگہ ءَ پِرئون ءِ پلہ مرز بوتگ اَنت ءَ تنینگ ءَ هم ھَست اَنت.
ایشی درُستیں سنگت کوم پرستی کن اَنت ءُ مُلا ءَ گوستگیں جما ءَ وتی بیان تہ ءَ گوشت کہ کوم پرستی ءُ بُت پرستی یک برابر اَنت بلے اے شوم نہ من اَنت. شہ درُستیں دود ءُ ربیدگاں باگی اَنت.
پدا کہ گپ بہ کن ایں گوں گُڑا تئی جند ءَ مَلامت کن اَنت.
بلے هیر کَے ءَ پروا ؟ نوں اے گپانی اشکنگ ءَ من آدت کُرتگ.
آ روچ ءَ بزگیں مات من ءَ گوشیت کہ منی زاهگ نوں تو هم ورنا بوتگ ئے زوت وتی وانگ ءَ پوره بہ کن ءُ جاگہ ءِ نوکری ءِ بہ کن کہ تئی سانگ ءَ هم کنگی انت. من تئی سانگ ءِ گُد ءُ چلہ هم گپتگ اَنت. من کند ات ءُ گوشت کہ من سور نہ کن آں کستریں برات سور ءَ بہ کن ات من نہ کن آں. گُڑا گوشت ئِے تو زاناں نر مادگے ئے؟ من پہ کندگ هو کُرت.
بلے مات ءَ کَے بہ سمجائینیت کہ ملنگ ءُ ابدالیں شھداد ءِ نمیرانی دوست بیت شہ سانگ ءُ سور ءَ کے سرپد بہ کنت کہ گُلامیں راجانی بچاں سالونکی ءُ بادشاهی ءِ نام پِر نہ بیت. گلامیں راجانی بچاں یا شھداد ءِ وڑ ءَ نمیرانی ءِ یا نزیر چگور وڑ ءَ لگور ءِ نام پِر بیت کہ زی بی ایل ایپ ءِ سرمچارانی دست ءَ مرتگ بوت.
شھداد جان نوں من ءَ موکل بہ دے کہ من سک دم بُرتگ آں، سجیں روچ کار ءُ کارا پد کہ بہ نند آں گڑا گوں مرتگیناں هساب بہ آں نوں وت بہ گوش اے هال ءَ چون من تئی یاتاں بہ کپ آں؟
بس ترا همے گپ گوشگی اَت کہ تو من ءَ یات نہ بئے، نوں من ترا نہ لوٹ آں چی ءَ کہ من ءَ شھداد ءِ نمیرانی دوست بیت.
تئی سنگت حیراف بلوچ
دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔