اے گپ ءَ ھرکسے زان ایت کہ ھما راجانی زبان دیمروی کن اَنت کہ ھما راج وتی راجی زبان ءِ بستار ءُ ارزِشت بِہ زان ایت، راج ءِ لس مھلوک ءِ تہ ءَ راجی زبان ءِ آگاھی بِہ بیت، راج وتی راجی زبان ءَ ماں وانگجاھاں، دربرجاہ ءُ شھدربرجھاں وان ایت، انچوش کہ وتواجہ ءُ آجوئیں راجانی راجی زباناں سرکاری درجگ دیگ بیت چمیشکا دیمروی ءِ واست ءَ وڑ وڑیں آسراتی بنت انچوشکہ پہ زھگاں کارٹون، روتاک، وتگُش، گِندگُش ءُ پہ زبان ءِ دیمروی ءَ بلاھیں کتابجاہ ءُ تامُری ءُ گِندگُشی رسانکدر ءِ ترامگیج بنت بلے پہ بلوچ راج ڈولیں زیردست ءُ گلامیں راجانی زبان ءِ دیمروی واست ءَ ناں کہ اے وڑیں بُنکی آسراتی بنت ءُ نیکہ جْوانیں وانگجاھاں بنت بلکیں گلامیں راج ءِ ھر دمگ، شھر ءُ ھنکین ءَ راج ءِ لس مھلوک زورآور ءِ زُلم ءُ کھر ءِ آماچ بیت، زورآور گلامیں راج ءِ پدریچ ءَ وتی زبان وانینگ ءَ بے وس کنت ءُ زیردستیں راج ءِ زبان بیگواہ کنگ ءَ وڑ وڑیں پندلاں ساز کنت چی ءَ دژمن زان ایت کہ اگاں اے گلام وتی راجی زبان ءَ وان ایت گُڑا راجدوست بیت ءُ وھدیکہ کہ راجدوستی یے گلام ءِ پدریچ ءُ لس مھلوک ءِ تہ ءَ ودی بیتگ گُڑا آ راج گلامی نہ سَگّ ایت بلکیں گلامی ءِ سانکلاں سند ایت ءُ وت آجو کنت پمیشکا مرچی ھر زانتکاریں بلوچ اے گپ ءَ جْوان پوہ انت کہ دژمن ءَ مُدام بلوچ راج گوں ھر وڑیں ناروائیں زورانسری کتگ۔ دژمن ءَ ناں کہ ایوک ءَ بلوچ راج ءِ تُلُب سندھ ءُ پنجاب ءِ نیمگ ءَ بھر ونڈ کتگ اَنت کہ نزورتر ایت ءُ دومی بلوچ راجی زبان ءِ تہ ءَ بازیں اڑ ءُ جنجال ودی کتگ ءُ بلوچ ءِ پدریچ چہ ماتی زبان ءِ وانگ ءُ نبیسّگ دِیر ءُ گِستا داشتگ چمیشکا بلوچ راج ءِ پجّار ءُ آئی ءِ راجی زبان چہ بلوچ ءَ بے کساس ڈالچار بیتگ ءُ دژمن ءَ بلوچ راج مجگی گلام جوڑ کت۔
البت بلوچ راج ءَ وتی گلامی نہ منّ ات بلکیں مُدام یکشل ءَ وتی راجی آجوئی ءِ جُنز ءَ گوں ھوناں ھاٹیگ دیان ءَ بیتگ ءُ دومی نیمگ ءَ زبان دوست ءُ راجی کواساں بلوچ راجی زبانانی زندگ دارگ ءَ شپ داں روچ بے کساس جُھد کتگ کہ راج زبان دوست ءُ راج دوست بِہ بیت۔ مرچیگیں تیزیں ءُ دزگٹّیں دگنیا ءَ دامگ ءِ زمانگ انت پمیشکا ھچ کسے ناں کہ ھندی ءُ پارسی ءِ روتاکاں وان ایت، ناں کہ وتگُشاں دلگوش دار ایت ءُ نیکہ تب ھر وھد ءِ وانگی یے کسے وان ایت بس چہ وتی گوانکو ءُ کارگِساں بی بی سی، الجزیرہ، نیویارک ٹائمز ءُ سی این این وڑیں جھانی تندجاھاں اھوال ءُ اھوالاں وان انت ءُ جھان ءِ جاوراں سرپدی زیر اَنت گُڑا اے درگت ءَ بازیں زبان دوستاں چہ وتی رسانکدری تندجاھاں بلوچی سیکشن، بلوچی بھر اڈ کتگ انت کہ پہ راجی زبانانی دیمروی ءَ بلوچ نبشتہ کارانی نبشتانک ءُ آزمانک ھم چہ ھمے تندجاھاں شِنگ ءُ شانگ بِہ بنت کہ بلوچ راج وتی ماتی زبان ءِ وانگ ءُ نبیسّگ ءِ نیمگ ءَ بئیت۔ چوناھیگا اے باز جْوانیں گامگیج انت کہ چریشی ءِ آسر ءَ مرچی بلوچ چاگِردی ءَ بلوچی وانگ ءُ نبیسّگ ءِ یک بلاھیں آشوبے ودی بیتگ۔
بلے چہ اے درستیں جُھد ءُ گامگیجاں بلاھیں کار دی بلوچستان پوسٹ ءِ راجی زبانانی جتا جتائیں رسانکدری تندجاھانی بندگ ئیگ انت کہ نی بلوچ راج پہ گیدی ءِ ھال ءُ اھوال ءِ وانگ ءَ ھندی ءُ پارسی ءِ تندجاھانی وازمندگ نہ انت بلکیں نی بلوچ راج وتی جِند ءِ راجی زبان براھوئی ءُ بلوچی زبان ءِ تہ ءَ تب ھر وھد ءِ ھال ءُ اھوالاں وان ایت ءُ زان ایت۔
منی نز ءَ اے پہ بلوچ راج ءَ یک بلاھیں ٹیکی یے ءُ ما ایشی ءَ ایوک ءَ یک تندجاھے نہ گْوش ایں بلکیں پہ گلامیں راج ءَ اے یک ترامگیجے چریشی ءَ ماتی زباناں بے کساس پائدگ ءُ دیمروی رس انت۔ نی ھر بلوچ ءِ اے راجی زمہ واری انت کہ ما وتی سْیاد ءُ وارساں ھم ھمے سرپدی بہ دے ایں کہ براھوئی ءُ بلوچی تندجاھاں تب ھر وھد ءِ ھال ءُ اھوالاں بِہ گِر ایں ناں کہ ھندی ءُ پارسی ءِ تندجاھانی رند ءَ تچ ایں۔ چہ ایشی ءَ مستریں پائدگے رس ایت کہ بلوچ راج وتی ماتی ءُ راجی زبانانی وانگ ءُ نبیسّگ ءَ ھیل کنت ءُ بلوچ راج ءِ تہ ءَ یک بلاھیں راجدوستی ءُ ڈیھ دوستی یے ودی بیت ءُ بلوچ راج ءَ یک روژنائیں بانداتے دنت۔
گُڈسری بلوچ راج ءِ رھشوناں ھم دزبندی انت کہ گُلیں راج ءَ راجی زبانانی وانگ ءُ نبیسّگ ءِ کڈن بِہ کن انت کہ ایشانی ٹکر ءُ منّوگر بلوچی زبان ءِ دیمروی ءِ پِڑ بیا اَنت۔
بلوچ راجی زبان شالا دیمرویاں سر بات اَنت ءُ بلوچستان زندگ بات۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانکدار ایشانی منّوک بہ بیت یا اے گل ءِ پالیسیانی درشانی اِنت۔