کیچ ءَ لشکر ءِ تیرگواری، یک مردمے بیران

بلوچستان ءَ جتائیں جاھاں جھانی نادراہ کورونا ءُ رمزان ءِ ماہ ءَ لشکری کاروائی برجاہ اَنت

ٹی بی پی ءَ رس اِتگیں ھالانی رد ءَ دشت ءِ دمگ جتانی بازار ءَ مگرب ءِ وھد ءَ پاکستانی لشکر ءَ تیرگواری کرتگ ءُ اکرم ء مھمد بکش جھمنند بل کراس کُشتگ –

دمگی مردمانی رد ءَ اکرم نیمساریں مردمے بیتگ ءُ ڈن ءِ درکپگ ءَ پد لشکر ءَ تیرانی آماچ کرتگ چریشی ءَ چَہ آ بیران بیتگ –

بلوچستان ءِ جتائیں جاھاں لشکر ءِ لشکر کشی برجاہ اَنت ءُ مروچی کیچ ءِ جتائیں جاھاں پنچ مردم آوار جنگ بیتگ –

ھمے درگت ءَ بلوچ سلاہ بندیں گل بلوچ ریپبلکن آرمی ءِ کماندار گلزار امام بلوچ ءَ چاگردی رسانکجاہ ٹوئیٹر ءَ یک ٹویٹے ءَ گُشتگ کہ ریاستی لشکر ءَ سرمچارانی دیم ءَ پروش وارتگ ءُ چریشی ءِ بدل ءَ لس مھلوک ءَ نشانگ کنگ ءَ اِنت –

گلزار امام ءَ جھانی مردمی اگبالکارانی گور ءَ اے لوٹ کرتگ ءُ گْوشتگ کہ آ بلوچستان ءَ بیوکیں زوراکیانی سر ءَ وتی نگاھاں ایر بہ کن اَنت ءُ بلوچ مھلوک ءَ بہ رکین اَنت –