بولان: پاکستانی لشکر ءِ لشکر کشی بازیں جاھاں برجاہ اَنت

پاکستانی لشکر ءِ نیمگ ءَ جھانی نادراہ کورونا ویروس ءُ رمزان ءِ ماہ ءَ ھم بلوچستان ءِ جتائیں جاھاں وتی دست نہ داشتگ اَنت یکوی زمینی لشکر ءِ ھمراھی ءَ برزی لشکر کشی یکشل ءَ برجاہ اَنت، بیڑی، انگیری ءُ مردمانی آوار جنگ ءُ بیگواھی درچ برجاہ اَنت –

ورداسانی رد ءَ پاکستانی لشکر ءَ بولان ءِ جتائیں دمگ جمبرو، جنترو، بزگر ءُ سانگان ءَ لشکر کشی بندات کرتگ یک دمگی مردمے ءَ دی بلوچستان ءَ گون ءَ گْوشت کہ زمینی لشکر ءَ جتائیں جاھانی راہ ءُ در بستگ اَنت ءُ ھمک وڑیں رو ءُ آیانی سر ءَ بندش جتگ ءُ ایشانی ھمراھی ءَ زمینی لشکر ءَ جنگی بالگردانی کمک گون اِنت گوں –

ھمے وڑ ءَ مروچی سھب ءَ لشکر کشیانی وھد ءَ ناکہ جانی تاوان بیتگ ءُ ناکہ دگہ دزگیریانی ھال بیتگ اَنت –

دومی نیمگ ءَ جنگ زدگیں دمگ پاکستانی لشکر ءِ نیمگ ءَ ھمک روچی ءِ لشکر کشی ءُ بیڑیانی وھد ءَ تکانسر بیتگ ءُ بازیں مردمے ءَ وتی ھند یلہ داتگ ءُ دومی جاھاں لڈ بار ءُ شتگ اَنت –

جھانی نادراہ کورونا ءَ ھم بلوچستان ءِ سر ءَ پاکستانی لشکر ءُ چیریں ادارھانی لشکر کشی ھلاس نہ اِنت ھما وڑ ءَ کہ پیسر ءَ بیتگ اَنت ھما وڑ مردمانی آوار جنی ءُ لوگانی پٹ ءُ پول برجاہ اَنت –

گوستگیں روچ ءَ دی بلوچستان پوسٹ ءِ جھگیر ءَ کیچ ءَ ھال داتگ کہ زامران ءِ دمگ ناگ ءَ پاکستانی لشکر ءَ گوستگیں یک ھپتگے ءَ چہ انگیر ءَ کرتگ ءُ رمزان ءِ ماہ ءُ مردم لوگاں چَہ ڈن شت نہ کن اَنت ءُ وردنی ءُ ناکہ نادراھے جاھے ءَ برگ بیت اِنت –

بولان ءِ دمگ سانگان ءِ جھمنند ھاجی رمزان دومڑی ءَ ٹی بی پی ءَ گوں گپ کنان ءَ گْوشتگ کہ ھمک آیوکیں روچاں پاکستانی لشکر ءِ بیڑیاں مارا بیزار کرتگ ءُ مئے زندگی چَہ زندگی ءِ کَٹ ءَ شتگ ءُ دومی کہ لشکر بیڑی ءِ وھد ءَ وتی لاپ ءِ والینگ ءَ مردمانی پسان چاپنت ءُ رو اَنت –

ھاجی رمزان دومڑی ءَ بلوچستان ءِ راجدوستیں پاٹی ءُ گیشتر انسانی ھکانی ادارھاں گوں دزبندی کرت کہ آ پاکستانی لشکر ءِ ھمک روچی ءِ لشکر کشی ءُ بیڑیانی دارگ ءَ توار چِست بہ کن اَنت دمگی مردماں بہ رکین اَنت –