شال ءَ وائس پار مسنگ پرسنز ءِ گدان برجاہ

بلوچستان ءِ بنجاھی شھر شال ءَ وائس پار بلوچ مسنگ پرسنز شدکُشیں گدان ءَ 3 ھزار 9 سد ءُ پنجاہ روچ سرجم بیتگ –

ھزدار ءَ چہ راجدار ءُ چاگردی باسک ابدُلمجید گلامانی بلوچ ءَ گوں وتی ھمراھاں بنجلے تر ءُ تاب کُتگ بیگواھیں مردمانی کھولاں گوں پدردی درشانیتگ –

ھمے درگت ءَ وائس پار بلوچ مسنگ پرسنز ءِ کمک سرکماش ماما کدیر بلوچ ءَ اتکگیں مردمانی میان ءَ تران کنان ءَ گشتگ کہ جھان ءِ ھر کُنڈ ءَ کہ راجی جنگ بوتگ انت اود ءَ پُرایمنیں جد ءُ جھد سوبمندی ءَ گوں دیم ءَ شُتگ انت زورگرانی نیمگ ءَ چہ زوراکیانی سیمسر سرگوز کُرتگ انت گڑا میاں اَستمان ءِ ایمنیں لشکر ءَ مانداتگ –

آئی ءَ دیمتر ءَ گُشتگ کہ مروچی بلوچستان ءِ تھا زُلم ءُ زوراکی ھد ءَ چہ گیش بوگ ءَ اَنت، پاکستان بلوچ پسگاں گچین کنان ءُ جنان انت بلوچ چاگردے وانندہ ءُ زانتکاریں مردماں نشانگ کنگ ءَ ایں جھان ھم اشی ءَ گندگ ءَایں کہ بلوچ جنگ ءِ زندمان ءَ کپتگ-

ماما کدیر بلوچ ءَ گُشتگ کہ مارا اُمیت انت میان اُستمان گیش ءَ چہ گیش بیگواھیں بلوچانی درگت ءَ گامگیج زوریت- جھان اے کُشت ءُ کوش ءَ گندگ ءَ ایں ما بے توار بوت نہ کن ایں پاکستان ھمینکا کُشت ءُ کوش کنت ما چد ءُ گیشتر وتی پُرایمنیں جھد ءَ دیم ءَ بران کن ایں –

گُڈسر ءَ وائس پار بلوچ مسنگ پرسنز ءِ کمک سرکماش ءَ گُشتگ کہ پاکستان بلوچستان ءِ تہ ءَ وتی کُتکاریانی چیر دیگے سک باز جھد ءَ اِنت کہ کجام نا کجام وڑ ءَ پارلمنٹ ءَ بے توار کنگ ئے بلاھیں دپارے بہ دنت –