شال ءَ بیگواھیں مردمانی درگیجگ ءَ برجم داشتگیں گدان برجاہ

بلوچستان ءِ بنجاھی شھر شال ءَ وائس پار بلوچ مسنگ پرسنز ءِ شدکُشیں گدان ءَ 3 ھزار 9سد ءُ چل ءُ ھشت روچ سرجم بیتگ –

نیشنل پاٹی ءِ ابدُل گپار کمبرانی ءَ بنجل ءِ تر ءُ تاب کُتگ بیگواھیں مردمانی کھولاں گوں دلپدردی درشان اِتگ – ھمے وڑ ءَ انسانی ھکانی باسک راشد ھُسین بلوچ ءِ کھول ءَ وتی زھر شانی نبشتہ کنائینتگ

ھمے درگت ءَ وائس پار بلوچ مسنگ پرسنز ءِ رھشون ماما کدیر بلوچ ءَ تران کنان ءَ گُشتگ کہ جھان ءِ تہ ءَ بلوچ ءَ یک مھکمیں دیدانکے پدرائی کُتگ مروچی گیشتریں ملکاں بلوچ ءِ جیڑھے سر ءَ لکگ ءُ گُشگ بیت ءُ تاریک ھم مارا ھمے گُشیت کہ پرایمنیں جد ءُ جھد ءِ ھاتر ءَ توار چست کنگ المی انت –

ایمنی لوٹوکیں راج اگاں اے دمگ ءَ ایمنی گندگ لوٹاں گڑا ایشی یے ھاتر ءَ بیگواھیں بلوچانی کھولانی گون ءَ ھمراہ داری بہ کن انت-

ماما کدیر بلوچ ءَ گُشتگ کہ راجدپتراں ما گندیں کہ ھر راج ءَ بے تُرس ءَ تاگتانی دیمپانی کُتگ آ سرشان بوتگ انت ءُ ھما کہ ترس آماچ بوتگ انت آھانی نام نشان گار انت.

آئی ءَ گُشت کہ زوراک مزلومانی انسانیت ءَ آیانی نام ءُ نشان ءَ مدامی یے ھاتر ءَ گار کنگ لوٹ انت آیانی پداں ھم گار کن انت تانکہ آھانی یک جتائیں راجے ءُ پجار ءِ بہ بیت. بلے بلوچ ء وڑیں زندگ زمیر راجے ءِ گون ءَ اے رویش ءُ سوچ پیسرا چہ ھاکاں ھوار انت-

ھمے درگت ءَ بنجل ءَ ساڈی ایں راشد ھسین بلوچ ءِ کھول ءَ گُشتگ کہ راشد ھسین یل بوھگ ءُ آئی ءِ دیم ءَ آرگے واستا مئے چم راھی انت. پاکستان ءِ ادارھانی نیمگ ءَ چہ راشد ھسین ءَ تتکگیں جرمکار گُشگ مئے گمانی تھا گیشی آیگ انت- پرچاکہ متھدہ ارب امارات ءُ پاکستان ءَ ھواری ءَراشد ھُسین آوار جتگ ءُ بیگواہ کتگ ءُ چم دیتگینانی رِد ءَ راشد ھُسین پاکستان ءِ چیریں ادارھاں گون انت بلے پاکستان ءَ پیسری وڑ ءَ بیگواھیں مردمانی درگت ءَ نہ منّ اِتگ

ماما کدیر بلوچ ءَ راشد ھُسین ءِ درگت ءَ گُشتگ کہ راشد ھُسین ءِ زند ترس ءُ بیم ءِ تہ ءَ اِنت آئی ءَ گُشتگ کہ راشد ھُسین پاکستان ءَ گون انت بلے ادارھانی نیمگ ءَ چہ آ تتکیں جرمکار گشگ بوتگ. مارا تُرس انت کہ راشد ھُسین چو سھاپی ساجد ھُسین ءِ وڑا کوش ءُ تاوان دیگ مہ بیت.

گُڈسر ءَ ماما کدیر بلوچ ءَ انسانی ھکانی ادارھاں چہ لوٹ کُتگ کہ آ راشد ھُسین بلوچ یل کنائینگ ءَ وتی کِرد ءَ پیلو بہ کن انت-