یک بیگواھیں مردمے ءِ دزگیری ءِ دزنبشتیں ارزی
ٹی بی پی شونگال
پاکستان ءَ یک ناشری ءِ بھتام ءِ آمید ءَ شانزدہ اپریل ءَ پانزدہ مردمانی بگیر ءَ ارزی نبشتگ کرتگ ءُ دزگیری ءِ پرمان کرتگ اے مردماں اے بھتام بیتگ کہ آ نامان کپتگیں جنگی گل بلوچ لبریشن آرمی ءَ گوں سیادی کن اَنت کہ بیست ءُ سَے نومبر دوھزار ءُ ھژدہ ءَ کراچی ءَ بیتگیں چینی کونسل ھانہ ءِ سر ءَ بیتگیں اُرش ءِ زمہ واری منّ اِتگ اَت.
اے ٹی سی ءَ اے ارزی نبشتگ سینٹرل جیل کراچی ءَ چست کرتگ ءُ انٹی ٹیررزم کمیلیکس ءَ کرتگ ابکھی یے کہ آمیدگس ءَ راشد ھسین نامی ئیں مردمے ءَ دگہ ھمراھانی ھمراھی ءَ دزمانجنی ءِ بھتام جتگ اَت کہ بیچارگیں مرد یک سالے ءُ شش ماہ اِنت کہ بیگواہ اِنت ءُ آئی ءِ کھول داں انیگ ءَ وھد وھد ءَ کراچی ءِ پریس کلب ءَ زھرشانی ءَ اِنت.
راشد ھسین ءِ کھول ءِ رد ءَ بیست ءُ شش دسمبر دوھزار ءَ ھژدہ ءَ آ مزن ھور امارات ءَ چیریں ادارھاں آوار جتگ ءُ آؤرتگ کہ ھما وھد ءَ پولیس ءِ گور ءَ آئی ءِ ارزی ھم نبشتگ کرتگ، راشد اگست دوھزار ءُ شانزدہ ءَ امارات ءَ درپہ دری زندمان ءَ گوازینگ ءَ بیتگ.
اے گپ ءِ راستی ایمنسٹی انٹر نیشنل یو اے ای ءِ چیپٹر ءَ کرتگ کہ آئی ءَ وتی ایم ڈی اے نمبر 25/9880/2019 اماراتی سرکار ءِ دری وزیر ءَ ڈیک وارتگ ءُ دزبندی کرتگ کہ راشد ھسین ءِ بارو ءَ آئی ءِ کھول ءَ سرپد بہ کنت ءُ آئی ءِ کھول ءَ پیش ءِ بہ داریت، ایمنسٹی انٹرنیشنل ءَ راشد ھسین وتی سرپدیانی رد ءَ چاگردی باسکے گوشتگ.
داں وھد ءِ گوزان ءَ راشد ھسین ءِ آوار جنی ءَ شش ماہ ءَ پد پاکستان ءِ رسانکداراں اے گپ تالان کرتگ ءُ اے ٹاہ داتگ کہ پاکستانی مزن دستانی دزبندی ءِ سر ءَ راشد ھسین یو اے ای ءَ چَہ دزگیر کرتگ ءُ انٹرپول ءِ کمک ءَ آ پاکستان ءَ آرگ بیتگ.
راشد ھسین ھچبر ھچ وڑیں آمیدگساں پیش کنگ نہ بیتگ یک سالے ءُ شش ماہ ءِ گوزگ ءَ پد شانزدہ اپریل دوھزار ءُ بیست ءَ پاکستان ءِ یک آمید گسے ءَ آئی ءَ ناشری ءِ بھتام زنی کرتگ، ابکھی یے اے گپ کہ پاکستانی رسانکدراں وت ھم آئی ءِ بارو ءَ یک سالے ءَ پیسر گشتگ کہ آ پاکستانی مزن دستانی گور ءَ اِنت.
دی بلوچستان پوسٹ ءَ اماراتی(پیڈرل اتھاڑٹی پارآڈینٹٹی ءُ سٹینزن شپ) نیمگ ءَ شنگ بیتگیں (ایکزٹ سرٹیپیکٹ) راستی بیتگ کہ چریشانی پلگارگیں رنگے ءَ زانگ بیت کہ راشد ھسین امارات ءِ البتین بالی پٹ ءَ بیست ءُ دو جون دوھزار ءُ نوزدہ ءَ نوشکی ءَ پاکستان ءَ برگ بیتگ، ایشی ءَ چَہ زانگ بیت کہ راشد ھسین یک وت نامیں بالی یے ءِ سر ءَ آرگ بیتگ، البتین بالی پٹ بس ایوک ءَ وت نامیں بالیانی واستا کارمرد بیت اِنت اے بالی پٹ امارتی سرکار ءِ لشکری بالیانیگ اِنت ءُ نیوی ءُ پولیس ءِ مردمانی واستا کارمرد بیگ ءَ اِنت دومی نیمگ ءَ نوشکی ءَ بالی پٹ نیست نزیکتریں بالی پٹ دالبندین ءَ انت کہ سرجم ءَ پاکستانی لشکر ءِ دست ءَ اِنت.
راشد ھسین ءِ کھول ءُ وائس پار بلوچ مسنگ پرسنز ءِ چیئرمین ماما کدیر بلوچ ءَ دو جتائیں گچینی ءِ شنگ ھالاں اے ڈاہ داتگ کہ مئے گور ءَ راستی ءِ پدراھی ھست کہ راشد ھسین پاکستانی چیریں ادارھانی گور ءَ بندیگ اِنت ءُ اشی ءَ چیریں جرمکار گوشگ راشد ءِ زندگی ءِ واستا بیمناک اِنت.
اے سرجمیں جاورھال ءَ پاکستان ءِ آمید ءِ راست گُش راستی ءَ زیرگ ءَ انت ءُ ھما رنگ ءَ کہ پاکستانی ءُ اماراتی مزن دست ھور بیتگ ءُ اے جیڑوے گار کنگ ءِ جھد اِش کرتگ اے انسانی ھکانی لگتمالی ءَ پدراھی ءَ کنت.
پاکستانی مزن دستاں اے ڈاہ واتر نہ کرتگ کہ راشد ھسین امارات ءَ انٹرپول ءِ کمک ءَ پاکستان ءَ آؤرتگ آمدگس ءِ ارزی ءِ دزگیری ءِ ڈاہ ءَ پد اے گپ پدر کنگ نہ بیتگ انگت ءَ سِند رینجرز ءُ کراچی ایوی ایشن اتھارٹی ءَ راشد ءِ دزگیری رد کرتگ.
یک ویب سائیٹ ءِ جوڑ کنگ بیتگ کہ راشد ھسین ءِ بیگواھی ءِ روچاں ھساب دارگ ءَ انت، اے ویب سائیٹ ءَ مروچی ھم گندگ بیت کہ راشد ھسین ءِ بیگواھی ءَ یک سال ءُ سَے ماہ ءُ سَے ھپتگ ءُ دو روچ بیتگ، اے اُمیت ءَ چارگ اِنت کہ روچانی اے برز بیگ داں کدین ءَ چیر بیت کنت ءُ باز زوت راشد ھسین آمیدگسانی دیم ءَ پیشدارگ ءُ اود ءَ آ وتی پھک دامنی ءَ کرت بہ کنت.