TBP Balochi

بلوچستان ءِ دمگ چاگی نوکنڈی ءَ سلاہ بندیں مردماں پاکستانی پوج ءِ سر ءَ اُرش کتگ – گوستگیں بازیں وھداں جنگ ءُ چوپ برجاہ بیتگ-

دمگی مردمانی رد ءَ دمگ ءَ یکشل ءَ تیرگواری ءُ تراکانی توار اشکنگ بوگ ءَ انت-

سرکاری بنشون ءَ نوکنڈی اُرش ءِ ھال راست کتگ ءُ گوشتگ وتکش اُرشے بیتگ-

دومی بلوچستان لبریشن فرنٹ ءِ جارکش میجر گوھرام بلوچ ءَ اُرش ءِ زمہ واری من اتگ ءُ گوشتگ نوکنڈی ءَ ریکوڈک ءُ سیندک پریامانی درملکی کارندھانی بنجاھی بنجل ءِ کمپان ءِ سر ءَ سوب ءِ سرمچاراں اُرش کتگ-

جارکش ءَ گوشتگ بلوچستان لبریشن فرنٹ ءِ ھواریں ٹولی سوب ءِ سرمچاراں بلوچستان ءِ دمگ نوکنڈی ءَ ریکوڈک ءُ سیندک ءَ ھواریں درملکی کارندہ ءُ انجنیئرانی مزنیں بنجل ءِ کمپان ءِ سر ءَ ترندیں اُرشے کتگ ءُ اُرش برجاہ انت ءُ سرجمیں درشان زوت شنگ کنگ بیت انت-

بلوچستان ءِ دمگ کیچ ءِ ھند ھوشوپ ءُ گوستگیں روچ ءَ دمگی آبادی ءِ سر ءَ پاکستانی پوج ءِ نیمگ ءَ گولہ باری ءَ زدگ بیتگیں پنچ جنکوانی توک ءَ یکے ءَ ساہ داتگ ءُ بیران بیتگ-

آ تربت ھپستال ءَ بنداتی درمان ءَ پد ناگیگیں جاوراں دیم پہ کراچی ءَ برگ ءِ وھد ءَ راہ ءَ بیران بیتگ-

ویل ءِ ھلاپ ءَ دمگی ءُ سانمندین کھول ءُ این ایٹ شھدگ ءِ سر ءَ زھرشانی کنان ءَ نندانک داتگ چریشی ءِ سبب ءَ روانی مھتل بیتگ-

زھرشانی ءَ سانمندیں کھول ءُ دمگی مھلوک بازیں کچے ءَ ھوار انت-

زھرشانی کنوکاں زھگانی سر ءَ اُرش سنگینین انسانی ناوشی ءِ گوشتگ ءُ زمہ وارانی ھلاپ ءَ کاروائی کنگ ءِ لوٹ کتگ-

آیاں گوشتگ تپلین زھرشانی زدگ کنگ ءُ یکے ءِ بیران بوگ ریاستی ادارہ ءُ سرکار ءِ سر ءَ ٹوھیں جستے ایر انت-

دومی نیمگ ءَ بلوچ یکجھتی کمیٹی ءَ وتی درشان ءَ ویل ایر جتگ ءُ گوشتگ کہ بیست ءُ نُھ نومبر دوھزار ءُ بیست ءُ پنچ ءَ پاکستانی پوج ءَ کیچ ھوشاپ ءَ لس شھری نشانگ کتگ انت-

آئی ءَ گوشتگ پوج ءِ مارٹر گولھانی آس دیگ ءِ سبب ءَ یازدہ سالی ئیں درداناگ، 12 سالی ئیں تاھرہ، 18 سالی ئیں آسیہ ءُ 13 سالی ئیں یاسمین ھوار انت –

آئی ءَ گوشتگ دمگی مردمانی رد ءَ یاسمین ءُ تاھرہ سک زدگ انت ءُ آیانی توک ءُ یکے ءِ پاد ءُ دومی ءِ سرین ءِ ھڈ سک ءَ ناگیگ انت ءُ ھردوک کراچی ءَ پہ الاج ءِ ھاتر ءَ برگ بیتگ انت- کہ اود ءَ یاسمین ءَ وتی ٹپانی درد نہ سگ اتگ ءُ بیران بیتگ- ءُ دگہ زھگانی ٹپ درمان کنگ بیتگ انت-

‏سالونکیں امران جان مارا پهل کن

نبشتہ کار : آئشہ بلوچ

دی بلوچستان پوسٹ

کُجام درد ءُ تورِشت ءَ نبشتہ بِکناں کُجام کِسّہ ءَ ؟ بلے هو اِیردستی اِنت کہ مارا گُٹگیر ئِے کُتگ مارا چہ زِند ءِ همُک وشّی زبھر ئِے کُتگ مئے سالونکاں چہ مات ءِ پنجگ ءَ بارت شھید کنت ءُ تیر سُپتگيں جوناں مارا سوگات کنت۔

سالونکیں امران جان اِے کِسّہ ءَ پہ مارا نوک نہ اِنت ما تا ھوش کُتگ مئے اِے درد ءُ رنجانی نیام ءَ ساہ زورگ ءَ اِنت بلے اِے بَری مئے ھاٹیگ هلاس اِنت کوپگ پُرشت اَنت کہ تئی آروس ءِ جاہ ءَ چاپ ءُ نازینک ءِ جاہ ءَ گریوگ ءُ کوکار اِنت امران جان تئی پرداچ اِیر اَنت تئی آروس ءِ گُد ءُ چَوٹ اِیر اَنت مئے دل ءَ هزار واهگ ءُ مُراد داشتگ اَت ما نَزانت کہ اِے روچ ءَ اِے هُون واریں رستر مئے دل ءُ جَگراں چو راڈ راڈ کن اَنت وھدے کہ تئی بَڈ ءِ اَکس ٹپی ءُ ٹوری اَت دیم اِش دات کماش ءَ کہ اَکس ديست کماش ھما جاہ ءَ کَپت گوں زمین ءَ دز مُوش بیت بلے ما دُرست بے وس اِت ایں دُو کروڈ لوٹ اِت اِش رستر ءَ سالونکیں امران جان دو کروڈ مئے دل ءُ چماں تئی مُود ءِ ٹالے ءِ مَٹ نہ اَت بلے نِیزگاری ءَ ما پر تو دُو لک ھم شوھاز اِت کُت نہ کُت نُو زمین ءُ آزمان مئے سر ءَ لُمب اِتگ اَنت پیشگاہ مارا وران اِنت مارا اِے درد ءُ رنج ءَ سِنگ کُتگ اَت نُو بلے اِے بَری نہ سگوکيں درد اَنت کہ جَبين اِش بُن داتگ سرجَميں شَپ ما ودار کُت کہ هُدا بلکيں وشیں هالے کار اِیت بلے ما نَزانت کہ سھب پہ مارا مھشر بیت، سُھب کہ بیت گُٹے چاہ ما اِیر نہ بُرت تاں تئی شھیدی ءِ هال سَر بیت گوانکو کہ پَچ کُت رسانکدر ءَ تئی اَکس شِنگ اَت کہ تو زَمین ءِ دِلبند ءَ وپتگ اِت ئے منی چّم تئی چّم ءَ کپت اَنت کہ تئی چّم ءَ تیر اِش جَتگ اَت۔اِے ساهت ءَ من پہ لبز گُشت نہ کن آں بلے ما کہ سر چِست کُت ءُ پَد ءَ گوانکو پَچ کُت تاں چاراں تئی دست اِش پُروشتگ گُڑا زمین ھم پَچ لرز اِت گوں من، من نہ زاناں منی مکھيں مات ءَ چون تئی دیدار کُت تئی یکین ءُ لاڈُکيں گُهار ءَ چون تئی دیدار کُت اِے درد ءُ اِے ساهت ءَ من گوں لبزاں گُشت نہ کن آں۔ تئی کماش ءَ ما چون بچار این ءُ دروگیں تَسلہ بِدے ایں؟کہ سالونکیں بَچ گوں هزار واهگ ءُ ارمان ءَ زمین ءِ باهوٹ بیت بانور کِلہ ءَ گوں هزار واهگ ءَ درد ءُ رنجاں مان رُپت۔ زَمین وتی بَچ ءَ وت گِچین کنت ،بلے مارا پَهل کن کہ ما پر تو هِچ کُت نہ کُت اِے بے وسّی ءُ اِیردستی ءَ ،سالونک جان کيپٹن ءُ کماش ءَ اَمبازاں کن ءُ سَری ءِ بازار ءِ کِسّہ ءَ اَلّم بہ کن ءُ کُليں شھیداں سلام کن
بس هواريں ندراں

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-

کیچ ءِ دمگ ھوشاپ ءَ پاکستانی پوج ءَ دمگی آبادی ءِ سر ءَ مارٹر گولہ آس داتگ چریشی ءِ آسر ءَ پنچ جنکو ٹپی بیتگ اَنت کہ آیانی تہ ءَ یکے ءِ جاور نگیگ گوشگ بیگ ءَ اَنت-

ٹپی زوت الاج ءِ ھاتر ءَ تربت ٹیچنگ ھستپال ءَ برگ بیتگ اَنت اود ءَ آ الاج کنگ بیگ ءَ اَنت-

دمگی اِھوالکار ءِ رِد ءَ پوج بُنجل ءِ نیمگ ءَ چہ لوگانی سر ءَ سر ءُ دیم تیرگواری ءُ مارٹر آس دیگ بیتگ، چریشی ءِ سبب ءَ زالبول ءُ جنکو ٹپی بیتگ اَنت- یک جنکوے ءِ جاور نگیگ گوشگ بیگ ءَ اَنت-

تربت ٹیچنگ ھسپتال ءِ یک زمہ واریں کاردارے ءَ ھم ھوشاپ ءَ چہ پنچ ٹپی جنکوانی آیگ ءِ گپ راست کتگ گوشتگ کہ ٹپی الاج کنگ بیگ ءَ اَنت-

دومی نیمگ ءَ ھوشاپ ءَ سلاہ بندیں مردمانی نیمگ ءَ دگانی سر ءَ ناکہ بندی ، پٹ ءُ پول پوج ءُ سلاہ بندانی میان ءَ تیرگواری ءِ ھال ھم سر بیتگ ، بلے اے درگت ءَ سرکاری ءُ پولیس نیمگ ءَ ھچ وڑیں درشان دیم ءَ نیتکگ-

دمگ ءَ جاور یکشل ءَ نگیگ اَنت-

بلوچستان ءَ جتاجتائیں دمگاں پاکستانی پوج ءِ سر ءَ اُرشانی دْرچ یکشل ءَ برجاہ ءَ اَنت، شھدگانی سر ءَ ناکہ بندی-

کیچ ءِ دمگ ھوشاپ، تجابان ءَ پاکستانی پوج ءِ کاروان ءَ ناشناسیں مردماں آئی ای ڈی تراک ءَ نشانگ کتگ ، چریشی ءَ پد سنگر گپتگ ءُ سلاہ بندیں کاروان سر ءَ اُرش کتگ-

اِھوالکار ءِ رِد ءَ اے وئیل ءَ دو گاڑی سرجمی ءَ تباہ بیتگ اَنت ءُ کارندہ مرتگ ءُ ٹپی بیتگ اَنت- گُڈی ھالانی تاں دمگ انگت سلاہ بندانی دستیگ اِنت-

ھمے وڑ بلیدہ ءَ پاکستانی پوج ءِ چیک پوسٹ سر ءَ ھم سلاہ بندیں مردماں اُرش کتگ- تیرگواری ءُ تراکانی توار اش کنگ بیتگ بلے تنی وھدے بیرانی ءِ ھال سر نہ بیتگ-

تربت ءِ دمگ گِنّہ ءَ پاکستانی لشکر ءِ دگہ یک چیک پوسٹے سلاہ بندیں مردماں نشانگ کتگ – اُرشکاراں زُبیدہ جلال دگ سر ءَ ھم چیک پوائنٹس جوڑ کتگ-

ھاران ءَ ھم یک تراکے ءِ توار اش کنگ بیتگ-

ھمے وڑ شال ءِ ھند کچی بیگ ءَ ناشناسیں مردماں پولیس گاڑی ءِ سر ءَ دستی بمب اُرشے کتگ-

پولیس ءِ واکدار گوشگ اِنت کہ وئیل ءَ ھچ وڑیں جانی تاوان نہ بیتگ، بلے گاڑی ءَ تاوان رس اِتگ-

دومی نیمگ ءَ بلوچستان ءِ تیاب دپی شھر گوادر ءَ کوسٹ گارڈز بُنجل ءِ سر ءَ سلاہ بنداں اُرش کتگ-

گیشیں ھالانی رِد ءَ گوادر ءِ دمگ جیونی ءَ کوسٹ گارڈز بُنجل ءِ سر ءَ سلاہ بنداں اُرش کتگ ءُ ھم میان ءَ تیرگواری ءُ تراکانی توار اش کنگ بوتگ-

ھمے وڑ شال ءُ کراچی ءِ بُنجاھی شھدگ بیلہ ھند سر ءَ بستگ ءُ رؤک ءُ آؤکیں گاڑی پٹ ءُ پول کتگ اَنت-

دومی نیمگ ءَ مند ءِ ھند بلو سلاہ بند پُترتگ اَنت گوں مردماں گپ ءُ تران ءِ کتگ-

تنی وھدے اُرشانی زمہ واری ھچ گل ءَ نہ زرتگ اَنت-

بلوچ یکجھتی کمیٹی ءَ بیگواھیں مردمانی کوش بلوچ چکچینی لیک اتگ ءُ گوشتگ کہ ابوبکر ء حاصل دشت نگور ءِ جھمنند اِنت ءُ اے وھد ءَ گْوادر ءَ بلوچ وارڈ ءَ نندوک بیتگ ،26 نومبر ءَ پاکستانی پوج ءَ زورانسری بیگواہ کتگ۔

آئی ءَ گوشتگ کہ دمگی مردمانی رد ءَ ابوبکر چہ گْوادر بلوچ وارڈ ءَ پاکستانی پوج ءَ زورانسری بیگواہ کتگ آ یک لس بلوچے ءُ ریڈی ءِ سر ءَ سبزی بھا کنگ ءُ وتی کھول ءَ والینگ ءَ بوتگ- آئی ءِ زورانسری بیگواھی ءَ سالے ءَ پد 28 نومبر ءِ سھب ءَ آئی ءِ ژانگولیں لاش چہ کیچ، ڈی بلوچ ءَ دزکپتگ۔

آئی ءَ دیمتر ءَ گوشتگ کہ عمران بلوچ ء نادل ھیات کہ آئی ءِ امر بیست ءُ شش سال اِنت ءُ تمپ، گومازی ءِ جھمنند اِنت، شپ ءِ دو ءَ ریاست ءِ پلا مرزی ءَ ھستیں کشندہ ٹولی ءِ کارمنداں چہ گس ءَ آوار جتگ ءُ بیگواہ کتگ۔ 26 نومبر ءَ چہ گس ءَ آوار جنگ بوتگ آئی ءِ گس ءَ سور ءِ تیاری ھم بوتگ۔

آئی ءَ گوشتگ کہ عمران بلوچ ءِ کھول ءِ رد ءَ کشندہ ٹولی ءِکارمنداں چہ آئی آوارجنی ءَ پد گوں کھول ءَ رھوت کتگ ءُ پہ آئی ءِ یل کنگ ءَ دو کروڑ زر لوٹ اِتگ ءُ گوشتگ کہ اگاں زر نہ دات عمران ءِ لاش ءَ چگل دے ایں۔ کھول ءَ سرجمیں زر دات نہ کتگ اَنت ءُ پہ واری ءَ ھپتاد لک ٹھینتگ بلے چہ ایشی ءَ ابید دومی شپ ءَ عمران بلوچ ءِ لاش تمپ گومازی ءَ چگل دیگ بوتگ۔

آئی ءَ گوشتگ کہ عمران بلوچ ءُ ابوبکر ءِ زورانسری بیگواھی ءُ درکانودی کوش سرجمیں بلوچستان ءَ ریاستی زوراکیاں پاشک کنت ءُ انسانی ھکانی بگیری اِنت۔

بلوچستان ءِ مزن شھر شال ءَ پاکستانی پوج ءِ سر ءَ یکے ءَ پد دو بمب تراک کنگ بیتگ انت-

مرچی سھب ءَ شال ءَ قمبرانی دگ ءَ گوں ھمگرنچیں اللہ والا چوک ءَ ناکہ بندی ءَ گوں دزبندیں پورسز ءِ کارندھانی سر ءَ پرپٹ ءَ پِٹیں ریموٹ کنٹرول آئی ای ڈی ءِ تراکے ءِ نشانگ کنگ بیتگ-

بنشون ءِ رد ءَ تراک ءِ وھد ءَ گْوشگ بوتگیں جاہ ءَ پولیس ءُ ایگل اسکواڈ ءِ نزیک ءَ دہ کارندہ جم بوتگ اَنت۔

دومی نیمگ ءَ قمبرانی دگ ءِ سر ءَ بوتگیں تراک ءَ کرائم برانچ ءِ کارندہ کہ دیم ءَ جنزگ ءِ وھد ءَ تراکے ءِ نشانگ کنگ بیتگ انت-

وکداراں تراک ءِ ھال راست کتگ بلے ٹپیانی بابت ءَ ھچ وڑیں ھال ءُ اھوال نہ داتگ۔

گوستگیں بیست ءُ چارکلاکانی تہ ءَ بلوچستان ءِ دمگ جیونی ءُ شال ءَ سئے آئی ای ڈی تراک ءِ ھال دیم ءَ اتکگ انت ءُ گْوستگیں شپ ءَ شال ءَ فورسے یک پوسٹے ، ولی جیٹ ءَ دستی بمب اُرشانی نشانگ جوڑ کنگ بیتگ ۔

کیچ ءَ دو بیگواھیں مردمانی لاش دزکپتگ اَنت مردمانی تیرسُپتگیں لاش دزکپتگ اَنت-

گیشیں ھالانی رِد ءَ کیچ دمگ دیھات ءَ دو مردمانی لاش دزکپتگ اَنت-

دزکپتگیں لاشانی پجّار ابوبکر ء حاصل جھننند کھیرین بلنگور، طاھر احمد ء اللہ بخش جھمنند شولی دشت نام ءَ چہ بیتگ اَنت-

لاشانی پجّار آیانی کسگاں چہ دزکپتگیں پجّار کارڈ ءَ بیتگ اَنت-

اِھوالکار ءِ رِد ءَ طاھر ء اللہ بخش ھمے سال 12 مئی 2025 ءَ چہ گوادر ءَ بیگواہ کنگ بیتگ-

بیگواھی ءِ وھد ءَ کھول ءَ طاھر ءِ بیگواھی ءِ گپ راست گوشتگ کہ طاھر ءَ وتی گاڑی پہ ھڑ کنگ ءِ ھاتر ءَ گیراج ءَ برتگ ءُ پد آ بیگواہ بیتگ-

کھول ءَ گوشتگ وھدے کہ ما جُست ءُ پرس کُتگ گُڑا کوسٹ گارڈ ءَ منّ اِتگ کہ طاھر آیانی کر ءَ اِنت ءُ آئی ءَ یل کن ایں بلے دومی رند ءَ ھال اھوال کنگ ءَ پُشت کنز بیتگ ءُ مروچی آئی ءِ تیرسُپتگیں لاش دزکتپگ-

ھمے وڑ ابوبکر 27 نومبر 2024 ءَ ماں بلوچستان ءِ شھر گوادر ءَ گوں وتی برات عاصم ءِ ھمراھی ءَ آوار جنگ بیتگ ءُ مروچی تربت دیھات ءَ آئی ءِ لاش دزکپتگ ءُ عاصم یک ماھے ءَ پد یک کنگ بیتگ-

اھوالانی رد ءَ ابوبکر بنداتی ءَ بلنگور ءِ جھمنند انت کہ آوار جنی ءَ بیست روچ پیش چہ وتی ھنکین ءَ لڈ اتگ ءُ گوادر ءَ شتگ بیتگ اود ءَ بلوچ وارڈ ءَ آوار جنگ ءُ بیگواہ کنگ بیتگ-

یات بہ بیت بیگواھیں مردمانی مروچی اے سیمی لاش اِنت کہ دزکپگ ءَ اِنت اشی ءَ ساری تمپ گومازی ءَ ڈیتھ اسکواڈ کارندھانی دست ءَ آوار جنگ بیتگیں عمران بلوچ ءِ لاش گومازی کراس ءَ دزکپتگ اَت-

زانگ بہ بیت بلوچستان ءَ بیگواھیں ورنایانی لاشانی دور دیگ ءِ درچ گیش کنگ بیتگ-

بلوچستان ءِ دمگ کیچ تمپ ءَ بیگواھیں مردم ءِ لاش دزکپتگ-

گیشیں اھوالانی رد ءَ دو روچ پیش تمپ ءِ دمگ گومازی ءَ سرکار ءِ پلامرزی ءَ ھستیں گل کہ لس نام ءَ ‘ ڈیتھ اسکواڈ ’ ءِ نام ءَ زانگ بیت آئی ءِ دست ءَ آوار جنگ بیتگیں عمران ء نادل ءِ تیر سپتگیں لاش دزکپتگ-

دمگی مردمانی رد ءَ عمران دو روچ پیش گومازی ءَ سرکاری پلامرزی ءَ ھستیں گل ڈیتھ اسکواڈ ءِ کارندھاں چہ لوگ ءَ آوار جتگ ءُ برتگ-

بلوچستان ءَ سیاسی مردمانی گوشگ انت کہ ڈیتھ اسکواڈ پاکستانی پوج ءُ چیریں ادارھانی نیمگ ءَ جوڑ کرتگیں یک گلے کہ آ بلوچ ورنایانی آوار جنگ ءُ کوشاں دزمانجن انت –

سرکاری ھستیں ٹولی ءَ بلوچستان ءِ دگہ جاھاں ھم وتی پرکاری برجاہ داشتگ انت کہ گوستگیں روچ ءَ چہ گریشہ ءَ یک ورنایے آوار جنگ ءَ پد کُشتگ ءُ چگل داتگ ات-

ھمے وڑ ءَ اھوال انت کہ تربت دھات ءَ ھم دو مردمانی لاش دزکپتگ انت بلے تنی وھدی اے دوئیں لاشانی پجار نہ بیتگ انت-

بلوچستان ءِ جتاجتائیں دمگاں پاکستانی پوج ءَ دو براتاں ھوار پنچ مردم آوار جتگ وھدے کہ دو یل کنگ ءُ یکے کُشگ بیتگ-

گیشیں ھالانی رِد ءَ بلوچستان ءِ بُنجاھی شھر شال ءِ دمگ سریاب ءَ پاکستانی پوج ءَ ھمے سال سے نومبر ءِ شپ یک ءَ چہ غفور ٹاؤن ءَ ھپدہ سالی ئیں میڈیکل ڈسپنسر سودیس بلوچ ء خان محمد آوار جتگ ءُ بیگواہ، ھمے وڑ شال ءِ دمگ سریاب ءَ پاکستانی پوج ءَ سے نومبر ءِ شپ یک ءَ چہ غفور ٹاؤن ءَ ھژدہ سالی ئیں وسیم بلوچ ء محمد ایوب آوار جتگ ءُ بیگواہ کتگ-

ھمے وڑ چہ کوھلو ءَ پاکستانی پوج ءَ دہ نومبر ءِ شپ دو ءَ یک لوگے ءِ سر ءَ بیڑبرتگ 23 سالی ئیں مزدور ادو خان ء غزی آوار جتگ ءُ بیگواہ کتگ-

چہ ڈیرہ بگٹی ءِ تھسیل سوئی ءِ ھند چہ مَٹ ءَ 26 نومبر 2025 ءَ سی ٹی ڈی کارندھاں بیڑبرتگ دو برات ستا دین بگٹی ء پیرل خان بگٹی ءُ فضل ء دین بگٹی ء پیرل خان بگٹی آوار جتگ ءُ بیگواہ کتگ-

چہ کیچ ءِ تھسیل بلیدہ ءَ سی اپریل 2025 ءَ آوار جنگ بیتگیں شاھنواز بلوچ ء حاجی اللہ بخش بیست پنچ نومبر 2025 ءَ چہ کراچی ءَ یل کنگ بیتگ، وھدے کہ کیچ ءِ دمگ کیل کور بالگتر ءَ ھژدہ نومبر ءَ زورانسری بیگواہ کنگ بیتگیں امیر بخش ء گنگوزار یل کنگ بیتگ ءُ وتی لوگ ءَ سر بیتگ-

دومی نیمگ ءَ بی وائی سی ءَ وتی شنگ کتگیں درشان ءِ تہ ءَ گْوشتگ کہ بیست شش سالی ئیں محمد عالم ء مولا بخش ءُ گریشہ ریاستی پلامرزی سلاہ بندیں ٹولی ءَ تیرگواری کتگ ءُ کُشتگ- آ وتی سانگبدانی گند ءُ نند ءِ ھاتر ءَ مشکی بائی پاس دگ نزیک ءَ برجاہ یک میتگے ءَ روگ ءَ بیتگ اے میان ءَ دیم پوشیں سلاہ بندیں مردماں آیانی سر ءَ تچکی ءَ تیرگواری کتگ چریشی ءِ آسر ءَ آ جاہ پہ جاھی بیران بیتگ-

چمّگدانی رِد ءَ محمد عالم پاکستانی پوج ءِ چیردستی ءَ کارکنوکیں سلاہ بندیں ٹولی ءَ پہ زانت تیرگواری ءِ نشانگ کتگ- آ وتی کھول ءِ یکیں لاپ دیوک بیتگ کہ آئی ءِ تہ ءَ مئزوریں برات، یک کماشیں پتے ءُ کسانیں چُک ھوار اَنت-

بی وائی سی ءِ رِد ءَ محمد عالم ءِ کوش بلوچستان ءَ ریاستی پلامرزی ٹولی ءِ دست ءَ درکانودی کوش اِنت، زورانسری آوار جنی ءُ مھکمیں زوراکی ءِ یک مزنیں بھرے کہ آئی ءِ دراھیں دمک ءِ کودکیں شھری ھترہ ءِ دیمپانی کتگ اَنت- اے وڑیں وئیل بلوچستان ءَ برجاہ انسانی ھکانی سنگینی ءَ گیش پدر کنت-