نواز اتا ءِ پچیں نِمدی چہ زندان ءَ پہ جھان ءِ انسانی ھکانی گلاں
نبشتہ : اکیل مراد
دی بلوچستان پوسٹ
دروت!
دراھبات ئے اُمیت اِنت شما وَش ءُ سلامت اِت ءُ جھان ءِ انسانی ھکانی واست ءَ جوانیں وڑے ءَ کار کنگ ءَ ئے جھان ءِ کُنڈ کُنڈا شمے باسک ءُ کار کنوک ھست اَنت درست سلامت بات اَنت ۔ بیلاں من اے نِمدی ءَ اے وھدءَ کہ نِبشتہ کنگ ءَ اوں اے وھد ءَ من تھاریں زنداناں بندیگ اَنت ءُ منی ھمراھی ءَ کسانوکیں آپتاب ءُ دگہ ھپت نودربر ھوار اِنت کہ منی ھمراھی ءَ زوراکیں چیریں اداراھانی کارندھاں آوار جتگ اَنت مئے روچءِ آوار جنی ءَ بہ گر داں مروچی ءَ ما ترندیں زندانانی تہ ءَ ترندیں ازیت آں اوپار کنگ ءَ ایں ۔ چَہ مارا پیسر ھم باز مردم بندیگ انت اے کوٹی ءَ کہ من گوں ھشتیں گونڈواں بندیگ آں، دوھمی کوٹی ءَ باریں چُنت مردم اَنت کہ مان اَنت ھمک روچ ءُ شپ آیانی بس چیھالاں ایش کن آں آیانی جِند تنی وھدی نہ دیستگ بلے مئے لَٹ ءُ کُٹ کنوکیں مردک ءَ مارا ھم روچ ءِ لَٹ ءُ کُٹانی میان ءَ ھمے گوشیت (وہ بھی بلوچ ہے) منی دل ءَ پیسر ءَ ھمے شک اَت کہ ادے درستیں بندیگ بلوچ بنت پرچاکہ بلوچستان ءَ ھروھد ءِ کہ مردمانی لاش دَز کَپتگ اَنت گڑا آ ترندیں لَٹانی نشانگ بیتگ اَنت آیانی ناکُن کَشگ بیتگ اَنت آیانی دلبند ڈریل کنگ بیتگ آیانی جسم ءِ سر ءَ سگریٹ کُشگ ءُ پاکستان زندہ باد ءُ بلوچستان مردہ باد نبشتگ کنگ بیتگ آیانی چَم ھم کَشگ بیتگاں بیت کنت شمارا یات اِنت من شمارا باز وھد ءَ وتی سوشل رسانکدرانی تہءَ سرپد کُرتگ ءُ شمارا ھال دیگ ءِ جھد کُرتگ بَلے تنی وھدی کہ من گِندگ ءَ اوں شما چشیِں گامگیج نہ زرتگ کہ بلوچستان ءَ انسانانی زندمان کمیں بھتر بہ بیت اود ءَ انسان آرامی ءَ وپت کُت بہ کن آں بلے بژن اِنت بلوچستان ءِ ھالاں میڈیا نہ دنت ءُ شما بلوچستان ءِ آیگ ءِ جھد ءَ نہ کن ئے چرے سبب انت بلوچستان ءَ ٹوھیں کَچے ءَ انسانی ھکانی لگتمالی بوھگ ءَ ایں ھما وڑ ءَ کہ پاکستان ءَ نوزدہ سد ءُ ھپتاد ءُ یک ءَ ما بنگلہ دیش ءَ وتی زوراکی کرتگ اِت اَنت بلوچستان ءَ ھم ھما وڑیں زوراکیاں بندات کنگ لوٹ ایت ۔
من گوں گونڈواں بیست ءُ ھشت اکتوبر دوھزار ءُ ھبدہ ءَ کراچی گلستان جوھر ءَ آوار جنگ بیتگاں من ءَ چَہ دو روچ رَند کسانوکیں پوپل گوں وتی مات ءُ بانک سلمہ گوں لھتیں کسانوکیں چکاں چریشی ءَ ابید مارا کمے نزیک دگہ ھم لھتے جنینانی آوار جنی بیت اے وئیل ءَ چَہ پیسر بلوچستان ءَ بازیں کَچے ءَ جنین ءُ چک زوراکیں لشکر ءِ تیرانی آماچ بیتگ اَنت بلیدہ ءَ ھم یک برے جنین ءِ کُشگ بیتگ اَت بیسمہ ءَ ھم ھلیمہ نامے جنکوے تیرانی آماچ بیتگ اَت گوستگیں سالانی تہ ءَ بلوچستان ءَ ھزارانی کَچ ءَ کسان ءُ مزنیں مردم کُشگ بیتگ اَنت منی گورا اے وھدی وھد نیست کہ من شمارا درسیں ناماں بہ دیاں پرچاکہ منی ھردوکیں دست بستگ اَنت انوں دمان بیت کہ دست پَچ کنگ بیتگاں ءُ شمے سر ءَ اے نِمدی ءَ نِبشتہ کنگ ءَ اوں ءُ بلوچستان ءَ ھوار وتی جاورانی سر ءَ ھم شمارا ھال دیگ ءَ اوں کہ بلوچستان ءِ جاور چتور اَنت یک برے من ءَ پیریں زالبولے ءَ گوانکو کُرتگ اَت دوشی ءِ شپ ءَ لشکر اھتگ ءُ منی سَے نِماسگانی دست اِش بستگ اَنت ءُ برتگ اَنت شما پہ منی نماسگانی درگیجگ ءَ چیزوکے نہ کن اِت چم شمارا ءُ رب ءِ پاک ءَ سَک اَنت کہ من پہ ازابی اے نِماسگ رودینتگ ءُ پِنڈیتگ ءُ نماسگ وانیتگ اَنت مروچی پاکستان ءِ زوراکیں فوج ءَ برتگ ءُ گار کُرتگ اَنت اشاں چَہ اَبید بلوچستان ءَ بلوچ مھلوک ءِ واست ءَ توار چِست کنوکیں گَل وائس فارمسنگ پَرسنز ءِ رِد ءَ اے وھدی بلوچستان ءَ سِی ھزار مردم بیگواہ اِنت ءُ بازیں کَچے ءَ مردمانی لاش دزکپتگ اَنت گیشتر بیگواھیں مردم ھوار اَنت ۔
اے گپ شمارا یات اِنت کہ بلوچستان بلوچ مھلوک ءِ واست ءَ توار چِست کنوکیں کماش ماما قدیر ءَ پہ بیگواھیں مردمانی درگیجگ ءَ چُنت کَچ ءَ پند بُریتگ اَت فرزانہ چنت کَچ ءَ پَند بُریتگ اَت سمی ءَ چُنت کَچ پَند بُریتگ اَت علی ھیدر ءَ چُنت کَچ ءَ پَند بُریتگ اَت شما زان اِت کہ علی ھیدر ءِ اُمر چُنت اَت آ وھدی کہ پہ وتی پِت ءِ شوھازگ ءَ شال داں اسلام آباد ءَ درکپتگ اَت دَہ سال اَت آئی ءَ جھان شرمندگ کُرت ءُ اے کلوہ دات کہ من نرمزاریں مردے ءِ زھگ اَنت شیرزالیں دلاوریں جنین ءِ شَکم ءَ چہ پیداگ بیتگ اَنت من دلاوریں ماتے ءِ شیر میتکگ اَنت شما زان اِت کہ زاکر ءَ مروچی چنت سال اِنت کہ بندیگ اِنت دردناکیں ازیت آں سگگ ءَ ایں زاکر وَ یک اسٹوڈنٹ ءِ گلءِ وائس چیرمین اَت بیگواہ کنگ بیت چریشی ءَ پد ھمے گل ءِ چیئرمین کہ زاھد ءِ نام ءَ زانگ بیت اے ھم آوار جنگ بیت چریشی ءَ پد ھمے گل ءِ انفارمیشن سیکریٹری شبیر پنام لکی بیگواہ کنگ بیت چونائیگ ءَ من ھمیشاں ھوار بلوچستان ءِ گار ءُ بیگواھیں مردمانی واست ءَ جَد ءُ جھد ءَ اِت اَنت منی ھم ھمے میان ءَ دست بندیگ بیت اَنت
اے درستیں گپانی گوشگ ءَ پد نی وتی گڈی گپ ءَ شمارا گوش آں کہ ھما وھدی کہ شما پہ انسانی ھکانی واست ءَ شمے گل جوڑ کتگ کہ آئی ءِ تہ ءَ مزن مزنیں زوراوریں ملک ھوار اَنت مزن مزنیں پانک جنوک اَنت ھوار اَنت آ وتی دستاں دمان ءِ ترند بہ کن اَنت وابستان ءِ بستار ھم گار ءُ بیگواہ بیت بلے بژن ھمیش اِنت کہ آیاں وت ءَ ھَنچش کَر کُتگ ءُ گوشگ ءَ آں بلوچستان ءِ جاوراں گِندگ ءَ نہ اِنت اود ءَ انسانی زندمان ھما وڑ ءَ سر اِنت کہ یک کسانوکیں زھگے ھم ایمنی ءَ وپت نہ کنت، ایمنی ءَ زندمان گوازینت کُت نہ کنت مروچی آپتاپ کہ منی ھمراھی ءَ گِرگ بیتگ اشی ءِ اُمر ھَشت سال اِنت اے منی چمءِ دیدی اِنت آ ھما وڑا ازیت دیگ بوھگ ءَ ایں انسان وتی جاھ ءَ چَہ جانوراں بد تِر اِنت آپتاب ءِ چَم روچ ءِ ھما روچیگ ءَ بند بیتگ اَنت انگت ءَ بندیگ اَنت تنی وھدی آپتاب چُنت بر ءَ تُستگ ءُ بود ءَ آتکگ بَلے شمے بے تواری ءَ مروچی من ءَ زندانانی تہ ءَ لاچاری کُرتگ ءُ اے گرانیں سھت ءَ پرشما نِمدی ءِ نِبشتگ کرتگ ایمنسٹی انٹرنیشنل، یونائیٹڈ نیشنل کہ زوراوریں گپ کن اَنت کہ ما انسانی ھکانی واست ءَ وتی آسیتک لانتکگ اَنت انسانی ھکانی لگتمالی ءَ کَس نئیلیں ھچ کَس انساناں کُشت ءُ جَت نہ کنت بلے بلوچ مھلوک ءِ کُشت ءُ کوش چوں ائید ءِ براکاں گیش بوھگ ءَ ایں بلوچ مھلوک چو ارزُنی دان ءَ گار ءُ بیگواہ بووان انت شمے آستیک لانچی ءَ من گِندگ ءَ نہ اوں گڈی گپ ءَ بس ھمے گْوش آں کہ شما سلامت بات اِت ءُ انسانی ھکانی سر ءَ کار کنگ ءَ مدام بندوک بات اِت چرشمارا چہ ھمے اُمیت ءَ داراں کہ شما بلوچستان ءِ جاورھالانی سر ءَ دلگوشی دئے ءِ او بلوچستان ءَ انسانی ھکانی لگتمالی ءِ سر ءَ گامگیج زور ایت۔
