پنچ میان استمانی انسانی ھکانی گلاں پاکستان ءِ مزن وزیر شھباز شریپ ءَ را نبشتگیں یکجاھی نمدی یے ءِ تہ ءَ بلوچستان ءَ بلوچ انسانی ھک ءُ سیاسی کارکنانی سر ءَ برجاھیں کریک ڈاؤن ءِ سر ءَ سکیں دلگوشی ءِ درشانی کتگ کہ ایشی ءِ تہ ءَ دزگیر کنگ، زوراکی ءَ بیگواہ کنگ ءُ پرامن زھرشانی ءِ ھلاپ ءَ ریاستی کریک ڈاؤن ھوار اَنت۔
اقوام متحدہ ءِ گل ایمنسٹی انٹرنیشنل، ایشیائی پورم پار ھیومن رائٹس اینڈ ڈویلپمنٹ، پرنٹ لائن ڈیپینڈرز، انٹرنیشنل پیڈریشن پار ھیومن رائٹس، ٹارچر ءِ ھلاپ ءَ جھان ءِ گل ءِ نیمگ ءَ پاکستان ءِ مزن وزیر ءَ را نمدی نبشتہ کنگ بوتگ ءُ بلوچ سیاسی ءِ زوت ءَ باسکانی یل کنائینگ ءِ لوٹ کنگ بوتگ۔
نمدی ءِ تہ ءَ گْوشگ بیتگ کہ پاکستانی سرکار ءِ نیمگ ءَ چہ وتی آئینی ھکاں کارمرز کنوکیں مردمانی آزار ءُ ناجائزیں بندیگ کنگ نہ ایوک ءَ پاکستان ءِ آئین ءِ ھلاپ اِنت بلکیں میان اُستمانی انسانی ھکّانی ھم ھلاپ ورزی اِنت کہ پاکستان ایشانی سر ءَ دزنبشت کنوک اِنت۔
نمدی ءِ تہ ءَ بلوچ یکجھتی کمیٹی ءِ نشانگ جوڑ کنگ ءِ سر ءَ ھاسیں رنگ ءَ جیڑگ ءِ درشانی کنگ بوتگ کہ اے یک پرامنیں راج دوستی یے کہ زوراکی ءَ بیگواہ کنگ ءِ ھلاپ ءَ ءُ انساپ ءِ ھاتر ءَ وتی توار ءَ چست کنگ ءَ اِنت۔
دومی نیمگ ءَ اے گلاں پاکستانی سرکار ءِ سر ءَ بھتام جتگ کہ آ پبلک آرڈر آرڈیننس 1960، الیکٹرانک کرائمز ایکٹ 2016، ءُ اینٹی ٹیررزم ایکٹ 1997 ءِ وڑیں کانوداں بلوچ جھدکاراں نشانگ جوڑ کنگ ءِ ھاتر ءَ ناجائز کارمرز کنگ ءَ اِنت۔
نمدی ءِ تہ ءَ انسانی ھکانی جھدکار بیبرگ زھری ءِ 20 مارچ ءَ چہ 3MPO ءِ چیر دستی ءَ بندیگ کنگ ءُ 21 مارچ ءَ آئی ءِ یلہ کنگ ءِ ھاتر ءَ زھرشانی کنوکیں مردمانی سر ءَ تیرگواری ءَ سئے مردمانی کُشگ ءِ گھگیر کنگ بوتگ۔
ھمے وڑ ءَ 22 مارچ ءَ زالبولیں جھدکار ڈاکٹر مھرنگ بلوچ ءُ بیبو بلوچ شال ءَ پرامنیں دھرنا ءِ وھد ءَ دزگیر کنگ بیتگ اَنت، بازیں ساھتاں بیگواہ کنگ بوتگ اَنت، کانونی نمائندگی ءُ درمان آسراتی ءَ چہ زبھر کنگ بوتگ اَنت۔
ایشی ءَ ابید سمی دین بلوچ، گلزادی بلوچ، شاھجی سبگت اللہ ءُ دگہ بازیں جھدکارانی دزگیر کنگ ءُ چہ آمیدگسانی نیمگ ءَ زمانت ءِ دیگ ءَ پد ھم 3MPO ءِ چیر دستی ءَ آھانی دوبر بندیگ کنگ گھگیر کنگ بوتگ۔ جھدکارانی کھول ءِ آزار ءُ اذیت، آھانی لوگانی سر ءَ اُرش ءُ دوا ءُ درمان ءِ آسراتی ءِ رد کنگ ھم نمدی ءِ تہ ءَ چست کنگ بوتگیں ھاسیں گپ اَنت۔
نمدی ءِ تہ ءَ 24 مئی ءَ اھوالکار ابداللتیپ بلوچ ءِ کُشگ ءُ وکیل جلیلا ھیدر ءِ کیس ءُ اھوالکار وھید مراد ءِ دزگیری ءَ را ھم درشانی آجوئی ءِ سر ءَ اُرش لیکگ بیتگ۔ انٹرنیٹ بند کنگ، ڈیجیٹل سرویلنس، ءُ سنسر شپ ھم بلوچ ءِ توار ءِ بے توار کنگ ءِ ھاتر ءَ ھترناکیں پندل لیکگ بنت۔
نمدی ءِ تہ ءَ پاکستانی سرکار ءَ گوں دزبندی کنگ بیتگ کہ آ زوت ءُ بے شرت ءَ سرجمیں بلوچ انسانی ھک ءِ جھدکار ءُ آیانی کھولاں یلہ بہ کنت، آیانی سر ءَ دراھیں دروگیں کیساں یلہ بہ دنت، بندیگ کنگ ءِ وھد ءَ کانود ءُ دوا ءِ آسراتی ءِ زمانت ءَ بہ دنت ءُ بندیگ جاہ ءَ ٹارچر ءِ بُھتامانی سر ءَ پلگاریں پٹ ءُ پولے بہ کنت۔
اے نمدی ءِ تہ ءَ اے گلاں گیشتر لوٹ کتگ کہ پاکستانی مزن وزیر ءَ چہ امن ءِ زھرشانی ، پریس ءِ آجوئی ، ءُ درشان ءِ آجوئی ءِ آئینی ھک ءِ اھترام کنگ بہ بیت ، جھدکارانی کھول ءِ آزار ءُ اذیت بند کنگ بہ بیت ءُ 21 مارچ ءَ شال ءَ زھرشانی کنوکیں مردمانی سر ءَ تیرگواری ءِ وئیل ءِ سر ءَ آزاتیں پٹ ءُ پول کنگ بہ بیت کہ انساپ ءِ جاہ ءَ بوشت اَنت۔