میر احمد چلتن وال سمالانی ءَ وتی درشان ءِ تہ ءَ گْوشتگ کہ مروچی چارشمبے ءِ روچ ءَ، نیمروچ دو ءَ سنجدی ایف سی چیک پوسٹ دولئے کانک ءَ منی کستریں برات ظھور احمد سمالانی چیریں ادارھانی کارمنداں درکانودی چست کتگ برتگ-
آئی ءَ گْوشتگ کہ اشی ءَ ساری ھم کساس دو ھپتگ ءَ ساری سی ٹی ڈی ءُ چیریں ادارھاں منی لوگ چلتن وال ھاؤس ءُ سرجمیں میتگ خلک عمر آباد کانک مستونگ ءَ شپ بے وھد ءَ بلوچ دودمان ءَ لگتمال کتگ ءُ بیڑبرتگ- چُک، کماش ءُ زالبول تُرسینتگ اَنت وھدے کہ منی سیادیں دو بچک چست کتگ ءُ دومی روچ ءَ درکانودی کشتگ ءُ آئی ءِ لاش چگل داتگ اَنت- ظھور احمد سمالانی اشی ءَ ساری ھم چار سال تَاں بیگواہ کتگ – بلے چار سالانی دراجکشیں پٹ ءُ پول ءَ پد آ پہ ازت یل کنگ بیتگ-
آئی ءَ گْوشتگ کہ نو ما سی ٹی ڈی ءُ چیریں ادارھاں وھدے دیگ ءَ ایں کہ آ منی برات ظھور احمد سمالانی ءَ پہ سلامتی یل بکنت- اگاں آ دوبر یل کنگ نہ بیت گُڑا ما تُرندیں زھرشانی ءِ جار ءَ جن ایں بلوچستان ءِ سرجمیں شھدگاں بے مدت واستا بند کن ایِں ظھور احمد یل کنائینگ ءَ تاں زھرشانی کن ایں-